Numeros 28
28
Ang mga Halad Adlaw-adlaw
(Exo. 29:38-46)
1Ang Ginoo nagsugo kay Moises, 2“Singgana ang mga Israelinhon nga sa natalana nga mga panahon maghalad sila sa akon sang ginakinahanglan nga mga halad nga kalan-on paagi sa kalayo, nga manginkahalamut-an sa akon.
3“Amo ini ang mga halad nga kalan-on paagi sa kalayo nga pagaihalad sa akon: para sa adlaw-adlaw nga halad nga sinunog, duha ka mga kordero nga lalaki nga nagaedad sing isa ka tuig nga wala sing bisan ano nga depekto. 4Ihalad ang nahauna nga kordero sa aga, kag ang ikaduha sa hapon. 5Ang kada-isa lakipan sing halad nga kalan-on nga amo ang duha ka libra sang pinili nga harina, nga nasamuan sing isa ka litro sang labing maayo nga lana sang olivo. 6Amo ini ang adlaw-adlaw nga halad nga ginasunog sing bug-os, nga ginhalad sing una sa Bukid sang Sinai subong isa ka halad nga kalan-on paagi sa kalayo, nga ang kahamot sini manginkahalamut-an sa akon. 7Subong nga halad nga ilimnon upod sa nahauna nga kordero, iula sa altar ang isa ka litro nga bino. 8Sa hapon ihalad ang ikaduha nga kordero sa amo man nga paagi subong sang halad sa aga lakip ang iya halad nga bino. Isa man ini ka halad nga kalan-on paagi sa kalayo, nga ang kahamot sini manginkahalamut-an sa akon.
Mga Halad sa Adlaw nga Inugpahuway
9“Sa Adlaw nga Inugpahuway maghalad sing duha ka mga kordero nga lalaki nga nagaedad sang isa ka tuig nga wala sing bisan ano nga depekto, apat ka libra sang pinili nga harina nga nasamuan sing lana sang olivo subong isa ka halad nga kalan-on, kag sang halad nga ilimnon. 10Ini nga halad nga sinunog pagaidulot sa tagsa ka Adlaw nga Inugpahuway wala labot sa adlaw-adlaw nga halad lakip ang iya halad nga ilimnon.
Ang mga Halad sa Nahauna nga Adlaw sang Bulan
11“Magdulot sing isa ka halad nga sinunog sa akon sa pagsugod sang tagsa ka bulan: duha ka torite nga mga baka, isa ka karnero nga lalaki, pito ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga mga depekto. 12Subong isa ka halad nga kalan-on, magdulot sing pinili nga harina nga nasamuan sang lana sang olivo: ilakip sa tagsa ka torite nga baka ang anom ka libra sang pinili nga harina; upod sa karnero nga lalaki, apat ka libra sang pinili nga harina; 13kag sa tagsa ka kordero, duha ka libra sang pinili nga harina. Ini nga mga halad nga sinunog amo ang mga halad nga kalan-on paagi sa kalayo, nga ang kahamot sini manginkahalamut-an sa akon. 14Ang nagakaigo nga halad nga ilimnon amo ang duha ka litro nga bino upod sa tagsa ka torite nga baka, isa kag tunga ka litro nga bino upod sa karnero nga lalaki, kag isa ka litro nga bino upod sa tagsa ka kordero. Amo ini ang pagsulondan para sa halad nga sinunog sa nahauna nga adlaw sang tagsa ka bulan sa bug-os nga tuig. 15Wala labot sang adlaw-adlaw nga halad nga sinunog lakip ang halad nga ilimnon, maghalad sing isa ka kanding nga lalaki subong isa ka halad tungod sa sala.
Ang mga Halad sa Piesta sang Tinapay nga Wala sing Lebadora
(Lev. 23:5-14)
16“Ang#Exo. 12:1-13; Deut. 16:1-2. Piesta sang Pascua sa pagpasidungog sa akon pagahiwatan sa ika-14 nga adlaw sang nahauna nga bulan. 17Sa#Exo. 12:14-20; 23:15; 34:18; Deut. 16:3-8. ika-15 nga adlaw, magasugod ang piesta para sa akon nga magalawig sing pito ka adlaw, kag sa sini nga panahon ang pagakaunon amo lamang ang tinapay nga wala sing lebadora. 18Sa nahauna nga adlaw sang piesta, magtipon kamo sa pagsimba, kag indi kamo maghimo sang bisan ano nga obra. 19Maghalad kamo sing isa ka halad nga sinunog subong isa ka halad nga kalan-on sa akon: duha ka torite nga mga baka, isa ka karnero nga lalaki, kag pito ka mga kordero nga lalaki nga ang tagsatagsa nagaedad sing isa ka tuig, nga wala sing bisan ano nga depekto. 20Maghalad sang nagakaigo nga halad nga kalan-on nga nahimo sa pinili nga harina nga nasamuan sing lana sang olivo: anom ka libra sa tagsa ka torite nga baka, apat ka libra upod sa karnero nga lalaki, 21kag duha ka libra sa tagsa ka kordero. 22Maghalad man kamo sing isa ka toro nga kanding subong isa ka halad tungod sa sala, kag sa sini nga paagi mahimo ninyo ang mga tulomanon sa pagpaninlo para sa mga tawo. 23Ihalad ninyo ini, wala labot sang kinaandan nga halad nga sinunog sa aga. 24Sa amo man nga paagi, sa sulod sang pito ka adlaw maghalad kamo sa akon adlaw-adlaw sing halad nga kalan-on paagi sa kalayo. Ang kahamot sini manginkahalamut-an sa akon. Ihalad ninyo ini lakip ang adlaw-adlaw nga halad nga sinunog kag halad nga ilimnon. 25Magtipon kamo sa pagsimba sa ikapito nga adlaw kag indi kamo mag-obra.
Ang mga Halad sa Piesta sang Pag-ani
(Lev. 23:15-22)
26“Sa#Exo. 23:16; 34:22; Deut. 16:9-12. nahauna nga adlaw sang Piesta sang Pag-ani, kon magdulot kamo sang halad nga bag-o nga kalan-on sa akon, magtipon kamo sa pagsimba, kag indi kamo maghimo sang bisan ano nga obra. 27Magdulot kamo sing halad nga sinunog nga ang kahamot sini manginkahalamut-an sa akon: duha ka torite nga mga baka, isa ka karnero nga lalaki, kag pito ka mga kordero nga lalaki nga ang tagsatagsa nagaedad sing isa ka tuig nga wala sing bisan ano nga depekto, 28lakip sa nagakaigo nga halad nga kalan-on nga nahimo sa pinili nga harina nga nasamuan sing lana sang olivo: anom ka libra sa tagsa ka torite nga baka, apat ka libra upod sa karnero nga lalaki, 29kag duha ka libra sa tagsa ka kordero. 30Maghalad man kamo sing isa ka toro nga kanding subong isa ka halad tungod sa sala, kag sa sini nga paagi mahimo ninyo ang mga tulomanon sa pagpaninlo para sa mga tawo. 31Ihalad ninyo ini tanan upod sa halad nga ilimnon, lakip ang adlaw-adlaw nga halad nga sinunog kag ang halad nga kalan-on.
Currently Selected:
Numeros 28: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
