Mga Salmo 79
79
Ang Pangamuyo para sa Kahilwayan sang Pungsod#TITULO SA HEBREO: Salmo ni Asaf.
1O#2 Hari 25:8-10; 2 Cron. 36:17-19; Jer. 52:12-14. Dios, ginsalakay sang mga di-diosnon ang imo duta.
Gindagtaan nila ang imo balaan nga Templo
kag ginbayaan nila ang Jerusalem nga nalaglag.
2Ginbilin nila ang mga bangkay sang imo mga tawo agod manginkalan-on sang mga kapispisan,
ang mga bangkay sang imo mga alagad agod manginkalan-on sang mga sapat nga talunon.
3Ginpaagay nila ang dugo sang imo mga tawo kaangay sang tubig,
nagbaha ang dugo sa bug-os nga Jerusalem,
kag wala sing may nabilin sa paglubong sang mga bangkay.
4Ang mga pungsod sa palibot namon nagayaguta sa amon,
nagakadlaw sila kag nagalangulango sa amon.
5Tubtob san-o pa bala ang imo pagkaakig sa amon, O Ginoo? Wala bala sing katapusan?
Magapadayon bala sa pagdabdab ang imo kaakig subong sang kalayo?
6Magkaakig ka sa mga pungsod nga wala nagasimba sa imo,
sa mga tawo nga wala nagapanawag sa imo ngalan!
7Kay ginpamatay nila ang imo mga tawo,
kag ginlaglag nila ang imo pungsod.
8Indi kami pagsiluti tungod sang mga sala sang amon mga katigulangan.
Kaluoyi kami karon,
kay nadulaan kami sang tanan nga paglaom.
9Buligi kami, O Dios nga amon manluluwas,
tungod sa imo kaugalingon nga kadungganan.
Luwasa kami kag patawara ang amon mga sala,
agod ang iban nga mga tawo magatahod sa imo.
10Ngaa abi ang mga pungsod magpamangkot sa amon,
“Diin na bala ang inyo Dios?”
Ipakita sa amon ang imo pagsilot sang mga pungsod
tungod sang ila pagpaagay sang dugo sang imo mga alagad.
11Pamatii ang mga pag-ugayong sang mga binilanggo,
kag sa imo daku nga gahom hilwaya yadtong ginpamatbatan nga pagapatyon sang amon mga kaaway.
12O Ginoo, balusi sing pito ka pilo ang iban nga mga pungsod,
tungod sang ila mga pagpasipala batok sa imo.
13Dayon kami nga imo mga tawo, ang mga karnero sang imo panong,
magapasalamat sa imo sing dayon
kag magadayaw sa imo sa tanan nga tion nga palaabuton.
Currently Selected:
Mga Salmo 79: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
