Numeros 27
27
Ang mga Anak nga Babayi ni Zelofehad
1Sanday Mala, Noa, Hogla, Milca, kag Tirsa amo ang mga anak nga babayi ni Zelofehad nga anak ni Hefer, anak ni Galaad, anak ni Maquir, anak ni Manases, anak ni Jose. 2Nagkadto sila kag nagtindog sa atubang ni Moises, ni Eleazar nga pari, sang mga pangulo kag sang bug-os nga katilingban sa pwertahan sang Tolda sang presensya sang Ginoo kag nagsiling, 3“Ang amon amay napatay sa desierto nga wala sing ginbilin nga anak nga lalaki. Wala sia malakip sa grupo ni Core nga nagrebelde batok sa Ginoo, napatay sia tungod sang iya kaugalingon nga sala. 4Ngaa bala panason ang ngalan sang amon amay sa Israel tungod lamang kay wala sia sing mga anak nga lalaki? Hatagi kami sang amon parti pareho sang mga pariente sang amon amay.”
5Gindala ni Moises ang ila pangayo sa Ginoo, 6kag ang Ginoo nagsiling sa iya, 7“Husto#Num. 36:2. ang ginapangayo sang mga anak nga babayi ni Zelofehad; hatagi sila sing parti pareho sang mga pariente sang ila amay. Ihatag sa ila ang panublion sang ila amay. 8Singgana ang mga tawo sang Israel nga kon ang isa ka tawo mapatay nga wala sing anak nga lalaki, ang iya anak nga babayi amo ang magapanubli sang iya pagkabutang. 9Kon wala sia sing anak nga babayi, ang iya mga utod nga lalaki amo ang magapanubli sini. 10Kon wala sia sing mga utod nga lalaki, ang mga utod nga lalaki sang iya amay amo ang magapanubli sini. 11Kon wala sia sing mga utod nga lalaki ukon mga tiyo, dayon ang labing malapit niya nga pariente amo ang magapanubli sini kag magapanag-iya sini subong iya kaugalingon nga pagkabutang. Ang mga tawo sang Israel dapat magsunod sini nga kasugoan, subong nga ako, ang Ginoo, nagmando sini sa inyo.”
Si Josue Ginpili sa Pagbulos kay Moises
(Deut. 31:1-8)
12Ang#Deut. 3:23-27; 32:48-52. Ginoo nagsiling kay Moises, “Taklad ka sa Kabukiran sang Abarim kag lantawa ang duta nga akon ginahatag sa mga Israelinhon. 13Sa tapos mo makita ini, mapatay ka pareho sang imo utod nga si Aaron, 14tungod kay kamo nga duha naglapas sang akon sugo sa desierto sang Zin. Sang magreklamo batok sa akon ang bug-os nga katilingban didto sa Meriba, wala ninyo pagkilalaha ang akon balaan nga gahom sa atubang nila.” (Ang Meriba amo ang tuboran sa Kades sa desierto sang Zin.)
15Si Moises nagpangamuyo, 16“O Ginoo nga Dios, nga ginahalinan sang tanan nga kabuhi, nagapangamuyo ako nga magpili ka sang isa ka tawo nga makasarang sa pagdumala sang mga tawo 17kag #1 Hari 22:17; Ezeq. 34:5; Mat. 9:36; Mar. 6:34. makapangulo sa ila sa inaway, agod ang imo katilingban indi manginkaangay sang mga karnero nga wala sing manugbantay.”
18Ang#Exo. 24:13. Ginoo nagsiling kay Moises, “Kuhaa si Josue nga anak ni Nun, isa ka tawo nga may ikasarang, kag itungtong ang imo mga kamot sa iya ulo. 19Patinduga sia sa atubang ni Eleazar nga pari kag sang bug-os nga katilingban, kag didto sa atubang nila tanan ipakilala nga sia amo ang magabulos sa imo. 20Hatagi sia sang imo awtoridad, agod nga ang bug-os nga katilingban sang Israel magatuman sa iya. 21Magasalig#Exo. 28:30; 1 Sam. 14:41; 28:6. sia sa kay Eleazar nga pari, nga magahibalo sang akon kabubot-on paagi sa paggamit sang Urim kag Tumim.#27:21 URIM KAG TUMIM: Duha ka mga butang nga gingamit sang pari sa paghibalo sang kabubot-on sang Dios. Indi gid mapat-od kon paano nila ini gingamit. Sa sini nga paagi si Eleazar magatudlo kay Josue kag sang bug-os nga katilingban sang Israel sang tanan nila nga pagahimuon.” 22Ginhimo ni Moises ang ginsugo sang Ginoo sa iya. Ginpatindog niya si Josue sa atubang ni Eleazar nga pari kag sang bug-os nga katilingban. 23Suno#Deut. 31:23. sa ginsugo sang Ginoo, gintungtong ni Moises ang iya mga kamot sa ulo ni Josue, kag ginpakilala sia nga amo ang magabulos sa iya.
Currently Selected:
Numeros 27: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
