Numeros 6
6
Ang mga Pagsulondan para sa mga Nazareo
1Ang Ginoo nagmando kay Moises: 2“Ihatag ang masunod nga mga pagsulondan sa mga tawo sang Israel: Ang bisan sin-o nga lalaki ukon babayi nga maghimo sang pinasahi nga panaad nga mangin-isa ka Nazareo kag maghalad sang iya kaugalingon sa Ginoo, 3maglikaw#Luc. 1:15. sia sa bino kag makahulobog nga ilimnon. Indi sia mag-inom sang bisan ano nga sahi sang ilimnon nga naghalin sa ubas ukon magkaon sang ubas ukon pasas. 4Samtang sia isa pa ka Nazareo, indi sia magkaon sang bisan ano nga naghalin sa balagon sang ubas, bisan gani sang mga binhi ukon panit sang ubas.
5“Samtang yara sia sa idalom sang panaad sang pagka-Nazareo, indi niya pagpaguntingan ang iya buhok ukon magpamarbas. Dapat gid niya tumanon ang iya saad sa bug-os nga panahon nga nahalad sia sa Ginoo kag patuboon niya ang iya buhok kag bungot. 6-7Ang iya buhok amo ang tanda sang paghalad sang iya kaugalingon sa Dios, kag gani indi niya pagdagtaan ang iya kaugalingon paagi sa pagpalapit sa isa ka bangkay, bisan gani ang bangkay sang iya amay, iloy, utod nga lalaki, ukon utod nga babayi. 8Samtang isa sia ka Nazareo, nahalad sia sa Ginoo.
9“Kon ang nahalad nga buhok sang isa ka Nazareo nadagtaan tungod kay yara gid sia sa tupad sang isa nga napatay sing hinali lang, kinahanglan maghulat sia sing pito ka adlaw kag dayon kiskisan niya ang iya ulo kag magpamarbas, dayon manginmantinlo sia. 10Sa ikawalo nga adlaw magadala sia sing duha ka mga pating ukon duha ka mga tukmo sa pari sa pwertahan sang Tolda sang presensya sang Ginoo. 11Ang pari magahalad sang isa subong halad tungod sa sala kag ang isa subong halad nga sinunog, sa pagtuman sang bulohaton sa pagpaninlo para sa iya tungod sang iya pagtandog sa isa ka patay. Sa amo man nga adlaw ang tawo magahalad liwat sang iya buhok. 12Ihalad man niya liwat ang iya panahon sa Ginoo subong isa ka Nazareo. Ang nagligad nga panahon wala sing pulos, tungod kay nadagtaan ang iya nahalad nga buhok. Subong isa ka dulot nga bayad, magadala sia sing kordero nga nagaedad sing isa ka tuig.
13“Kon#Bin. 21:23-24. ang isa ka Nazareo makatapos na sa iya panaad, himuon niya ini nga tulomanon. Magakadto sia sa pwertahan sang Tolda 14kag magahalad sia sa Ginoo sing tatlo ka mga sapat nga wala sing bisan ano nga depekto: isa ka kordero nga lalaki nga nagaedad sing isa ka tuig para sa halad nga sinunog, isa ka kordero nga babayi nga nagaedad sing isa ka tuig para sa halad tungod sa sala, kag isa ka karnero nga lalaki para sa halad sa paghiambit. 15Magahalad man sia sing isa ka alat nga tinapay nga naluto nga wala sing lebadora: madamol nga binilog sang tinapay nga nahimo sa pinili nga harina kag nasamuan sing lana sang olivo, kag manipis nga mga tinapay nga nahibuan sing lana sang olivo, lakip ang kinahanglanon nga mga halad nga kalan-on kag ilimnon.
16“Ang pari magahalad sini tanan sa Ginoo kag magadulot sang halad tungod sa sala kag sang halad nga sinunog. 17Ihalad niya sa Ginoo ang karnero nga lalaki subong isa ka halad sa paghiambit, lakip ang isa ka alat nga tinapay, kag magadulot man sia sang mga halad nga kalan-on kag ilimnon. 18Sa pwertahan sang Tolda, ang Nazareo magakiskis sang iya ulo kag magabutang sang iya buhok sa kalayo sa diin ginasunog ang halad sa paghiambit.
19“Dayon kon malaga na ang abaga sang karnero nga lalaki, ang pari magakuha sini kag ibutang sa mga kamot sang Nazareo, lakip ang isa ka bilog nga tinapay nga madamol, kag isa ka bilog nga tinapay nga manipis halin sa alat. 20Dayon ang pari magadulot sini subong isa ka pinasahi nga halad sa akon; balaan ini nga dulot para sa pari, wala labot sang dughan kag sang paa sang karnero nga lalaki nga suno sa kasugoan iya sang pari. Sa tapos sini, ang Nazareo sarang makainom sing bino.
21“Amo ini ang mga pagsulondan para sa mga Nazareo. Pero kon ang isa ka Nazareo magsaad sa paghatag sing halad nga labaw pa sang sa ginakinahanglan sa iya ginsaad, iya gid tumanon ang suno sa iya panaad.”
Ang Pagpakamaayo sang mga Pari
22Ang Ginoo nagsugo kay Moises, 23“Singgana si Aaron kag ang iya mga anak nga lalaki sa paggamit sang masunod nga mga pulong sa pagpakamaayo sang mga tawo sang Israel:
24Kabay ang Ginoo magpakamaayo sa inyo kag magtatap sa inyo,
25kabay ang Ginoo magmaluloy-on kag magmaalwan sa inyo,
26kabay ang Ginoo magmaayo sa inyo kag maghatag sa inyo sing paghidait.”
27Kag ang Ginoo nagsiling, “Kon gamiton nila ang akon ngalan sa pagpakamaayo sang mga tawo sang Israel, pagapakamaayuhon ko sila.”
Currently Selected:
Numeros 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
