Numeros 29
29
Ang mga Halad sa Piesta sang Bag-o nga Tuig
(Lev. 23:23-25)
1“Sa nahauna nga adlaw sang ikapito nga bulan magtipon kamo sa pagsimba, kag indi kamo maghimo sang bisan ano nga obra. Sa amo nga adlaw patunogon ang mga trumpeta. 2Magdulot kamo sing halad nga sinunog sa akon, ang kahamot sini manginkahalamut-an sa akon: isa ka torite nga baka, isa ka karnero nga lalaki, kag pito ka mga kordero nga lalaki nga ang tagsatagsa isa ka tuig ang edad, nga wala sing bisan ano nga depekto. 3Magdulot man kamo sang nagakaigo nga halad nga kalan-on nga nahimo sa pinili nga harina nga nasamuan sing lana sang olivo: anom ka libra sang pinili nga harina upod sa torite nga baka, apat ka libra upod sa karnero nga lalaki, 4kag duha ka libra upod sa tagsa ka kordero. 5Magdulot pa gid kamo sing toro nga kanding subong isa ka halad tungod sa sala, kag sa sini nga paagi mahimo ninyo ang mga tulomanon sa pagpaninlo para sa mga tawo. 6Ihalad ninyo ini tanan lakip ang kinaandan nga halad nga sinunog para sa nahauna nga adlaw sang bulan upod ang iya mga halad nga kalan-on, kag ang adlaw-adlaw nga halad nga sinunog lakip ang iya halad nga kalan-on kag halad nga ilimnon. Ang kahamot sining mga halad nga kalan-on paagi sa kalayo manginkahalamut-an sa akon.
Ang mga Halad sa Adlaw sang Pagtubos
(Lev. 23:26-32)
7“Magtipon#Lev. 16:29-34. kamo sa pagsimba sa ika-10 nga adlaw sang ikapito nga bulan. Indi kamo magkaon ukon mag-obra. 8Magdulot kamo sing isa ka halad nga sinunog sa akon, ang kahamot sini manginkahalamut-an sa akon: isa ka torite nga baka, isa ka karnero nga lalaki, kag pito ka mga kordero nga lalaki nga ang tagsatagsa nagaedad sing isa ka tuig nga wala sing bisan ano nga depekto. 9Magdulot kamo sing nagakaigo nga halad nga kalan-on nga nahimo sa pinili nga harina nga nasamuan sing lana sang olivo: anom ka libra sang pinili nga harina upod sa torite nga baka, apat ka libra sang pinili nga harina upod sa karnero nga lalaki, 10kag duha ka libra sang pinili nga harina upod sa tagsa ka kordero. 11Magdulot man kamo sang isa ka kanding nga lalaki subong isa ka halad tungod sa sala, wala labot sang kanding nga ginahalad sa tulomanon sang pagpaninlo para sa mga tawo, kag ang adlaw-adlaw nga halad nga sinunog lakip ang halad nga kalan-on kag halad nga ilimnon.
Ang mga Halad sa Piesta sang mga Palasilungan
(Lev. 23:33-44)
12“Magtipon#Lev. 23:34; Deut. 16:13-15. kamo sa pagsimba sa ika-15 nga adlaw sang ikapito nga bulan. Sauloga ninyo ang piesta sa pagpasidungog sa akon sa sulod sang pito ka adlaw kag indi kamo mag-obra. 13Sa sining nahauna nga adlaw magdulot kamo sa akon sing halad nga kalan-on paagi sa kalayo. Ang kahamot sini manginkahamut-an sa akon: trese ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 14Magdulot kamo sang nagakaigo nga halad nga kalan-on nga nahimo sa pinili nga harina nga nasamuan sing lana sang olivo: anom ka libra sang pinili nga harina upod sa tagsa ka torite nga baka, apat ka libra upod sa tagsa ka karnero nga lalaki, 15kag duha ka libra upod sa tagsa ka kordero, lakip ang mga kinahanglanon nga mga halad nga ilimnon. 16Magdulot man kamo sing isa ka toro nga kanding subong isa ka halad tungod sa sala. Ihalad ninyo ini wala labot sa adlaw-adlaw nga halad nga sinunog lakip ang halad nga kalan-on kag halad nga ilimnon.
17“Sa ikaduha nga adlaw maghalad kamo sing dose ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 18-19Upod sini tanan magdulot kamo sang iban nga mga halad nga ginakinahanglan sa nahauna nga adlaw.
20“Sa ikatlo nga adlaw, maghalad kamo sing onse ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 21-22Upod sini tanan magdulot kamo sang iban nga mga halad nga ginakinahanglan sa nahauna nga adlaw.
23“Sa ikap-at nga adlaw, maghalad kamo sing napulo ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 24-25Upod sini tanan magdulot kamo sang iban nga mga halad nga ginakinahanglan sa nahauna nga adlaw.
26“Sa ikalima nga adlaw, maghalad kamo sing siyam ka torite nga mga baka, duha ka mga karnero nga lalaki kag katorse ka mga kordero nga lalaki nga ang tagsatagsa nagaedad sing isa ka tuig nga wala sing bisan ano nga depekto. 27-28Upod sini tanan magdulot kamo sang iban nga mga halad nga ginakinahanglan sa nahauna nga adlaw.
29“Sa ikan-om nga adlaw, maghalad kamo sing walo ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 30-31Upod sini tanan magdulot kamo sang iban nga mga halad nga ginakinahanglan sa nahauna nga adlaw.
32“Sa ikapito nga adlaw, maghalad kamo sing pito ka torite nga mga baka, duha ka mga karnero nga lalaki, kag katorse ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 33-34Upod sini tanan magdulot kamo sang iban nga mga halad nga ginakinahanglan sa nahauna nga adlaw.
35“Sa ikawalo nga adlaw, magtipon kamo sa pagsimba kag indi kamo mag-obra. 36Maghalad kamo sa akon sing isa ka halad nga sinunog subong isa ka halad nga kalan-on paagi sa kalayo. Ang kahamot sini manginkahalamut-an sa akon: isa ka torite nga baka, isa ka karnero nga lalaki, kag pito ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 37-38Upod sini tanan magdulot kamo sang iban nga mga halad nga ginakinahanglan sa nahauna nga adlaw.
39“Amo ini ang mga pagsulondan nahanungod sang mga halad nga sinunog, mga halad nga kalan-on, mga halad nga ilimnon, kag mga halad sa paghiambit nga inyo pagaihalad sa akon sa inyo natalana nga mga piesta. Wala labot ini sa mga halad nga inyo ginadulot sa pagtuman sang isa ka panaad ukon subong nga halad nga kinabubot-on.”
40Gani ginsugiran ni Moises ang mga tawo sang Israel sang tanan nga ginsugo sang Ginoo sa iya.
Currently Selected:
Numeros 29: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
