Mga Salmo 84
84
Ang Kahidlaw sa Balay sang Dios#TITULO SA HEBREO: Salmo sang barangay ni Core.
1Daw ano ang akon paghigugma sa imo Templo,
O Ginoo sang mga hangaway!
2Daku gid ang akon handom sa pagkadto didto!
Ginahidlaw ako sa pagsulod sa Templo sang Ginoo.
Ang akon kabug-osan nagaamba nga may kalipay sa buhi nga Dios.
3Bisan ang mga maya nagahimo sang ila pugad,
kag ang mga salimbabatang may kaugalingon nga ilistaran,
ginabutang nila ang ila mga buto malapit sa imo mga altar,
O Ginoo sang mga hangaway hari kag akon Dios.
4Daw ano ka malipayon ang mga nagaestar sa imo Templo,
nga nagakanta sa gihapon sing pagdayaw sa imo.
5Daw ano ka malipayon sa ila nga ang ila mga kusog nagagikan sa imo,
yadtong nagahandom gid sa pagbuylog sa mga mainampuon sa pagkadto sa Bukid sang Sion.
6Sang nagalatas sila sang mamala nga kapatagan sang Baca,
nanginlugar ini sang mga tuboran,
subong nga ang nahauna nga ulan nagapuno sini sang mga kaayuhan.
7Nagabaskog sila samtang nagapanglakatan sila,
makita nila sa Sion ang Dios sang mga dios.
8Pamatii ang akon pangamuyo, O Ginoong Dios sang mga hangaway.
Pamatii, O Dios ni Jacob!
9Bendisyuni ang amon hari, O Dios,
ang hari nga imo ginpili.
10Ang isa ka adlaw sa imo Templo
mas maayo pa sang sa isa ka libo ka mga adlaw sa bisan diin,
mas maayo pa nga ako magapabilin sa pwerta sang balay sang akon Dios
sang sa mag-estar sa mga balay sang mga malaut.
11Ang Ginoong Dios aton mangangapin kag mahimayaon nga hari,
nga nagahatag sa aton sing kaayuhan kag kadungganan.
Wala niya ginadumili ang bisan ano nga maayo nga butang
sa mga nagahimo sing matarong.
12Daw ano ka malipayon ang mga nagasalig sa imo,
O Ginoo sang mga hangaway!
Currently Selected:
Mga Salmo 84: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
