Filemon 1
1
1Ako si Pablo, isa ka binilanggo tungod kay Cristo Jesus, kag si Timoteo nga aton utod nagasulat sa amon abyan kag masigkamanugpangabudlay nga si Filemon, 2kag#Col. 4:17. sa iglesia nga nagatipon sa imo balay, kag sa kay Apia nga amon utod nga babayi kag sa kay Arquipo nga pareho namon nga soldado:
3Kabay nga ang Dios nga aton Amay kag si Ginoong Jesu-Cristo maghatag sa inyo sing pagpakamaayo kag paghidait.
Ang Paghigugma kag Pagtuo ni Filemon
4Sa tagsa ko ka pagpangamuyo, utod Filemon, ginasambit ko ikaw kag bangod sa imo nagapasalamat ako sa akon Dios. 5Kay nakabati ako nahanungod sang imo paghigugma sa tanan nga mga tumoluo kag sang imo pagtuo kay Ginoong Jesus. 6Nagapangamuyo ako nga ang amon paghiusa sa imo subong tumoluo magadala sa aton sing isa ka madalom nga paghangop sang tanan nga mga kaayuhan nga aton naangkon sa aton pagkabuhi kay Cristo. 7Hinigugma ko nga utod, ang imo gugma naglipay gid sa akon sing daku kag nagpaisog sa akon! Imo ginlipay ang mga tagipusoon sang tanan nga mga tumoluo.
Isa ka Pangabay tungod kay Onesimo
8Tungod sini makapangisog kuntani ako, subong imo utod kay Cristo, sa pagsugo sa imo sang dapat mo himuon. 9Pero sa baylo sini, nagapangabay ako sa imo tungod sa gugma. Ginahimo ko ini bisan pa nga ako si Pablo, embahador ni Cristo Jesus, kag isa man karon ka binilanggo tungod sa iya.#1:9 embahador ni Cristo…tungod sa iya: ukonisa ka tigulang kag sa karon binilanggo tungod kay Cristo Jesus. 10Gani#Col. 4:9. nagapangabay ako sa imo tungod kay Onesimo#1:10 Ang Griego nga ngalan Onesimo nagakahulogan “mapuslanon”. nga akon gid anak kay Cristo. Kay samtang yara ako sa bilangguan, nangin-espirituhanon niya ako nga amay. 11Sang una anay indi mo sia mapuslan, pero karon mapuslanon na sia sa imo kag sa akon man.
12Ginapabalik ko sia karon sa imo kag ang akon tagipusoon nagaupod sa iya. 13Luyag ko kuntani nga hawiran sia diri upod sa akon, samtang ginabilanggo ako tungod sang Maayong Balita, agod nga makabulig sia sa akon subong nga tal-os mo. 14Pero indi ako luyag magpilit sa imo sa pagbulig sa akon, kundi luyag ko kuntani nga imo ina himuon sa imo kaugalingon nga kabubot-on. Gani indi ako maghimo sang bisan ano kon indi ka magsugot.
15Ayhan nagpalayo sa imo si Onesimo sa malip-ot nga tion agod nga magbalik sia sa imo sing dayon. 16Kag karon indi lang sia isa ka ulipon, kundi labaw pa sang sa isa ka ulipon: isa na sia ka hinigugma nga utod kay Cristo. Daw ano ang akon pagpakamahal sa iya! Kag daw ano pa gid ang imo pagpakamahal sa iya, subong isa ka ulipon kag isa ka utod sa Ginoo!
17Gani, kon ginakabig mo ako subong imo kaupod sa pagpangabudlay para sa Ginoo, batuna sia liwat subong sang imo pagbaton sa akon. 18Kon nakasayop ukon nakautang sia sa imo sang bisan ano, isipa ina nga utang ko. 19Ako gid ang nagasulat sini: Ako, si Pablo, magabayad sa imo. Indi na kinahanglan nga pahanumdomon ko pa ikaw, nga utang mo sa akon ang imo gid kabuhi. 20Gani, utod ko, himua man ini para sa akon tungod sa Ginoo. Lipaya man ako subong isa ka utod kay Cristo.
21Ginasulat ko ini sa imo kay nakahibalo ako nga imo gid tumanon ang akon ginapangayo kag sobra pa sini ang himuon mo. 22Subong man, handai ako sing dalayunan, tungod kay nagalaom ako nga ang Dios magasabat sang inyo mga pangamuyo kag iya ako ipabalik sa inyo.
Katapusan nga mga Pag-abiabi
23Si#Col. 1:7; 4:12. Epafras nga ginbilanggo upod sa akon tungod kay Cristo Jesus, nagapadala sang iya mga pag-abiabi sa imo, 24kag#Bin. 12:12, 25; 13:13; 15:37-39; Col. 4:10; Bin. 19:29; 27:2; Col. 4:10; Col. 4:14; 2 Tim. 4:10; Col. 4:14; 2 Tim. 4:11. amo man ang akon mga masigkamanugpangabudlay nga si Marcos, Aristarco, Demas kag si Lucas.
25Kabay nga ang pagpakamaayo sang aton Ginoong Jesu-Cristo manginyara sa inyo tanan.
Currently Selected:
Filemon 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
