Numeros 7
7
Ang mga Halad sang mga Pangulo
1Sang adlaw nga natapos ni Moises ang pagpatindog sang Tolda sang presensya sang Ginoo, ginhaplas kag ginhalad niya ang Tolda kag ang tanan nga mga gamit sini, subong man ang altar kag ang tanan nga mga gamit sini. 2Dayon ang mga pangulo sang mga kabarangayan nga nagadumala sang mga tribo sang Israel, nga amo man ang gintugyanan sang pagpangsenso, 3nagdala sang ila mga halad sa Ginoo: anom ka mga karo nga natabunan kag dose ka mga baka nga toro, isa ka karo para sa tagsa ka duha ka pangulo, kag isa ka baka nga toro para sa tagsa ka pangulo. Sa tapos nila mahalad ini, 4ang Ginoo nagsiling kay Moises, 5“Batuna ini nga mga dulot agod gamiton sa obra nga pagahimuon sa Tolda, ihatag ini sa mga Levita, suno sa obra nga ila pagahimuon.” 6Gani ginhatag ni Moises ang mga karo kag ang mga baka sa mga Levita. 7Ginhatagan niya sing duha ka mga karo kag apat ka mga baka ang mga Gersonhon, 8kag apat ka mga karo kag walo ka mga toro nga baka ang mga Merarinhon. Ang tanan nila nga mga obra pagahimuon sa idalom sang pagdumala ni Itamar nga anak ni Aaron. 9Pero wala paghatagi ni Moises sing mga karo ukon mga baka nga toro ang mga Kohatnon, tungod kay ang balaan nga mga butang nga ila pagadal-on pagapas-anon nila.
10Ang mga pangulo nagdala man sing mga halad sa pagsaulog sang paghalad sang altar. Sang handa na sila sa paghalad sang ila mga dulot sa altar, 11ang Ginoo nagsiling kay Moises, “Singgana sila nga sa tagsa ka adlaw sa sulod sang dose ka adlaw ang isa sang mga pangulo maghalad sang iya mga dulot para sa paghalad sang altar.”
12-83Naghalad sila sang ila mga dulot sa sini nga pagpalaagisod:
| Adlaw | Tribo | Pangulo |
|---|---|---|
| Nahauna | Juda | Naason, anak ni Aminadab |
| Ikaduha | Isacar | Netanel, anak ni Zuar |
| Ikatlo | Zabulon | Eliab, anak ni Helon |
| Ikap-at | Ruben | Elizur, anak ni Sedeur |
| Ikalima | Simeon | Selumiel, anak ni Zurisadai |
| Ikan-om | Gad | Eliasaf, anak ni Deuel |
| Ikapito | Efraim | Elisama, anak ni Amiud |
| Ikawalo | Manases | Gamaliel, anak ni Pedazur |
| Ikasiyam | Benjamin | Abidan, anak ni Gideoni |
| Ika-10 | Dan | Ahiezer, anak ni Amisadai |
| Ika-11 | Aser | Pagiel, anak ni Ocran |
| Ika-12 | Neftali | Ahira, anak ni Enan |
Ang mga dulot nga gindala sang tagsatagsa palareho: isa ka bilog nga yahong nga pilak nga nagabug-at sing singkwenta ka onsas kag isa ka bilog nga labador nga pilak nga nagabug-at sing traynta ka onsas, suno sa opisyal nga talaksan. Ini sila puno sing pinili nga harina nga nasamuan sing lana para sa mga halad nga kalan-on; isa ka bilog nga pinggan nga bulawan nga nagabug-at sing apat ka onsas, nga puno sing insyenso; isa ka baka nga torite, isa ka karnero nga lalaki, kag isa ka kordero nga lalaki nga nagaedad sing isa ka tuig, para sa halad nga sinunog; isa ka kanding para sa halad tungod sa sala; duha ka toro nga mga baka, lima ka mga karnero nga lalaki, lima ka mga kanding, kag lima ka mga kordero nga lalaki nga nagaedad sing tag-isa ka tuig para sa halad sa paghiambit.
84-88Ang kadamuon sang mga dulot nga gindala sang dose ka bilog nga mga pangulo para sa paghalad sang altar amo ang masunod:
— dose ka bilog nga mga yahong nga pilak kag dose ka bilog nga mga labador nga pilak nga ang bug-os nila nga kabug-aton sesenta ka libra.
— dose ka bilog nga mga pinggan nga bulawan nga ang bug-os nila nga kabug-aton kwarentay otso ka onsas, nga puno sing insyenso.
— dose ka mga baka nga toro, dose ka mga karnero nga lalaki, kag dose ka mga kordero nga lalaki nga nagaedad sing isa ka tuig, lakip ang mga halad nga kalan-on nga nagaupod sini, para sa mga halad nga sinunog.
— dose ka mga kanding para sa mga halad tungod sa sala.
— baynte kwatro ka mga baka nga toro, sesenta ka mga karnero nga lalaki, sesenta ka mga kanding, sesenta ka mga kordero nga lalaki nga nagaedad sing tag-isa ka tuig, para sa mga halad sa paghiambit.
89Sang pagsulod ni Moises sa Tolda sa pagpakighambal sa Ginoo, nabatian niya ang Ginoo nga nagahambal sa iya halin sa ibabaw sang takop sang Kaban sang Kasugtanan, sa gintung-an sang duha ka mga kerubin.#7:89 MGA KERUBIN: Tan-awa ang Lista sang mga Pulong.
Currently Selected:
Numeros 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
