Sirac 14
14
Ang Matuod nga Kalipay
1Malipayon ang tawo nga wala gid makasala sa pulong
kag wala gid sing dapat pangasub-an tungod sang sala.
2Malipayon ang tawo nga wala ginabasol sang iya konsensya,
kag wala madulai sing paglaom.
Masaligan nga Paggamit sang Manggad
3Ang manggad indi maayo para sa isa ka dalok nga tawo,
kag ano bala ang kapuslanan sang mga pagkabutang sa isa ka tawo nga maiyaiyahon?
4Ang tawo nga nagainot sa iya kaugalingon agod sa pagtipon sing manggad,
nagatipon sini para sa iban nga mga tawo,
kag ang iban magapagusto sang iya manggad.
5Kon ang tawo kuripot sa iya kaugalingon, ano ang paghatag niya sing kaayuhan sa iban?
Wala gani sia nagakalipay sa iya kaugalingon nga pagkabutang.
6Wala na sing mas malain pa nga tawo sang sa nagadumot sang iya kaugalingon,
sia gid ang nagabayad sang iya pagkalaut.
7Kon maghimo gid man sia sing maayo, indi amo ini ang iya tuyo,
kag sa ulihi ipakita niya ang iya kalaut.
8Malaut ang tawo nga may maibugon nga mga mata.
Ginatalikdan niya ang nagakinahanglan kag ginalikaw niya ang iya mata sa iban.
9Ang mata sang mahisa nga tawo indi kontento sang iya parti,
ang pagkahakog nagapakag-as sang kalag.
10Ang mainot nga tawo
wala sing pagkaon sa iya lamisa.
11Anak ko, suno sa masarangan mo ihatag ang labing maayo sa imo kaugalingon.
Kag magdulot sa gihapon sa Ginoo sang halad nga takos sa iya.
12Dumdoma nga ang kamatayon indi makahulat,
ang imo tion nga natalana sa lulobngan wala mo mahibal-i.
13Sa wala pa ikaw mapatay maghimo ka sing maayo sa imo abyan,
himua ang imo masarangan sa pagbulig sa iya.
14Indi pagdumilii ang imo kaugalingon sang maayo nga mga butang sa sini nga adlaw;
indi man pag-ipaiway ang pag-agom sang matinlo nga kalipay.
15Ibilin mo bala sa iban ang imo mga ginapangabudlayan
kag imo pagabutgabotan sa ila ang manggad nga imo gintipon sa mabudlay nga pagpaninguha?
16Maghatag ka kag magbaton, kag magpatawhay ka,
kay sa lulobngan indi ka na makakita sing kalipayan.
17Ang tanan nga nagakabuhi nagadaan kaangay sang bayu,
kay ang dumaan nga kasugoan amo man sa gihapon: “Ang tanan mapatay.”
18Kaangay sang mga dahon sang madabong nga kahoy
ang iban nagakataktak, ang iban nagatubo,
amo man ang mga kaliwatan sang unod kag dugo:
ang isa mapatay, ang isa matawo.
19Ang tanan nga mga binuhatan sang tawo nagakadunot kag nagakadula,
kag ang naghimo sini nagasunod sa ila.
Ang Kalipay sang mga Maalam
20Malipayon#Hulo. 8:32-35. ang tawo nga nagapamalandong sa Kaalam,
kag nagahimulos sini sa paghangop.
21Ang tawo nga nagatuon sang mga paagi sang Kaalam
nagatalupangod man sang mga sekrito sini.
22Nagalagas sia sini kaangay sang isa ka mangangayam
kag nagabantay sa pagdakop sini sa iya alagyan!
23Nagasid-ing sia sa iya sini mga bintana
kag nagapamati sa iya mga pwertahan.
24Nagaestar sia malapit sa balay sini,
nga nagapalpal sa iya sini mga pader,
25nga nagapatindog sang iya tolda malapit sa iya,
sa diin labing maayo ang pag-estar sang mga tawo.
26Ginabutang niya ang iya mga kabataan sa idalom sang iya landong,
kag nagapatindog sang tolda sa idalom sang iya mga sanga
27nga ginalandungan sia sini sa init,
kag nagaestar sia sa kasanag sini.
Currently Selected:
Sirac 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012