Bugna 3
3
Ang Mensahe para sa Sardis
1“Sa anghel sang iglesia sa Sardis, isulat ini:
“Amo ini ang mensahe halin sa iya nga may pito ka mga espiritu sang Dios kag may pito ka mga bituon. Nahibaluan ko kon ano ang imo ginahimo. Nahibaluan ko nga nabantugan ka nga buhi, bisan nga ikaw patay! 2Gani, magmata ka, kag palig-una ang nabilin pa sa imo, sa wala pa ini mapatay sing bug-os. Kay nasapwan ko nga ang imo mga binuhatan indi pa himpit sa panulok sang akon Dios. 3Gani,#Mat. 24:43-44; Luc. 12:39-40; Bug. 16:15. dumdoma kon ano ang gintudlo sa imo kag kon ano ang imo nabatian. Tumana ini, kag untati ang imo mga pagpakasala. Kon indi ka magmata, kadtuan ko ikaw subong sang isa ka makawat, kag indi ka makahibalo kon san-o ako maabot. 4Pero ang pila sa inyo dira sa Sardis wala magmansa sang inyo mga bayu. Magalakat kamo upod sa akon, nga may bayu nga puti, tungod kay takos kamo sa paghimo sini. 5Ang#Exo. 32:32-33; Sal. 69:28; Bug. 20:12; Mat. 10:32; Luc. 12:8. mga nagadaog pabayuan sing puti nga kaangay sini kag indi ko pagpanason ang ila mga ngalan sa libro sang kabuhi. Ipakilala ko sa presensya sang akon Amay kag sang iya mga anghel nga akon sila.
6“Gani, ang may mga dulonggan, magpamati sa ginasiling sang Espiritu sa mga iglesia!
Ang Mensahe para sa Filadelfia
7“Sa#Isa. 22:22; Job 12:14. anghel sang iglesia sa Filadelfia, isulat ini:
“Amo ini ang mensahe halin sa iya nga balaan kag matuod, nga nagauyat sang yabi nga iya ni David, nga nagaabri kag wala na sing may makasira, nga nagasira kag wala na sing may makaabri. 8Nahibaluan ko kon ano ang imo ginahimo. Nahibaluan ko nga may diutay ka nga gahom. Nagtuman ka sang akon pagtulon-an kag nagmatutom ka sa akon. May gin-abrihan ako nga pwertahan sa atubang mo, nga wala sing may makasira. 9Pamatii#Isa. 49:23; 60:14; Isa. 43:4. ini! Kon nahanungod sadtong grupo nga iya ni Satanas, yadtong mga butigon nga nagapaka-Judio, pero indi sila mga Judio, pakadtuon ko sila kag paludhon sa imo tiilan. Mahibaluan nila tanan nga ginahigugma ko ikaw. 10Tungod kay nagtuman ka sa akon sugo nga magbatas sa imo mga kabudlayan, pagaapinan ko man ikaw sa mga kalalat-an nga magaabot sa bug-os nga kalibutan sa pagtilaw sang tanan nga mga tawo sa duta. 11Magaabot ako sa labing madali. Hupti ang yara sa imo agod nga wala sing may mag-agaw sang padya nga imo nadaog. 12Ang#Bug. 21:2; Isa. 62:2; 65:15. nagadaog himuon ko nga haligi sa templo sang akon Dios, kag indi na gid sia maghalin didto. Isulat ko sa iya ang ngalan sang akon Dios, kag ang ngalan sang siudad sang akon Dios, ang bag-o nga Jerusalem nga magakunsad halin sa langit gikan sa akon Dios. Isulat ko man sa iya ang akon bag-o nga ngalan.
13“Gani, ang may mga dulonggan, magpamati sa ginasiling sang Espiritu sa mga iglesia!
Ang Mensahe para sa Laodicea
14“Sa#Hulo. 8:22. anghel sang iglesia sa Laodicea, isulat ini:
“Amo ini ang mensahe halin sa iya nga ginatawag Kabay Pa, ang matutom kag matuod nga saksi, ang ginhalinan#3:14 ginhalinan: ukonpangulo. sang tanan nga gintuga sang Dios. 15Nahibaluan ko ang imo mga binuhatan. Nahibaluan ko nga indi ikaw mabugnaw ukon mainit. Luyag ko kuntani nga mabugnaw ka ukon mainit! 16Pero tungod kay maalabaab ka lang, indi mainit kag indi man mabugnaw, akon ikaw isuka! 17Nagasiling ka, ‘Manggaranon ako kag may madamo nga mga pagkabutang. Wala sing nakulang sa akon.’ Pero wala ka makahibalo kon daw ano ikaw ka makaluluoy kag kailo! Imol ka, wala sing bayu kag bulag. 18Gani, nagalaygay ako sa imo sa pagbakal sa akon sing puraw nga bulawan agod nga magmanggaranon ka. Magbakal ka man sing puti nga bayu nga imo isuksok kag itabon sa imo makahuloya nga pagkahublas. Magbakal ka man sing bulong para sa imo mga mata, agod makakita ka. 19Ginasaway#Hulo. 3:12; Heb. 12:6. ko kag ginasilutan ang tanan nga akon ginahigugma. Gani, magmainit ka, kag mag-untat sa imo pagpakasala. 20Pamati ka! Nagatindog ako sa pwertahan kag nagapanuktok. Kon may makabati sang akon tingog kag mag-abri sang pwertahan, magasulod ako sa iya balay, kag magakaon upod sa iya, kag sia magakaon upod sa akon. 21Ang mga nagadaog papungkoon ko sa akon tupad sa trono, subong nga ako nagdaog, kag karon nagapungko sa tupad sang akon Amay sa iya trono.
22“Gani, ang may mga dulonggan, magpamati sa ginasiling sang Espiritu sa mga iglesia!”
Currently Selected:
Bugna 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
