Bugna 4
4
Ang Panimbahon sa Langit
1Sa tapos sini, may isa pa gid ako ka palanan-awon, kag may nakita ako nga isa ka pwertahan nga nabuksan sa langit.
Kag ang tingog nga daw tunog sang trumpeta nga akon man anay nabatian nga naghambal sa akon, nagsiling, “Saka ka diri kag ipakita ko sa imo ang dapat mahanabo sa tapos sini.” 2Sa#Ezeq. 1:26-28; 10:1. gilayon gingamhan ako sang Espiritu kag nakita ko nga didto sa langit may trono, kag sa sini nga trono may nagapungko. 3Ang iya guya nagabadlak kaangay sang malahalon nga mga bato subong sang haspe kag kornalina, kag sa palibot sang trono may balangaw nga nagabadlak kaangay sang esmeralda. 4Sa palibot sang trono, may baynte kwatro pa gid ka mga trono, nga ginapungkuan sang baynte kwatro ka mga katigulangan, nga nagabayo sing puti, kag may mga korona nga bulawan. 5Halin#Exo. 19:16; Tob. 12:15; Bug. 8:5; 11:19; 16:18; Ezeq. 1:13; Bug. 1:4; Zac. 4:2. sa trono, may nagakirab nga kilat, mga ginahod, kag dinaguob. May pito ka mga sulo nga nasindihan kag nagasiga sa atubang sang trono. Ini sila amo ang pito ka mga espiritu sang Dios. 6Subong#Ezeq. 1:22. man sa atubangan sang trono, may yara man nga daw salaming nga dagat nga matin-aw subong sang kristal.
Sa palibot sang trono, sa tagsa ka kilid, may apat ka buhi nga mga tinuga nga daw pulos lang mga mata sa atubangan kag sa likod. 7Ang nahauna nga tinuga nga buhi daw leon, ang ikaduha daw torite nga baka, ang ikatlo ang iya guya daw iya sang tawo, kag ang ikap-at daw agila nga nagalupad. 8Ang#Ezeq. 1:18; 10:12; Isa. 6:2-3. tagsatagsa sining apat ka mga tinuga nga buhi may anom ka mga pakpak, kag daw pulos lang sila mga mata, sa gwa kag sa sulod. Sa adlaw kag gab-i wala sila nagauntat sa pagkanta nga nagasiling:
“Balaan, balaan, balaan, ang Ginoong Dios nga Makagagahom,
nga amo anay, amo karon, kag amo ang magaabot.”
9Kon ang apat ka buhi nga mga tinuga magkanta sa paghimaya, sa pagpasidungog, kag sa pagpasalamat sa nagapungko sa trono, nga nagakabuhi sa wala sing katapusan, 10ang baynte kwatro ka mga katigulangan nagaluhod sa atubang sang nagapungko sa trono, kag nagasimba sa iya nga nagakabuhi sa wala sing katapusan. Ginabutang nila ang ila mga korona sa atubangan sang trono, kag nagasiling:
11“O Ginoo kag Dios namon,
takos ikaw sa pagbaton sang himaya, kadungganan, kag gahom.
Kay gintuga mo ang tanan nga mga butang,
kag sa imo kabubot-on gintuga mo sila kag ginhatagan sing kabuhi.”
Currently Selected:
Bugna 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
