Numeros 30
30
Mga Kasugoan Nahanungod sang mga Saad
1Ginhatag sang Ginoo paagi kay Moises ang masunod nga mga pagsulondan sa mga pangulo sang mga tribo sang Israel: 2“Kon#Deut. 23:21-23; Mat. 5:33. ang isa ka tawo magsaad sa paghatag sa akon ukon magsumpa sia nga indi maghimo sang isa ka butang, kinahanglan indi niya paglapason ang iya saad, kundi kinahanglan tumanon niya ang tanan nga iya ginsiling nga himuon.
3“Kon ang isa ka dalaga nga yara pa nagaestar sa balay sang iya amay, magsaad sa paghatag sa akon ukon magsaad nga indi maghimo sang isa ka butang, 4kinahanglan tumanon niya ang tanan nga iya ginsumpaan ukon ginsaad, luas kon ang iya amay nagpamalabag sang mabatian niya ini. 5Pero kon ang iya amay indi magtugot sa iya sa pagtuman sang iya panumpa sang mabatian niya ini, indi sia kinahanglan magtuman sini. Pagapatawaron ko sia tungod kay ang iya amay indi magtugot sa iya sa pagtuman sini.
6“Kon ang isa ka babayi nga wala sing bana maghimo sing isa ka panumpa, bisan ini hungod ukon pasapayan lamang, ukon magsaad nga indi maghimo sang isa ka butang, kag sang ulihi magpamana, 7kinahanglan tumanon niya ang tanan nga iya ginsumpaan ukon ginsaad, luas kon ang iya bana magpamalabag sang mabatian niya ini. 8Pero kon ang iya bana indi magtugot sa iya sa pagtuman sang iya ginsumpaan sang mabatian niya ini, indi sia kinahanglan magtuman sini. Ako magapatawad sa iya.
9“Ang isa ka babayi nga balo ukon ang babayi nga ginbulagan sang iya bana kinahanglan magtuman sang tagsa ka panumpa nga iya ginhimo kag sang tagsa ka saad niya sa paglikaw sa bisan ano nga butang.
10“Kon ang isa ka babayi nga may bana magsumpa ukon magsaad sa paglikaw sa isa ka butang, 11kinahanglan tumanon niya ang tagsa niya ka panumpa ukon panaad, luas kon ang iya bana magpamalabag sang mabatian niya ini. 12Pero kon ang iya bana magdumili sa iya sa pagtuman sang iya panumpa sang pagkabati niya sini, indi sia kinahanglan magtuman sini. Ako magapatawad sa iya, tungod kay ang iya bana indi magtugot sa iya sa pagtuman sang iya panumpa. 13Ang iya bana may kinamatarong sa pagpalig-on ukon sa pagpakawalay pulos sang bisan ano nga panumpa ukon panaad nga iya nahimo. 14Pero sa tapos sang isa ka adlaw nga nabatian niya ang panaad, kag wala man sia magpamalabag, kinahanglan tumanon sang asawa ang tanan niya nga mga panumpa kag mga panaad. Ginpalig-on niya ang sumpa paagi sa iya di-pagpamalabag sini sang mabatian niya ini. 15Pero kon sa ulihi iya ipakawalay pulos ang panumpa, magaantos sia sang silot tungod sa di-pagtuman sang sumpa.”
16Amo ini ang mga pagsulondan nga ginhatag sang Ginoo kay Moises nahanungod sang mga panumpa nga ginhimo sang babayi nga wala pa sing bana nga nagaestar sa balay sang iya amay ukon sang isa ka babayi nga may bana.
Currently Selected:
Numeros 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
