Sirac 10
10
1Ang maalam nga pangulo nagatudlo sang iya mga tawo,
kag nagagahom sa ila sa husto kag maayo nga pagdumala.
2Kon ano ang pangulo amo man ang mga opisyales,
kon ano ang gobernador amo man ang mga pumoluyo.
3Ang isa ka hari nga wala sing alam amo ang kalaglagan sang iya sinakpan,
pero ang maalam nga mga pangulo nagapauswag sang siudad.
4Ang pagginahom sang kalibutan yara sa mga kamot sang Ginoo,
sa nagakaigo nga tion nagapili sia sang tawo nga bagay sa paggahom sini.
5Yara sa mga kamot sang Ginoo ang tanan nga kauswagan sang tawo,
sia amo ang nagapasidungog sa mga nagahimo sang kasugoan.
Ang Bugal
6Indi ka maghupot sing kaakig batok sa imo isigkatawo sa tagsa ka sayop nga iya nahimo,
kag indi ka magpadaladala sa imo bugal.
7Ang pagkabugalon ginakaugtan sang Dios kag sang tawo,
kag ang pagkadi-matarong ginakaakigan nila.
8Ang ginharian nagabaylobaylo halin sa isa ka pungsod pakadto sa isa ka pungsod,
tungod sang pagkadi-matarong, sang pagpabugal, kag sang kwarta.
9Ano bala ang mapabugal sang tawo? Yab-ok lamang sia kag abo,
bisan buhi pa sia, ang lawas nagakadunot na.
10Ang malawig nga balatian nagahikay sang ikasarang sang manugbulong;
ang hari ayhan buhi karon nga adlaw, mahimo manginbangkay buas.
11Kon mapatay ang isa ka tawo,
ang iya maangkon amo ang mga ulod, mga sapat kag mga lago.
12Ang pagsugod sang bugal sang tawo amo ang pagsikway sa Ginoo,
kag ang pagpahilayo sang tagipusoon sang tawo sa iya Manunuga.
13Tungod kay ang ginsugoran sang bugal amo ang sala,
ang bisan sin-o nga nagaangkon sini magaula sing mga kalautan.
Gani ang Ginoo nagapadala sa ila sing tumalagsahon nga mga silot
kag nagadala sa ila sa bug-os nga kapahamakan.
14Ang#1 Sam. 2:8; Luc. 1:52. Ginoo nagalaglag sang mga trono sang mga prinsipe
kag nagabulos sang mapainuboson nga mga tawo sa ila lugar.
15Ang Ginoo nagagabot sang bugalon nga mga pungsod sa ila mga gamot
kag sa baylo nagapatindog sia sang mga mapainuboson sa ila lugar.
16Ginapukan sang Ginoo ang mga ginharian sang mga kapungsoran,
kag nagalaglag sa ila sa mga sadsaran gid sang duta.
17Ang iban ginakuha niya kag ginalaglag sila
agod nga madula sa duta ang ila handumanan.
18Ang bugal indi amo ang tuyo sang Manunuga para sa tawo
ukon ang masingkal nga kaakig para sa mga anak sang isa ka babayi.
Ang mga Tawo nga Bagay Pasidunggan
19Ano bala nga tinuga ang takos pasidunggan?
Ang mga katawhan.
Ano nga rasa sang tawo ang takos pasidunggan?
Ang nagatahod sa Ginoo.
Ano bala nga tinuga ang takos tamayon?
Ang mga katawhan.
Ano nga rasa sang tawo ang takos tamayon?
Ang nagalapas sang mga kasugoan sang Ginoo.
20Ang pangulo sang mga mag-ulotod takos pasidunggan
kag ang mga nagatahod sa Ginoo takos pasidunggan sa iya panulok.#10:20 Ang iban nga mga manuskrito nagadugang sang bersikulo 21: Ang kadalag-an nagasugod sa pagtahod sa Ginoo, pero ang kapaslawan nagasugod sa pagpadungol kag pagpabugal. 22Ang mapabugal sang mga manggaranon, sang mga bantog, kag sang mga imol
amo ang pagtahod lamang sa Ginoo.
23Indi nagakabagay ang pagtamay sa isa ka imol nga tawo pero maalam,
kag indi husto ang pagpasidungog sa tawo nga makasasala.
24Ang prinsipe, ang hukom, kag ang pangulo nagaagom sing mga kadungganan,
pero wala sing isa sa ila nga mas gamhanan pa sang sa tawo nga nagatahod sa Ginoo.
25Ang maalam nga ulipon pagaalagaron sang hilway nga mga tawo,
kag ang tawo nga may paghangop indi magreklamo sini.
Pagpaubos kag Pagtaha sa Kaugalingon
26Indi pag-ipakitakita ang imo kinaadman sa imo pag-obra,
kag indi ka magpabugal samtang yara ka sa kapiutan.
27Mas maayo pa ang tawo nga nagaobra sing tudotudo, nga may madamo nga mga pagkabutang,
sang sa nagapakunokuno nga wala man sing ginakaon.
28Anak ko, sa wala sing pagpabugal, tahura ang imo kaugalingon,
kag usisaa ang imo kaugalingon nga ikasarang.
29Sin-o bala ang magapakamatarong sang isa ka tawo nga nagatamay sang iya kaugalingon,
ukon magtaha sang isa ka tawo nga nagahikay sang iya kaugalingon?
30Ang imol nga tawo ginapasidunggan tungod sang iya kaalam, kag
ang manggaranon tungod sang iya manggad.
31Kon ang isa ka tawo ginapasidunggan tungod sang iya kaimulon, daw ano pa gid kon sia manggaranon!
Kag kon sia ginatamay sa iya pagkamanggaranon, daw ano pa gid sa iya kaimulon!
Currently Selected:
Sirac 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012