Sirac 15
15
1Ang nagatahod sa Ginoo magahimo sini tanan,
kag ang nakahibalo sang Kasugoan, magaangkon sia sang Kaalam.
2Magagwa sia sa pagsugata sa iya kaangay sang isa ka iloy,
kag batunon niya sia kaangay sang isa ka lamharon nga nobya.
3Hatagan niya sia sing paghangop nga mangin-iya kalan-on,
kag sang ihibalo nga mangin-iya ilimnon.
4Magasandig sia sa iya kag indi sia matumba,
magasalig sia sa iya kag indi sia mahuy-an.
5Pasidunggan niya sia labaw sa iya mga kaingod,
kag magahatag sa iya sang mga pulong kon maghambal sia sa katilingban.
6Pagakoronahan sia sing kalipay kag kasadya,
ang iya palanublion amo ang walay katapusan nga kadungganan.
7Ang mga buangbuang indi gid makaangkon sing Kaalam,
ang mga makasasala indi makakita sini.
8Nagapalagyo ini sa mga bugalon,
kag malayo ini sa mga panghunahuna sang mga butigon.
9Ang pagdayaw wala sa bibig sang isa ka makasasala,
kay wala sia ginatuytoyi sang Ginoo.
10Ang pagdayaw amo ang kapahayagan sang kaalam,
kay ang Ginoo gid amo ang nagapanghikot sini.
Kabubot-on nga Hilway
11Indi#Sir. 17:1-12. ka magsiling, “Ang Ginoo amo ang basulon sa akon pagpakasala,”
kay indi sia ang kabangdanan sang iya ginakangil-aran.
12Indi ka magsiling, “Sia ang nagpatalang sa akon,”
kay wala sia nagakinahanglan sang bulig sang mga makasasala
sa paglambot sang iya mga tinutuyo.
13Ang Ginoo nagakangil-ad sang bisan ano nga sahi sang bisyo,
kon nagatahod ka sa Ginoo indi ka sini makahigugma.
14Sang paghimo niya sang tawo sa ginsugoran,
ginhimo sia nga hilway sa pagsunod sang iya binubuot.
15Kon buot mo sarang mo matuman ang mga sugo,
yara sa imo kaugalingon ang pagpamat-od kon bala buot ka magmatutom ukon indi.
16Ginbutang niya sa imo atubang ang kalayo kag ang tubig,
dab-uta kag kuhaa ang imo ginpili.
17Ang tawo nagaatubang sa kabuhi kag sa kamatayon,
ang iya pilion mangin-iya.
18Kay daku ang kaalam sang Ginoo,
makagagahom sia kag makakita sang tanan.
19Ginabantayan niya ang mga nagatahod sa iya,
wala sing binuhatan ang tawo nga indi niya makita.
20Wala gid sia magsugo sa tawo nga magmalaut,
kag wala sia magtugot sa bisan sin-o sa pagpakasala.
Currently Selected:
Sirac 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012