Bugna 21
21
Ang Bag-o nga Langit kag ang Bag-o nga Duta
1Dayon#Isa. 65:17; 66:22; 2 Ped. 3:13. nakita ko ang bag-o nga langit kag ang bag-o nga duta. Ang nahauna nga langit kag ang nahauna nga duta wala na kag ang dagat nawala. 2Kag#Isa. 52:1; Bug. 3:12; Isa. 61:10. nakita ko ang Balaan nga Siudad, ang bag-o nga Jerusalem, nga nagakunsad halin sa langit gikan sa Dios, nga naaman kag handa na, kaangay sang isa ka nagatrahe nga nobya nga nagasugata sa lalaki nga iya pamanahon. 3Nabatian#Ezeq. 37:27; Lev. 26:11, 12. ko ang mabaskog nga tingog nga nagahambal halin sa trono: “Karon, ang balay sang Dios yara sa mga tawo! Magaestar sia upod sa ila, kag sila mangin-iya katawhan. Ang Dios gid magapakig-upod sa ila, kag sia mangin-ila Dios. 4Pagapahiran#Isa. 25:8; Isa. 35:10; 65:19. niya ang tanan nga mga luha sa ila mga mata. Wala na sing kamatayon, kasubo, paghibi, ukon kasakit. Ang daan nga mga butang wala na.”
5Dayon ang nagapungko sa trono nagsiling, “Karon, ginabag-o ko ang tanan nga mga butang!” Nagsiling man sia sa akon, “Isulat ini nga mga pulong tungod kay ini matuod kag masaligan.” 6Kag#Isa. 55:1. nagsiling pa gid sia, “Natuman na! Ako amo ang Alpha kag ang Omega, ang ginsugoran kag ang katapusan. Ang bisan sin-o nga ginauhaw paimnon ko nga wala sing bayad sa tuboran sang tubig sang kabuhi. 7Ang#2 Sam. 7:14; Sal. 89:26-27. bisan sin-o nga nagadaog magabaton halin sa akon sining masunod: ako mangin-iya Dios, kag sia mangin-akon anak. 8Pero ang mga matalaw, ang mga di-matinuohon, ang mga nagahimo sang makangilil-ad nga butang sa ila kapareho, ang mga manugpatay kag mga makihilawason, ang mga manugbabaylan kag ang mga nagasimba sa mga diosdios, kag ang tanan nga mga butigon—ang lugar para sa ila amo ang linaw sang nagadabdab nga kalayo kag asupre nga amo ang ikaduha nga kamatayon.”
Ang Bag-o nga Jerusalem
9Ang isa sang pito ka mga anghel nga may pito ka mga yahong nga puno sang pito ka katapusan nga mga kalalat-an nagpalapit sa akon kag nagsiling, “Dali ka, kag ipakita ko sa imo ang Nobya, ang asawa sang Kordero.” 10Gingamhan#Ezeq. 40:2. ako sang Espiritu, kag gindala ako sang anghel sa putokputokan sang mataas kaayo nga bukid. Ginpakita niya sa akon ang Jerusalem, ang Balaan nga Siudad, nga nagakunsad halin sa langit gikan sa Dios, 11nga nagabanaag sang kapawa sang presensya sang Dios. Ang siudad nagabanaag kaangay sang malahalon nga bato, kaangay sang haspe, nga matin-aw subong sang kristal. 12Ginalibutan#Ezeq. 48:30-35. ini sang daku kag mataas nga pader, nga may dose ka mga pwerta, kag ginabantayan sang dose ka mga anghel. Sa mga pwerta nasulat ang mga ngalan sang dose ka mga tribo sang Israel. 13May tatlo ka mga pwerta sa tagsa ka kilid: tatlo sa sidlangan, tatlo sa nabagatnan, tatlo sa aminhan, kag tatlo sa nakatundan. 14Ang pader sang siudad napasad sa dose ka mga bato, nga nasulatan sang mga ngalan sang dose ka mga apostoles sang Kordero. 15Ang#Ezeq. 40:3. anghel nga naghambal sa akon may inugtakos nga baston nga bulawan sa pagtakos sang siudad, sang iya mga pwerta, kag sang iya mga pader. 16Ang siudad kwadrado, pareho ang kalabaon kag ang kasangkaron. Gintakos sang anghel ang siudad sang iya inugtakos: ang kalabaon sini 2,400 ka kilometro, kag pareho man sini ang iya kasangkaron kag ang kataason. 17Gintakos man sang anghel ang pader, kag ang kataason#21:17 kataason: ukonkadamulon. sini sesentay sais ka metro, suno sa kinaandan nga takos nga gingamit niya. 18Ang#Tob. 13:16-17. #Isa. 54:11-12. pader nahimo sa haspe, kag ang siudad mismo nahimo sa puraw nga bulawan nga pareho katin-aw sang kristal. 19Ang sadsaran nga mga bato sang pader sang siudad napugtakan sang tanan nga sahi sang malahalon nga mga bato. Ang nahauna nga sadsaran nga bato haspe, ang ikaduha sapiro, ang ikatlo kalsedonia, ang ikap-at esmeralda, 20ang ikalima sardonika, ang ikan-om kornalina, ang ikapito krisolito, ang ikawalo berilo, ang ikasiyam topasio, ang ika-10 krisopraso, ang ika-11 hasinto kag ang ika-12 amatista. 21Ang dose ka mga pwerta mga perlas. Ang kada pwerta nahimo sa isa ka perlas. Ang kalsada sang siudad puraw nga bulawan kag matin-aw pareho sang kristal.
22Wala ako sing nakita nga templo sa siudad, tungod kay ang iya templo amo ang Ginoong Dios, ang Makagagahom, kag ang Kordero. 23Ang#Isa. 60:19-20. siudad wala na kinahanglan nga silakan pa sang adlaw kag bulan, tungod kay ang nagabanaag nga kapawa sang presensya sang Dios nagasilak sa iya, kag ang Kordero amo ang iya suga. 24Ang#Isa. 60:3. mga katawhan sang kalibutan magalakat sa iya kapawa, kag ang mga hari sang duta magadala sang ila manggad sa iya. 25Ang#Isa. 60:11. mga pwerta sang siudad bukas sa bilog nga adlaw. Indi na gid ini pagsiradohan, tungod kay wala sing gab-i didto. 26Ang matahom nga mga butang kag manggad sang mga kapungsoran pagadalhon sa sini nga siudad. 27Pero#Isa. 52:1; Ezeq. 44:9. wala sing bisan ano nga may dagta ukon bisan sin-o nga nagahimo sing makahuloya nga mga butang ukon nagabinutig nga makasulod sa siudad. Ang makasulod sa siudad amo lamang ang mga tawo nga ang ila mga ngalan nasulat sa libro sang kabuhi nga iya sang Kordero.
Currently Selected:
Bugna 21: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
