Numeros 4
4
Ang mga Katungdanan sang mga Levinhon nga Barangay ni Kohat
1Ang Ginoo nagsugo kay Moises: 2“Isipa ang mga Levinhon nga barangay ni Kohat, suno sa magamay nga mga kabarangayan kag mga panimalay, 3kag sa paglista sang tanan nga mga lalaki nga nagaedad sing traynta tubtob sa singkwenta ka tuig, nga takos sa pag-alagad sa Tolda sang akon presensya. 4Ang ila pag-alagad may kaangtanan sa labing balaan nga mga butang.
5“Kon tion na sa paghalin sang kampo, si Aaron kag ang iya mga anak nga lalaki magasulod sa Tolda, magakuha sang kurtina sa atubangan sang Kaban sang Kasugtanan kag itabon nila ini sa Kaban. 6Ila ini taklapan sang mapino nga panit, taklapan sing panapton nga asol ang ibabaw sini, kag dayon ila igulo ang mga yayungan sa sini.
7“Dayon ihumlad ni Aaron kag sang iya mga anak nga lalaki ang isa ka asol nga panapton sa ibabaw sang lamisa para sa tinapay nga ginhalad sa akon kag ibutang sa sini ang mga pinggan, ang mga yahong para sa mga insyenso, ang mga yahong nga ginahalaran, kag ang mga tibod nga ginasudlan sang bino nga ginahalad. Kinahanglan bilinan pirme sang tinapay ang lamisa. 8Tabunan nila ini tanan sang pula nga panapton, taklapan nila sing isa ka mapino nga panit sa pagtabon sini, kag dayon igulo nila ang mga yayungan sa sini.
9“Magakuha sila sang isa ka asol nga panapton kag tabunan nila ang kandelirohan, lakip ang iya mga suga, mga inugpalong, ang mga bagahan, kag ang tanan nga mga sulodlan sang lana sang olivo. 10Putson nila ini kag ang tanan nga mga gamit sini sang isa ka mapino nga panit nga inugtabon kag ipakabit ini sa yayungan.
11“Dason taklapan nila sing isa ka panapton nga asol ang ibabaw sang altar nga bulawan, butangan nila sing isa ka mapino nga panit sa pagtabon sini, kag dayon igulo nila ang mga yayungan. 12Kuhaon nila ang tanan nga mga galamiton nga ginagamit sa Balaan nga Duog, putson nila ini sang isa ka asol nga panapton, butangan nila sing isa ka mapino nga panit sa pagtabon sini kag ipakabit nila ini sa yayungan. 13Kuhaon nila ang mga abo nga nabulit sang lana halin sa altar kag taklapan ini sang panapton nga granate. 14Ibutang nila sa sini ang tanan nga mga galamiton nga ginagamit sa pag-alagad sa altar: ang mga bagahan, ang mga kaw-it, ang mga pala, kag ang mga labador. Dayon taklapan nila ini sing mapino nga panit nga inugtabon kag igulo nila ang mga yayungan. 15Kon tion na sa paghalin sang kampo, ang barangay ni Kohat magapalapit sa pagdala sang balaan nga mga butang sa tapos lamang matabunan ini ni Aaron kag sang iya mga anak, lakip ang tanan nga mga kagamitan sini. Ang kabarangayan ni Kohat indi dapat magtandog sang balaan nga mga butang, kay kon tandugon nila mapatay sila.
“Amo ini ang mga katungdanan sang barangay ni Kohat sa tion nga halinon ang Tolda.
16“Si Eleazar nga anak ni Aaron nga pari amo ang pagatugyanan sang bug-os nga Tolda kag sang lana para sa mga suga, sang insyenso, sang mga halad nga kalan-on, sang lana nga inughaplas, kag sang tanan nga mga butang sa Tolda nga ginhalad sa akon.”
17Ang Ginoo nagsiling kay Moises kag kay Aaron: 18“Indi pagpabay-i nga ang barangay ni Kohat 19mapatay paagi sa pagpalapit sa sining labing balaan nga mga butang. Agod indi ini mahanabo, si Aaron kag ang iya mga anak magasulod kag magahatag sa tagsa ka tawo sang iya hilikuton kag singganan sia kon ano ang iya dalhon. 20Pero kon ang mga Kohatnon magsulod sa Tolda kag makita nila ang mga pari nga nagahanda sa paghalin sang balaan nga mga butang,#4:20 makita…balaan nga mga butang: ukonmakakita sang balaan nga mga butang bisan sa malip-ot nga tion. mapatay sila.”
Ang mga Katungdanan sang Levinhon nga Barangay ni Gerson
21Ang Ginoo nagsugo kay Moises: 22“Isipa ang mga Levinhon nga barangay ni Gerson suno sa ila magamay nga mga kabarangayan kag mga panimalay, 23kag sa paglista sang tanan nga mga lalaki nga nagaedad sing traynta tubtob sa singkwenta ka tuig nga takos sa pag-alagad sa Tolda sang akon presensya. 24Ang ila katungdanan amo ang pagdala sang masunod nga mga butang: 25ang Tolda, ang iya nasulod nga lipon, ang iya naggwa nga lipon, ang mapino nga panit nga nagatabon sa ibabaw sini, ang kurtina para sa pwertahan, 26ang mga kurtina kag mga kalat para sa pasiyuhan sa palibot sang Tolda kag sang altar, ang mga kurtina para sa pwertahan pakadto sa pasiyuhan, kag ang tanan nga mga banting nga ginagamit sa pagpatindog sini nga mga butang. Pagahimuon nila ang tanan nga mga tulomanon nga ginakinahanglan para sa sini nga mga butang. 27Pat-uron ninyo ni Aaron nga ang mga Gersonhon magtuman sang tanan nga mga katungdanan kag maghimo sang tanan nga ginasugo sa ila ni Aaron kag sang iya mga anak nga lalaki. 28Amo ini ang mga katungdanan sang barangay ni Gerson sa Tolda. Tumanon nila ini sa idalom sang pagdumala ni Itamar nga anak ni Aaron nga pari.”
Ang mga Katungdanan sang mga Levinhon nga Barangay ni Merari
29Ang Ginoo nagsugo kay Moises: “Isipa ang Levinhon nga barangay ni Merari suno sa ila magamay nga mga kabarangayan kag mga panimalay, 30kag sa paglista sang tanan nga mga lalaki nga nagaedad sing traynta tubtob sa singkwenta ka tuig nga takos sa pag-alagad sa Tolda sang akon presensya. 31Sila ang may katungdanan sa pagdala sang mga dingding, mga baral, mga haligi, mga sadsaran sang Tolda, 32kag sang mga haligi, mga sadsaran, mga palpal, kag mga kalat sang pasiyuhan sa palibot sang Tolda, lakip ang tanan nga mga banting nga ginagamit sa pagpatindog sini. Ang tagsa ka tawo may katungdanan sa pagdala sang butang nga gintugyan sa iya. 33Amo ini ang mga katungdanan sang barangay ni Merari sa ila pag-alagad sa Tolda. Tumanon nila ini sa idalom sang pagdumala ni Itamar nga anak ni Aaron nga pari.”
Ang Pagpangsenso sang mga Levita
34-48Sa pagtuman sang sugo sang Ginoo, sanday Moises, Aaron, kag ang mga pangulo sang katilingban nagpangsenso sang tatlo ka mga barangay nga Levinhon nanday Kohat, Gerson, kag Merari, suno sa ila magamay nga kabarangayan kag mga panimalay, kag ginlista nila ang tanan nga mga lalaki nga nagaedad sing traynta tubtob sa singkwenta ka tuig nga takos sa pag-alagad sa Tolda sang Presensya sang Ginoo. Ini amo ang masunod nga mga kabarangayan:
| Kabarangayan | Kadamuon |
|---|---|
| Kohat | 2,750 |
| Gerson | 2,630 |
| Merari | 3,200 |
| Kabug-osan: | 8,580 |
49Ang tagsa ka lalaki ginlista suno sa sugo sang Ginoo kay Moises, kag sa mando sang Ginoo paagi kay Moises. Ang tagsa ka lalaki ginhatagan sing katungdanan sa pag-alagad ukon sa pagdala sang mga palas-anon.
Currently Selected:
Numeros 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
