Mga Taga-Filipos 1
1
1Ako#Bin. 16:12. si Pablo kag si Timoteo, mga alagad ni Cristo Jesus, nagasulat sa tanan nga mga tumoluo nga yara sa Filipos nga nahiusa kay Cristo Jesus, kag sa mga pangulo kag mga manugbulig sang iglesia.
2Kabay nga ang Dios nga aton Amay kag si Ginoong Jesu-Cristo maghatag sa inyo sing pagpakamaayo kag paghidait.
Ang Pangamuyo ni Pablo para sa mga Tumoluo sa Filipos
3Nagapasalamat ako sa akon Dios tungod sa inyo sa tagsa ka tion nga madumdoman ko kamo. 4Sa tagsa ka tion nga nagapangamuyo ako para sa inyo tanan, nagapangamuyo ako nga may kalipay, 5tungod sang inyo pagbulig sa akon sa pagpalapnag sang Maayong Balita, halin sang nahauna gid nga adlaw tubtob karon. 6Pat-od gid ako nga ang Dios nga nagsugod sining maayong buhat sa inyo, magapadayon tubtob mahimpit ini sa Adlaw ni Cristo Jesus. 7Yara kamo sa gihapon sa akon tagipusoon! Gani may kinamatarong ako sa pagbatyag sini tungod sa inyo. Kay kamo tanan nakapakig-ambit upod sa akon sa sining kahigayunan nga ginhatag sang Dios sa akon, bisan karon nga yari ako sa bilangguan, kag subong man sang hilway ako sa pag-apin kag pagpamatuod sang Maayong Balita. 8Ang Dios nakahibalo nga nagasugid ako sing matuod, sa akon pagsiling nga ang akon handom sa pagpakigkita sa inyo tanan nagahalin gid sa tagipusoon ni Cristo Jesus mismo.
9Amo ini ang akon pangamuyo para sa inyo nga ang inyo gugma magtubo nga magtubo nga naupdan sang matuod nga kaalam kag himpit nga paghangop, 10agod nga sarang kamo makapili sang labing maayo. Gani manginputli kamo nga wala sing kasawayan sa Adlaw ni Cristo. 11Ang inyo kabuhi magapatubas sing maayo gid nga mga buhat nga mahimo lamang ni Jesu-Cristo, para sa kadungganan kag kadayawan sang Dios.
Ang Pagkabuhi amo si Cristo
12Mga utod, luyag ko mahibal-an ninyo nga ang mga butang nga nahanabo sa akon nakabulig gid sa pagpalapnag sang Maayong Balita. 13Tungod#Bin. 28:30. sini, ang tanan nga mga gwardya sa palasyo kag ang tanan nga yari diri nakahibalo nga ginbilanggo ako tungod kay alagad ako ni Cristo. 14Kag ang pagbilanggo sa akon naghatag sa kalabanan sang mga kautoran sing dugang nga pagsalig sa Ginoo, sa bagay nga nagmaisog pa gid sila sa gihapon sa pagwali sang mensahe sang Dios#1:14 mensahe sang Dios: Ang iban nga mga manuskrito maymensahe. nga wala sing kahadlok.
15Matuod nga ang iban sa ila nagawali nahanungod kay Cristo tungod kay nahisa sila kag nagapaindis-indis, pero ang iban nagawali nahanungod sa iya gikan sa maayo nga kabubot-on. 16Ginahimo nila ini tungod sa gugma, tungod kay nakahibalo sila nga ginhatag sang Dios sa akon ang bulohaton sa pag-apin sang Maayong Balita. 17Ang iban indi sinsero sa ila pagwali kay Cristo, kundi tungod sang ila maiyaiyahon nga tinutuyo. Nagahunahuna sila nga madugangan nila ang akon pag-antos samtang yara ako sa bilangguan.
18Wala ini kaso para sa akon! Nagakalipay ako tungod sini—basta mawali lang si Cristo, bisan sa sayop ukon husto nga mga tinutuyo. Kag magapadayon ako sa pagkalipay, 19tungod kay nahibaluan ko nga paagi sa inyo mga pangamuyo kag sa pagbulig sang Espiritu ni Jesu-Cristo pagahilwayon ako. 20Kay daku gid ang akon handom kag paglaom nga indi gid ako mahuy-an, pero sa tanan nga tion labi na gid karon, magmaisog ako, agod nga sa akon bug-os nga kaugalingon mapasidunggan ko si Cristo, bisan mabuhi ako ukon mapatay. 21Kay ano bala ang kabuhi? Para sa akon ang pagkabuhi amo si Cristo, kag ang kamatayon nagadala sing daku pa nga kaayuhan. 22Pero kon sa akon pagkabuhi makahimo pa ako sing mga kaayuhan sa akon pag-alagad, ti indi ako makahibalo kon ano ang akon pilion. 23Nabutang ako sa tungatunga. Luyag ko na kuntani nga magtaliwan sa sini nga kabuhi kag magpakig-upod kay Cristo, kay amo ini ang labing maayo. 24Ugaling tungod sa inyo, labi pa ka kinahanglanon nga magkabuhi ako. 25Napat-od ko gid ini kag nahibal-an ko nga magapabilin pa ako diri. Magapabilin ako upod sa inyo tanan sa pagbulig sa inyo kauswagan kag magpahalipay sa inyo pagtuo. 26Gani kon manginkaupod ninyo ako liwat, may rason pa gid kamo sa pagpabugal sa akon, sa inyo pagkabuhi nga nahiusa kay Cristo Jesus.
27Karon ang importante nga butang amo nga dapat magginawi kamo suno sa ginasugo sang Maayong Balita ni Cristo, agod nga bisan makabisita ako sa inyo ukon indi, mabatian ko nga malig-on kamo nga may isa lamang ka tinutuyo kag nagabuyloganay sa pagpanikasog sa isa lamang ka handom agod ang iban magtuo sa Maayong Balita. 28Indi kamo magkahadlok sa inyo mga kaaway, magpakaisog kamo sa gihapon, kay amo ini ang magapamatuod sa ila nga sila malutos kag kamo magadaog, tungod kay ang Dios amo ang magapadaog sa inyo. 29Kay ginhatagan kamo sing kahigayunan sa pag-alagad kay Cristo, indi lamang sa pagtuo sa iya, kundi man sa pag-antos tungod sa iya. 30Karon#Bin. 16:19-40. makapakig-away kamo upod sa akon. Amo man ini nga pagpakig-away ang inyo nakita sa akon sang una, kag amo man ini gihapon ang akon pagpakig-away, subong sang inyo nabatian.
Currently Selected:
Mga Taga-Filipos 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
