Sirac 13
13
Magpakig-upod sa Imo mga Kapareho
1Ang bisan sin-o nga magatandog sang alkitran mamansahan,
ang nagaupod sa bugalon nga tawo manginkaangay man sa iya.
2Indi ka magpas-an sang karga nga mabug-at kaayo para sa imo,
indi ka magpakig-upod sa isa ka tawo nga mas gamhanan kag manggaranon pa sang sa imo.
Ngaa ibutang mo ang kolon sa tupad sang kaldero?
Kon magsantikanay sila ang kolon mabuka.
3Ang manggaranon nagahimo sing sala kag nagapabugal,
samtang ang imol ginahimuan sing sayop kag sia pa ang nagapangayo sing patawad.
4Kon mapuslan ka niya, pamintahaan niya ikaw,
pero kon indi ka na niya mapuslan bayaan niya ikaw.
5Kon madamo ang imo kwarta, pirme sia nagaupod sa imo,
kag urotan gid niya ikaw nga wala ginatublag sang iya konsensya.
6Kon may kinahanglan sia sa imo, magahimulos sia sa imo,
maayo gid ang iya yuhomyuhom sa imo kag dayawdayawon ka niya.
Kag magasiling sia sa imo, “Ano bala ang sarang ko mabulig sa imo?”
7Daw mahuya ka sang iya pag-amuma sa imo,
tubtob nga maurotan niya ikaw sing makaduha ukon makatlo,
pero sa ulihi kadlawan niya ikaw.
Kon makita ka niya sa ulihi, ligaran lang niya ikaw,
kag magalungolungo sang iya ulo sa imo.
8Mag-andam ka nga indi pagpatalangon
kag indi mahuy-an tungod sang imo pagkabalingag.
9Kon agdahon ka sang isa ka gamhanan nga tawo, indi ka magdalidali sa pagbaton,
kag magapamilit pa gid sia sang iya pangagda.
10Indi ka magdasudaso basi pahalinon ka,
pero indi ka man maghuyahuya, kay basi malimtan ka.
11Indi ka magpakigtupong sa iya
kag magsalig sa iya ginasiling nga makawiwili.
Kay ini tanan pagtilaw lamang,
ini tanan nga pagkaayo pagtungkad lamang sa imo.
12Ang tawo nga palahambal wala sing kaluoy
kag indi sia magkaluoy sa imo kon ikaw mahalitan ukon mabilanggo.
13Mag-andam ka, kag maghalong gid,
tungod kay nagalakat ka sa imo kalaglagan.#13:13 Ang iban nga mga manuskrito nagadugang sang bersikulo 13b-14: Kon mabatian mo ini sa imo katulogon, magmata ka! 14 Samtang nagakabuhi ka, higugmaa ang Ginoo kag magpanawag ka sa iya sa pagluwas sa imo.
15Ang tagsa ka sapat naluyag sang kapareho niya,
kag ang tagsa ka tawo sang iya isigkatawo.
16Ang tagsa ka tinuga nagaupod sa kaangay niya,
kag ang tawo nagapangita sang kapareho niya.
17Ano bala ang paghisugot sang lobo kag sang kordero?
Amo man ang makasasala kag ang matutom sa Dios.
18May kalinong bala ang ido kag ang kuring?
Kag may pag-ayuhay bala ang manggaranon kag ang imol?
19Subong nga ang mga leon nagakaon sang talunon nga mga asno sa desierto,
amo man ang mga manggaranon nagapatambok sang ila kaugalingon paagi sa mga imol.
20Ang bugalon nagakangil-ad sa pagpaubos;
amo man ang manggaranon nagatamay sa imol.
21Kon ang isa ka manggaranon mapukan, ginabuligan sia sang iya mga abyan.
Kon ang imol nga tawo mapukan, ginatikwang sia sang iya mga abyan.
22Kon ang isa ka manggaranon madanlog, madamo ang nagatabang sa iya.
Kon nagahambal sia sing malain, ginadayaw pa gani sia.
Kon madanlog ang imol nga tawo, ginabasol pa sia,
bisan maayo pa ang iya ginahambal, wala sing may nagapamati sa iya.
23Kon maghambal ang isa ka tawo nga manggaranon ang tanan nagahipos,
kag ila pagadayawon ang iya hambal tubtob gid sa kalangitan.
Kon maghambal ang imol nga tawo nagasiling sila, “Sin-o bala ini?”
kag kon madanlog sia, ginatikwang pa nila sia.
24Ang manggad maayo kon wala mamansahi sang sala,
ang kaimulon sala suno sa mga di-diosnon.
25Ang tagipusoon sang tawo amo ang nagabaylo sang iya guya,
malain ukon maayo.
26Ang tanda sang maayo nga tagipusoon amo ang malipayon nga guya,
pero ang paghimo sang mga hulobaton nagapakapoy sang hunahuna.
Currently Selected:
Sirac 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012