Numeros 5
5
Di-matinlo nga mga Tawo
1Ang Ginoo nagsiling kay Moises: 2“Mandui ang mga tawo sang Israel sa pagpagwa sa kampo sang tagsatagsa nga may makalalaton nga balatian sa panit ukon ginapanggwaan sa iya lawas, kag ang tagsatagsa nga nangindi-matinlo tungod sang iya pagtandog sa isa ka bangkay. 3Pagwaa ang tanan nga di-matinlo nga mga tawo, agod nga indi nila madagtaan ang kampo, sa diin nagaestar ako upod sa akon mga tawo.” 4Ang mga Israelinhon nagtuman kag ginpagwa nila sila tanan sa kampo.
Kabayaran tungod sang Nahimo nga mga Sala
5Ang#Lev. 6:1-7. Ginoo naghatag kay Moises 6sang masunod nga mga pagsulondan para sa mga tawo sang Israel: “Ang bisan sin-o nga maglapas sa Ginoo kag maghimo sing sayop batok sa iban, 7kinahanglan ituad niya ang iya sala kag bayaran niya sing bug-os ang tawo nga nahimuan niya sing sayop, kag magadugang sia sing baynte porsiento. 8Pero kon ang tawo nga nahimuan sing sala patay na kag wala sing malapit nga pariente nga sarang mabayaran, ihatag ini sa Ginoo para sa pari. Ini nga bayad wala labot sa karnero nga lalaki nga gingamit nga halad para sa pagpaninlo sang tawo nga nakasala. 9Ang tagsa man ka pinasahi nga dulot nga ginahalad sang mga Israelinhon sa Ginoo iya sang pari nga ila ginatugyanan sini. 10Ang tagsa ka pari magakuha sang mga dulot nga ginatugyan sa iya.”
Mga Kaso sang mga Asawa nga Ginaduhaduhaan sang mga Bana
11Ang Ginoo nagsugo kay Moises: 12-14“Ihambal sa mga Israelinhon ang masunod nga mga pagsulondan. Kon ang isa ka lalaki magpangduhaduha nga ang iya asawa nagaluib sa iya, kag nagdagta sang iya kaugalingon paagi sa pagpakighilawas sa iban nga lalaki, pero wala man ini mapat-od sang bana, tungod kay ginalikom man ini sang iya asawa; wala man sing makasaksi, kag wala sia madakpi sa akto; ukon abi ang bana nagpangduhaduha sa iya asawa, bisan ang iya asawa wala magluib sa iya, 15sa bisan ano nga kahimtangan, ang lalaki magadala sang iya asawa sa pari. Magadala man sia sang kinahanglanon nga halad, duha ka libra sang harina nga sebada, pero indi niya ini pagbuboan sing lana sang olivo ukon butangan ini sing insyenso, tungod kay isa ini ka halad tungod sa pagpangduhaduha sang bana kag ini ginadulot agod sa pagpagwa sang matuod.
16“Ang pari magadala sang babayi kag patindugon sia sa atubangan sang altar. 17Buboan niya sing balaan nga tubig ang yahong nga nahimo sa lunang, kag magakuha sia sing yab-ok nga yara sa salog sang Tolda sang akon presensya kag ibutang ini sa tubig agod magpait ini. 18Dayon bunghayon sang pari ang buhok sang babayi kag ibutang niya ang halad nga harina sa mga kamot sang babayi. Ang pari magauyat sang yahong nga may unod nga mapait nga tubig nga nagadala sang pagpakamalaut. 19Dayon himuon sang pari nga magsugot ang babayi sa panumpa nga ihambal sang pari: ‘Kon wala ikaw makapakighilawas sa iban nga lalaki, indi ikaw mahalitan sang pagkamalaut nga ginadala sini nga tubig. 20Pero kon nakapakighilawas ikaw sa iban nga lalaki, 21kabay nga himuon sang Ginoo ang imo ngalan nga pagpakamalaut sa tunga sang imo mga kasimanwa. Kabay nga iya pakupuson ang imo kinatawo kag pahabukon ang imo tiyan. 22Kabay ini nga tubig magsulod sa imo tiyan kag magapahabok sang imo tiyan kag magapakupos sang imo kinatawo.’ Ang babayi magasabat, ‘Nagasugot ako, kabay nga himuon ini sang Ginoo.’
23“Dayon isulat sang pari ini nga pagpakamalaut kag hugasan niya ang sinulat sa yahong nga may mapait nga tubig. 24Sa wala pa niya mapainom ang babayi sang tubig, nga ayhan manginkabangdanan sang iya mapait nga kasakitan, 25ang pari magakuha sang halad nga harina sa mga kamot sang babayi, uyatan niya ini agod ihalad sa Ginoo, kag ihalad ini sa altar. 26Dayon magakuha sia sing isa ka hakop sini subong isa ka handumanan nga dulot kag sunogon ini sa altar. Sa katapusan ipainom niya ang tubig sa babayi. 27Kon nakapakighilawas sia sa iban nga lalaki, ang tubig magahatag sa iya sing mapait nga kasakitan kag ang iya tiyan magahabok kag ang iya kinatawo magakupos. Ang iya ngalan mangin-isa ka pagpakamalaut sa tunga sang iya mga kasimanwa. 28Pero kon wala sia sing sala, indi sia mahalitan, kag sarang sia makaanak sing mga kabataan.
29-30“Amo ini ang kasugoan kon ang isa ka lalaki nagapangimon kag nagapangduhaduha nga ang iya asawa nagapakighilawas sa iban nga lalaki. Ang babayi pagapatindugon sa atubangan sang altar, kag ang pari magahimo sini nga tulomanon. 31Ang bana manginhilway sa kalautan pero ang babayi, kon nakasala, kinahanglan mag-antos sang silot.”
Currently Selected:
Numeros 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
