Numeros 8
8
Ang Pagbutang sang mga Suga
1Ang#Exo. 25:31-40; 37:17-24. Ginoo nagsiling kay Moises, 2“Singgana si Aaron nga kon magpamutang sia sang pito ka mga suga sa mga kandelirohan, ipahamtang niya ini agod ang sanag sang mga suga magasilak sa atubangan.” 3Gintuman ini ni Aaron kag ginpahamtang niya ang mga suga nga nagaatubang sa kandelirohan. 4Ini nga kandelirohan halin sa ibabaw paidalom nahimo sa sinalsal nga bulawan, suno sa sulondan nga ginpakita sang Ginoo kay Moises.
Ang Pagpaninlo kag Paghalad sang mga Levita
5Ang Ginoo nagsiling kay Moises, 6“Paina ang mga Levita sa iban nga mga tawo sang Israel, kag tinloi sila 7sa sining masunod nga paagi: wisiki sila sang tubig nga ginagamit sa pagpaninlo kag pakiskisi sa ila ang ila bug-os nga lawas, kag palabhi sa ila ang ila mga bayu. Dayon manginmatinlo sila. 8Dayon magakuha sila sang isa ka torite nga baka kag ang ginakinahanglan nga halad nga kalan-on nga nahimo sa pinili nga harina nga nasamuan sing lana sang olivo, kag magakuha ka sing isa pa ka torite nga baka para sa halad tungod sa sala. 9Dayon tipuna ang bug-os nga katilingban sang Israel kag ihalad mo ang mga Levita sa atubangan sang Tolda sang akon presensya. 10Ang mga tawo sang Israel magabutang sang ila mga kamot sa mga ulo sang mga Levita, 11kag dayon si Aaron magahalad sang mga Levita sa akon subong isa ka pinasahi nga dulot halin sa mga Israelinhon, agod nga makaalagad sila sa akon. 12Dayon ang mga Levita magabutang sang ila mga kamot sa mga ulo sang duha ka torite nga mga baka; ang isa ihalad subong halad tungod sa sala kag ang isa subong halad nga sinunog, agod mahimo ang tulomanon sang pagpaninlo para sa mga Levita.
13“Ihalad ang mga Levita subong isa ka pinasahi nga dulot sa akon, kag itugyan mo kay Aaron kag sa iya mga anak nga lalaki ang pagdumala sa ila. 14Sa sini nga paagi paina ang mga Levita sa iban nga mga Israelinhon, agod nga sila mangin-akon. 15Sa tapos mo matinluan kag mahalad ang mga Levita, mangintakos na sila sa pag-alagad sa Tolda. 16Gin-angkon ko sila sa baylo sang tanan nga mga panganay nga mga anak nga lalaki sang mga Israelinhon kag sila mangin-akon lamang. 17Sang#Exo. 13:2. pagpamatay ko sang tanan nga mga panganay sang Ehipto, ginpakabalaan ko agod mangin-akon kaugalingon ang panganay nga anak nga lalaki sang tagsa ka panimalay nga Israelinhon kag ang panganay sang tagsa ka sapat. 18Karon ginakuha ko ang mga Levita sa baylo sang tanan nga mga panganay sang mga Israelinhon, 19kag ginatugyan ko ang mga Levita sa kay Aaron kag sa iya mga anak, subong isa ka pinasahi nga dulot halin sa mga Israelinhon, sa pag-alagad sa Tolda para sa mga tawo sang Israel kag sa pag-amlig sa mga Israelinhon gikan sa kalalat-an nga magaabot sa ila kon magpalapit gid sila sa Balaan nga Duog.”
20Gani si Moises, si Aaron, kag ang tanan nga mga tawo sang Israel naghalad sang mga Levita, suno sa ginsugo sang Ginoo kay Moises. 21Ang mga Levita nagpaninlo sang ila kaugalingon kag naglaba sang ila mga bayu, kag ginhalad sila ni Aaron subong isa ka pinasahi nga dulot sa Ginoo. Iya man ginhimo ang tulomanon sang pagpaninlo para sa ila. 22Ang mga tawo nagtuman sang tanan nga ginsugo sang Ginoo kay Moises nahanungod sa mga Levita. Gani, ang mga Levita nangintakos sa pag-alagad sa Tolda sa idalom sang pagdumala ni Aaron kag sang iya mga anak.
23Ang Ginoo nagsiling kay Moises: 24“Ang tagsa ka Levita, halin sa nagaedad sing baynte singko ka tuig magatuman sang iya mga katungdanan sa Tolda sang akon presensya, 25kag sa iya pag-edad sing singkwenta ka tuig magapahuway sia. 26Sa tapos sini, sarang sia makabulig sa iya kapareho nga mga Levita sa paghimo sang ila mga katungdanan sa Tolda, pero indi sia dapat maghimo sang bisan ano nga pag-alagdan sa iya lamang kaugalingon. Amo ini ang imo pagpatuman sang mga katungdanan sang mga Levita.”
Currently Selected:
Numeros 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
