Sirac 11
11
1Ang isa ka imol nga maalam sarang makalakat nga tadlong ang iya ulo,
kag makapungko sia upod sa mga dungganon.
Mga Hitsura
2Indi pagdayawa ang tawo tungod sang iya ka gwapo,
kag indi ka magkaakig sa tawo tungod sang iya hitsura.
3Ang buyog diutay sa mga tinuga nga may mga pakpak,
pero ang dugos nga iya ginahimo amo ang labing matam-is sa mga pagkaon.
4Indi ka magpabugal tungod sang imo matahom nga bayu,
kag indi ka magpahambog kon ikaw pasidunggan.
Kay ang binuhatan sang Dios makatilingala,
bisan indi ini makit-an sang mga tawo.
5Madamo nga mga hari ang nagpungko na lang sa duta,
samtang ang isa ka tawo nga walawala gid nagsuksok sang korona.
6Madamo sang gamhanan nga mga tawo ang ginpakahuy-an sing tuman,
kag ang dungganon nga mga tawo nahulog sa gahom sang iban.
Magmahinalungon
7Indi ikaw magsiling nga sala yadto sa wala pa ikaw makapangusisa,
binagbinaga anay kag ugaling mangakig.
8Magpamati ka anay sa wala pa ikaw magsabat,
kag indi ka magsamulak kon nagahambal ang iban.
9Indi ka magpahilabot sa inaway sang iban
kag indi ka mag-entra sa inaway sang mga makasasala.
10Anak ko, indi ka magpakigbahin sa madamo nga mga hilikuton,
kon madamo ang imo mga interes magaantos ikaw.
Sa sobra mo nga dali, tapat gani nga nagakuri,
bisan madalagan ka, indi ka makapalagyo.
11Ang isa ka tawo nagabakabaka, nagaputoyputoy, nagasakusako,
pero wala man sia gihapon sing may hinimuan.
12May isa nga walawala gid nga nagakinahanglan sing bulig,
wala sing kusog kag tama gid ka imol,
pero ang Ginoo nagkaluoy sa iya,
kag ginbatak sia sa iya makaluluoy nga kahimtangan.
13Ginpabangon sia sang Ginoo sa kauswagan
sa bagay nga natingala ang tanan sa iya.
14Ang kaayuhan, kalainan, kabuhi kag kamatayon,
kaimulon kag kamanggaran nagahalin tanan sa Ginoo.
15Ang kaalam, paghangop, ihibalo sang Kasugoan,
gugma, kag sa paghimo sang maayong buhat—tanan ini nagikan sa Dios.
16Ang sayop kag kadudulman nanginkaupod sang mga makasasala sa ginsugoran,
kag sila nga nagakalipay sa kalautan, ini magapabilin tubtob sa ila nga pagtigulang.
17Ang mga dulot sang Ginoo sa mga matutom wala sing katapusan,
ang iya maayo nga kabubot-on nagadala sang walay katapusan nga kauswagan.
18Ayhan#Sal. 49:10; Luc. 12:16-21. ang isa ka tawo magamanggaranon paagi sa iya kapisan kag pagkinot,
kag amo ini ang balos nga iya mabaton.
19Nagasiling sia, “Karon mapahuway na ako,
nagakalipay ako sa akon mga pagkabutang.”
Pero wala sia makahibalo kon tubtob san-o ini magapadayon,
kay ibilin niya ang iya mga pagkabutang sa iban kag mapatay sia.
20Magmatutom ka sa imo katungdanan, magkalipay ka sa paghimo sini,
padayuna ang imo obra tubtob magtigulang ka.
21Indi ka magkatingala sa pag-uswag sang makasasala,
magsalig ka sa Ginoo kag magmaukod sa imo obra.
Indi mabudlay para sa Ginoo
ang paghimo sang imol nga tawo nga magmanggaranon sa hinali lang.
22Ang bendisyon sang Ginoo amo ang padya sang pagkamatinuohon,
ang Dios magahimo nga magapamukadkad sia sang pagpakamaayo gilayon.
23Indi ka magsiling, “Ano bala ang mga kinahanglan ko?
Ano bala nga kaayuhan ang yara sa akon sa palaabuton?”
24Kag indi ka magsiling, “Makasarang ako sa akon kaugalingon,
wala sing malain nga matabo sa akon sa palaabuton.”
25Ang kabudlayan malimtan sa tion sang kauswagan,
kag ang kauswagan sa tion sang kabudlayan indi madumdoman.
26Bisan sa adlaw sang pagkapatay sang isa ka tawo mahapos para sa Ginoo
ang paghatag sa iya sang iya mga balos.
27Ang malip-ot nga tion sang pag-antos nagapanas sang tanan nga mga handumanan sang kalipayan,
sa katapusan nga tion sang tawo ang iya mga binuhatan igapahayag.
28Indi pagtawga ang isa ka tawo nga malipayon sa wala pa sia mapatay,
kay indi makilala ang isa ka tawo tubtob sa iya pagkapatay.
Maghalong sa Pagpili sang mga Abyan
29Indi pag-agdaha ang bisan sin-o lang nga tawo sa imo balay,
kay ang pagkadayaon may madamo nga mga paagi.
30Ang bugalon nga hunahuna sang isa ka tawo kaangay sang isa ka makagalanyat nga pispis sa iya hawla,
ukon sang isa ka espiya nga nagabantay sang imo kalaglagan.
31Ang maayo magpatupato nagapakamalain sang maayo nga butang
kag nagabutang sang pagbasol sa isa ka hinimuan nga takos dayawon.
32Ang diutay nga alipalok makapadabdab sang madamo nga mga uling,
kag ang pagsudyot sang isa ka malain nga tawo magabunga sing pagpinatyanay.
33Mag-andam ka sa isa ka huroshuros kag sa iya malaut nga mga padihot,
kay basi musingan niya ang imo ngalan sa walay katapusan.
34Dalha ang isa ka dumoluong sa imo balay kag magahimo sia sing kagamo,
kag himuon niya ikaw nga dumoluong sa imo kaugalingon nga panimalay.
Currently Selected:
Sirac 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012