Mga Salmo 78
78
Ang Dios kag ang Iya mga Tawo#TITULO SA HEBREO: Binalaybay ni Asaf.
1Pamati kamo, mga tawo ko, sa akon mga pagtudlo,
kag talupangda ang akon ginasiling.
2Magasugid#Mat. 13:3, 5. ako sa inyo sang maalam nga mga halambalanon,
kag saysayan ko kamo sang mga tinago sang una,
3sang mga butang nga aton nabatian kag nahibaluan,
nga ginsugid sang aton katigulangan.
4Indi naton ini pag-ilikom sa aton mga anak,
kundi sugiran ta ang masunod nga kaliwatan
nahanungod sang gahom sang Ginoo kag sang iya gamhanan nga mga binuhatan,
kag sang makatilingala nga mga butang nga iya ginhimo.
5Naghatag sia sing mga kasugoan sa mga tawo sang Israel,
kag mga sugo sa mga kaliwat ni Jacob.
Ginmanduan niya ang aton mga katigulangan
sa pagtudlo sang iya mga kasugoan sa ila mga anak,
6agod ang masunod nga kaliwatan makatuon sini,
kag masugid man nila ini sa ila mga kaanakan.
7Sa sini nga paagi magasalig man sila sa Dios,
kag indi nila pagkalimtan ang iya mga nahimo,
kundi magtuman sa gihapon sang iya mga kasugoan.
8Indi sila manginsubong sang ila katigulangan,
mabinatuon kag di-matinumanon nga mga tawo,
nga ang ila pagsalig sa Dios indi malig-on,
kag wala magpadayon sa pagkamatutom sa iya.
9Ang mga kaliwat ni Efraim nga nasangkapan sing mga pana kag mga baslay,
nagpalalagyo sa adlaw sang inaway.
10Wala sila magtuman sang ila kasugtanan sa Dios,
wala sila magtuman sang iya kasugoan.
11Nalimot sila sang iya mga binuhatan,
ang mga milagro nga iya ginpakita sa ila.
12Samtang#Exo. 7:8–12:32. ang ila mga katigulangan nagatan-aw, ang Dios naghimo sing mga milagro
sa patag sang Zoan, sa duta sang Ehipto.
13Ginpahawa#Exo. 1:21-22. niya ang dagat kag ginpaagi sila,
ginhimo niya ang tubig nga daw mga pader.
14Kon#Exo. 13:21-22. adlaw ginatuytuyan niya sila paagi sa panganod,
kag sa bug-os nga gab-i paagi sa kapawa sang kalayo.
15Ginpalitik#Exo. 17:1-7; Num. 20:2-13. niya ang mga igang sa desierto,
kag ginhatagan niya sila sing tubig gikan sa kadadalman.
16Ginpatubod#Klm. Sol. 16:1–19:22. niya ang tubig gikan sa igang,
kag ginpailig niya ini kaangay sang suba.
17Pero nagpadayon sila sa pagpakasala batok sa Dios,
kag didto sa desierto nagmabinatuon sila sa Labing Mataas.
18Gintilawan#Exo. 16:2-15; Num. 11:4-23, 31-35. nila sing hungod ang Dios,
paagi sa pagpangayo sing kalan-on nga luyag nila.
19Naghambal sila batok sa Dios, nga nagasiling,
“Makahatag bala ang Dios sing pagkaon sa desierto?
20Matuod nga iya ginhampak ang igang,
kag ang tubig nagsagawak sing mabaskog,
pero makahatag man bala sia sa aton sing kan-on,
kag makahatag bala sia sa iya mga tawo sing sud-an?”
21Gani, ang Ginoo naakig sang iya pagkabati sa ila,
iya ginpadalhan sing kalayo ang iya mga tawo,
kag nagdugang ang iya kaakig sa ila,
22tungod kay wala sila sing pagtuo sa iya,
kag wala sila magtuo nga sia magaluwas sa ila.
23Pero ginmanduan niya ang langit sa ibabaw,
kag ginsugo nga mag-abri ang mga pwertahan sini,
24ginhatagan#Klm. Sol. 16:20-29; Juan 6:31. niya sila sing kalan-on halin sa langit,
paagi sa pagpadala sa ila sing mana nga ila kaunon.
25Gani nagkaon sila sang kalan-on sang mga anghel.
Ang Dios naghatag sa ila sang kalan-on nga makapagusto sila sing kaon.
26Ginpahuyop man niya ang salatan,
kag sa iya gahom ginbuy-an niya ang habagat,
27kag ginpadalhan niya sila sang mga pispis nga nagadulom subong sang yab-ok,
subong kadamo sang mga balas sa baybayon,
28nagtupa ini sa tunga sang ila kampo,
sa palibot sang ila mga tolda.
29Gani ang mga tawo nagkaon kag nagkalabusog,
ang Dios naghatag sa ila sang tanan nga ila luyag.
30Pero samtang nagakaon pa sila,
bisan sa wala pa sila mabusog,
31ang Dios naakig sa ila,
kag ginpamatay niya ang ila labing mabakod nga mga tawo,
ang mga pinakaali nga mga pamatan-on sang Israel.
32Walay sapayan sini tanan ang mga tawo nagpadayon sa pagpakasala,
wala sapayan sang iya mga milagro,
wala sila magsalig sa iya.
33Gani gintapos niya ang ila mga inadlaw subong sang isa ka huyop,
ang ila mga kabuhi sa hinali nga kalaglagan.
34Sang pamatyon niya ang iban sa ila,
ang nabilin nagbalik sa iya,
naghinulsol sila kag nagpangamuyo sing hugot sa iya.
35Nadumdoman nila nga ang Dios amo ang ila mangangapin,
nga ang Labing Mataas nga Dios amo ang ila manluluwas.
36Pero ang ila mga ginahambal mga kabutigan,
kag ang tanan nga ila ginsiling pagdayawdayaw lang.
37Indi#Bin. 8:21. sila mainunongon sa iya,
ukon matutom sa ila
kasugtanan sa iya.
38Pero ang Dios nagmaluloy-on sa iya mga tawo.
Ginpatawad niya ang ila mga sala
kag wala niya sila paglaglaga.
Sa madamo nga mga tion ginpaiway niya ang iya kaakig
kag ginpunggan niya ang iya kasingkal.
39Nadumdoman niya nga sila mga tawo lamang,
subong sang hangin nga nagahuyop kag nagataliwan.
40Masunson sila nagbato sa iya didto sa desierto,
makapila nila sia ginpasubo!
41Sa liwat kag sa liwat gintilawan nila ang Dios,
kag ginapaakig ang Balaan nga Dios sang Israel.
42Nalimtan nila ang iya daku nga gahom,
nalimtan nila ang tion sang pagluwas niya sa ila gikan sa ila mga kaaway,
43kag ang paghimo niya sang gamhanan nga mga buhat kag mga milagro
sa patag sang Zoan, sa duta sang Ehipto.
44Ginhimo#Exo. 7:17-21. niya nga dugo ang tubig sa mga suba,
agod ang mga Ehiptohanon indi makainom sa ila mga kasapaan.
45Nagpadala#Exo. 8:20-24; Exo. 8:1-6. sia sing mga langaw nga nagpaantos sa ila,
kag sang mga paka nga naghalit sang ila mga uma.
46Nagpadala#Exo. 10:12-15. sia sing mga ulod sa pagkaon sang ila patubas,
kag mga apan sa pagpapas sang ila kaumhan.
47Ginpatay#Exo. 9:22-25. niya ang ila tanom nga mga ubas paagi sa ulan nga yelo nga daw mga bato,
kag ang ila higera nga mga kahoy ginpatay sang yelo nga daw pulbos.
48Ginpatay niya ang ila mga baka paagi sa ulan nga yelo nga daw mga bato,
kag ang ila mga panong paagi sa kilat.
49Ginpatup-an niya sila sang iya nagabalingaso nga kaakig,
kag sang iya nagahingalayo nga kasingkal,
nagpadala sia sa ila sing daku nga kalisod paagi sa pagpadala sang manuglaglag nga mga anghel.
50Wala sia magpugong sang iya kaakig,
ukon ginluwas ang ila mga kabuhi,
kundi ginpatay niya sila paagi sa peste.
51Ginpatay#Exo. 12:29. niya ang mga panganay nga lalaki
sang tanan nga mga panimalay sang Ehipto.
52Dayon#Exo. 13:17-22. gintuytoyan niya ang iya mga tawo pa gwa subong sang manugbantay sang karnero,
gintuytoyan niya sila sa desierto.
53Gintuytoyan#Exo. 14:26-28. niya sila nga wala maano, kag wala sila mahadlok,
pero ang dagat nagtabon sa ila mga kaaway.
54Gindala#Exo. 15:17; Jos. 3:14-17. niya sila sa iya balaan nga duta,
sa mga bukid nga sia gid amo ang nag-agaw.
55Gintabog#Jos. 11:16-23. niya ang mga pumoluyo samtang ang iya mga tawo nagapasulod,
ginpanagtag niya ang ila duta sa mga tribo sang Israel,
kag didto ginpaestar niya sila sa ila mga balay
56Pero#Huk. 2:11-15. nagbato sila sa Labing Mataas nga Dios,
kag gintilawan nila sia.
Wala sila magtuman sa iya mga sugo,
57pero nagmabinatuon sila kag nagdi-matinumanon subong sang ila mga katigulangan,
nga indi masaligan subong sang tiko nga baslay.
58Ginpaakig nila sia tungod sa ila di-diosnon nga mga altar,
kag ginpaimon nila sia tungod sang ila mga diosdios.
59Naakig ang Dios sang iya makita ini,
gani ginsikway niya sing bug-os ang iya mga tawo.
60Ginpatumbayaan#Jos. 18:1; Jer. 7:12-14; 26:6. niya ang iya tolda sa Silo,#78:60 SILO: Ang sentro sang ginasimbahan sang mga Israelinhon sa wala pa maghari si David.
ang iya gin-estaran sa tunga sang mga tawo.
61Gintugotan#1 Sam. 4:4-22. niya ang mga kaaway sa pag-agaw sang Kaban sang Kasugtanan,
sa diin nasulod ang nasulat nga kasugtanan sang Dios kag sang iya mga katawhan.
62Naakig sia sa iya kaugalingon nga mga tawo,
kag ginpabay-an niya sila nga mapatay sang ila mga kaaway.
63Ang mga pamatan-on nga lalaki ginpamatay sa inaway,
kag ang mga kadalagahan nawad-an sing palamanahon.
64Ang mga pari ginpamatay sa mga espada,
kag ang ila mga balo indi makalalaw sa ila.
65Sang ulihi ang Ginoo nagmata subong bala nga natulogan sia,
subong sia sang isa ka makusog nga tawo nga ginpaisog sang bino.
66Gintabog niya ang iya mga kaaway pabalik,
sa dayon kag makahuloya nga pagkalutos.
67Ginsikway niya ang mga kaliwat ni Jose,
wala niya pagpilia ang tribo ni Efraim.
68Sa baylo ginpili niya ang tribo ni Juda,
kag ang Bukid sang Sion nga iya ginapakamahal.
69Didto ginpatindog niya ang iya Templo,
subong sang iya balay sa langit,
ginpalig-on niya ini kaangay sang duta,
nga indi maano tubtob sa katapusan.
70Ginpili#1 Sam. 16:11-12; 2 Sam. 7:8; 1 Cron. 17:7. niya ang iya alagad nga si David,
ginkuha niya sia gikan sa
pagbantay sang karnero
71sa diin iya gintatap ang mga panong,
Ginhimo niya sia nga hari sang Israel,
nga manugbantay sang mga tawo sang Dios.
72Si David nag-atipan sa ila sa bug-os nga katutom
kag nagtuytoy sa ila nga may pagkasampaton.
Currently Selected:
Mga Salmo 78: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
