Tito 3
3
Ang Cristohanon nga Pagginawi
1Pahanumdoma ang mga tumoluo nga magpasakop sila sa gubyerno kag sa mga awtoridad, nga magtuman sila sa ila, kag handa sa paghimo sang tagsa ka maayo nga buhat. 2Tudloi sila nga indi sila magpakamalaut sa bisan kay sin-o, kundi nga magmahidaiton sila kag mainabyanon, kag magmalulo sa gihapon sa tanan nga mga tawo. 3Kay sang una anay, mga buangbuang kita, di-matinumanon kag nagtalang. Mga ulipon kita sang mga kailigbon kag sang tanan nga sahi sang pagpangalipay. Nagkabuhi anay kita sa kalautan kag kahisa. Gindumtan kita sang iban kag kita man nagdumot sa ila. 4Pero sang ginpahayag sang Dios nga aton Manluluwas ang iya kaayo kag gugma, 5iya kita ginluwas. Indi tungod sang maayo nga mga buhat nga aton ginhimo, kundi tungod sang iya kaluoy ginluwas niya kita paagi sa Espiritu Santo nga nagahatag sa aton sang bag-o nga pagkatawo kag bag-o nga kabuhi paagi sa paghugas sa aton. 6Kay ginhatag sang Dios sa aton sing bugana ang Espiritu Santo, paagi kay Jesu-Cristo nga aton Manluluwas, 7agod nga paagi sa iya kaayo mabaton kita sang Dios, kag makaangkon sang kabuhi nga wala sing katapusan nga aton ginalauman. 8Matuod ini nga mga pulong.
Luyag ko nga itudlo mo gid ini nga mga butang sing matul-id, agod nga ang mga nagatuo sa Dios maghimulat sa paghimo sing maayo nga mga buhat. Maayo ini kag mapuslanon para sa mga tawo. 9Pero likawi ang wala sing pulos nga mga pagsinuay, ang malawig nga mga lista sang mga katigulangan, ang mga pagbinaisay, kag mga pag-ilinaway nahanungod sa Kasugoan. Ina sila wala sing pulos kag wala ka sing maayo nga makuha. 10Sa tapos mo mapaandaman sing makaisa ukon makaduha ang tawo nga nagatuga sang pagbinahinbahin, pabay-i na lang sia. 11Kay imo nahibaluan nga ina nga tawo malaut, kag ang iya mga sala nagapamatuod nga sayop gid sia.
Katapusan nga mga Laygay
12Kon#Bin. 20:4; Efe. 6:21-22; Col. 4:7-8; 2 Tim. 4:12. mapadala ko sa imo si Artemas ukon si Tiquico, tinguhaon mo nga makapakigkita ka sa akon sa Nicopolis, tungod kay nagpamat-od ako nga mapabilin didto sa tion sang tigtulognaw. 13Tinguhai#Bin. 18:24; 1 Cor. 16:12. gid ang pagbulig kay Zenas nga abogado kag kay Apolos nga makalakat sila, kag tan-awa nga wala sing may makulang sa ila kinahanglanon. 14Tudloi ang aton mga kautoran sa paghimo sing maayo nga mga buhat, agod nga masakdag nila ang ila mga kinahanglanon. Indi sila dapat magkabuhi nga wala sing pulos.
15Ang tanan nga kaupod ko nagaabiabi sa imo. Abiabiha man para sa amon ang aton mga abyan sa pagtuo.
Ang pagpakamaayo sang Dios manginyara sa inyo tanan.
Currently Selected:
Tito 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
