Popular Bible Verses from Bugna 21

Share

Pagapahiran niya ang tanan nga mga luha sa ila mga mata. Wala na sing kamatayon, kasubo, paghibi, ukon kasakit. Ang daan nga mga butang wala na.”

Dayon ang nagapungko sa trono nagsiling, “Karon, ginabag-o ko ang tanan nga mga butang!” Nagsiling man sia sa akon, “Isulat ini nga mga pulong tungod kay ini matuod kag masaligan.”

Nabatian ko ang mabaskog nga tingog nga nagahambal halin sa trono: “Karon, ang balay sang Dios yara sa mga tawo! Magaestar sia upod sa ila, kag sila mangin-iya katawhan. Ang Dios gid magapakig-upod sa ila, kag sia mangin-ila Dios.

Kag nagsiling pa gid sia, “Natuman na! Ako amo ang Alpha kag ang Omega, ang ginsugoran kag ang katapusan. Ang bisan sin-o nga ginauhaw paimnon ko nga wala sing bayad sa tuboran sang tubig sang kabuhi.

Ang bisan sin-o nga nagadaog magabaton halin sa akon sining masunod: ako mangin-iya Dios, kag sia mangin-akon anak.

Pero ang mga matalaw, ang mga di-matinuohon, ang mga nagahimo sang makangilil-ad nga butang sa ila kapareho, ang mga manugpatay kag mga makihilawason, ang mga manugbabaylan kag ang mga nagasimba sa mga diosdios, kag ang tanan nga mga butigon—ang lugar para sa ila amo ang linaw sang nagadabdab nga kalayo kag asupre nga amo ang ikaduha nga kamatayon.”

Dayon nakita ko ang bag-o nga langit kag ang bag-o nga duta. Ang nahauna nga langit kag ang nahauna nga duta wala na kag ang dagat nawala.

Kag nakita ko ang Balaan nga Siudad, ang bag-o nga Jerusalem, nga nagakunsad halin sa langit gikan sa Dios, nga naaman kag handa na, kaangay sang isa ka nagatrahe nga nobya nga nagasugata sa lalaki nga iya pamanahon.

Ang siudad wala na kinahanglan nga silakan pa sang adlaw kag bulan, tungod kay ang nagabanaag nga kapawa sang presensya sang Dios nagasilak sa iya, kag ang Kordero amo ang iya suga. Ang mga katawhan sang kalibutan magalakat sa iya kapawa, kag ang mga hari sang duta magadala sang ila manggad sa iya.