Bugna 9
9
1Dayon ang ikalima nga anghel nagpatunog sang iya trumpeta. Nakita ko ang isa ka bituon nga nahulog sa duta halin sa langit. Ginhatagan ini sang yabi sang buho nga tama ka dalom.#9:1 BUHO NGA TAMA KA DALOM: Ang lugar sa kadadalman sang duta sa diin ang mga demonyo ginbilanggo tubtob sa ila katapusan nga silot. 2Gin-abrihan#Gen. 19:28. sang bituon ang buho nga tama ka dalom kag nagtub-ok ang aso kaangay sang aso nga nagahalin sa daku nga hornohan. Ang silak sang adlaw kag ang kahawaan ginpadulom sang aso nga naghalin sa buho nga tama ka dalom. 3Halin#Exo. 10:12-15; Klm. Sol. 16:9. sa aso naggulowa ang mga apan kag naghugpa sa duta, kag ginhatagan sila sing gahom kaangay sang gahom sang iya sang mga iwiiwi. 4Ginsingganan#Ezeq. 9:4. sila nga indi nila paghalitan ang mga hilamon, ukon ang mga kahoy, ukon ang iban nga mga tanom. Ang ila lamang sarang mahalitan amo ang mga tawo nga wala sing marka sang selyo sang Dios sa ila mga agtang. 5Ang mga apan wala gintugoti sa pagpamatay sini nga mga tawo, kundi sa pagpaantos lamang sa ila sa sulod sang lima ka bulan. Ang kasakit sang pagpaantos sa ila kaangay sang kasakit sang kutot sang iwiiwi. 6Sa#Job 3:21; Jer. 8:3. sulod sang lima ka bulan, yadtong mga tawo magapangita sang kamatayon, pero indi nila ini makita. Luyag sila nga mapatay, pero ang kamatayon magapahilayo sa ila.
7Ang#Joel 2:4. mga apan daw mga kabayo nga nahanda sa inaway. Sa ila mga ulo daw may mga korona nga bulawan, kag ang ila mga guya daw iya sang tawo. 8Ang#Joel 1:6. ila buhok daw buhok sang babayi, ang ila mga ngipon daw mga ngipon sang leon. 9Ang#Joel 2:5. ila mga dughan natabunan sang daw mga panaming nga salsalon, kag ang huni sang ila mga pakpak daw hagunos sang madamo nga mga karwahi nga ginaguyod sang mga kabayo pakadto sa inaway. 10May mga ikog sila kag inugkutot subong sang iya sang mga iwiiwi, kag yara sa ila mga ikog ang gahom sa paghalit sang mga tawo sa sulod sang lima ka bulan. 11May hari nga nagadumala sa ila, nga amo ang anghel nga gintugyanan sang buho nga tama ka dalom. Ang iya ngalan sa Hebreo amo si Abadon, sa Griego si Apolyon nga kon sayuron, “Ang Manuglaglag”.
12Ang nahauna nga makakulogmat nga butang tapos na. Sa tapos sini may duha pa ka makakulogmat nga mga butang nga magaabot.
13Dayon#Exo. 30:1-3. ang ikan-om nga anghel nagpatunog sang iya trumpeta. Nabatian ko ang isa ka tingog nga nagahalin sa apat ka mga pamusod sang bulawan nga altar nga yara sa atubang sang Dios. 14Nagsiling ang tingog sa ikan-om nga anghel nga may trumpeta, “Buy-i ang apat ka mga anghel nga nagapos sa daku nga Suba sang Eufrates!” 15Ginbuy-an ang apat ka mga anghel. Gin-aman sila para sa sini gid nga oras, sa sini gid nga adlaw kag sa sini gid nga bulan kag tuig, sa pagpamatay sang ikatlo nga bahin sang tanan nga mga katawhan. 16Ginsugiran ako sang kadamuon sang mga hangaway nga nagasakay sa kabayo. Ang ila kadamuon 200,000,000. 17#Klm. Sol. 11:17-18.Kag sa akon palanan-awon nakita ko ang mga kabayo kag ang mga nagasakay: may mga panaming sila nga mapula sa dughan subong sang kalayo, maasol subong sang sapiro, kag dalag subong sang asupre. Ang mga ulo sang mga kabayo daw ulo sang mga leon, kag halin sa ila mga baba nagagwa ang kalayo, ang aso kag ang asupre. 18Ang ikatlo nga bahin sang mga katawhan ginpamatay sining tatlo ka mga kalalat-an: ang kalayo, ang aso, kag ang asupre nga nagagwa sa mga baba sang mga kabayo. 19Kay ang gahom sang mga kabayo yara sa ila mga baba kag sa ila man mga ikog. Ang ila mga ikog daw mga man-og nga may mga ulo, kag ginagamit nila ini sa pagpanghalit sa mga tawo.
20Ang#Sal. 115:4-7; 135:15-17; Dan. 5:23. iban sang mga tawo nga wala mapatay sining tatlo ka mga kalalat-an, wala magbiya sang ila mga ginhimo nga diosdios. Wala sila mag-untat sa pagsimba sa mga demonyo kag mga diosdios nga bulawan, pilak, bronsi, bato, kag kahoy nga indi makakita, ukon makabati ukon makalakat. 21Kag ini nga mga tawo wala man maghinulsol sang ila mga pagpamatay, sang ila pagpangbabaylan, sang ila pagpakighilawas, kag sang ila mga pagpangawat.
Currently Selected:
Bugna 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
