Numeros 14
14
Ang mga Tawo Nagreklamo
1Sa bug-os nga gab-i ang mga tawo naghinibi sing tudo sa kakulba. 2Nagreklamo sila batok kay Moises kag kay Aaron, kag nagsiling, “Maayo pa kuntani nga nagkalamatay kami sa Ehipto, ukon bisan diri na lang sa desierto! 3Ngaa bala nga dalhon kami sang Ginoo sa sadto nga duta? Magakalamatay kami sa inaway, kag ang amon mga asawa kag mga kabataan pagabihagon. Indi bala mas maayo pa nga magbalik kami sa Ehipto?” 4Gani, nagsiling sila sa isa kag isa, “Magpili kita sing isa ka pangulo kag magbalik sa Ehipto!”
5Dayon si Moises kag si Aaron nagluhod nga ang ila mga guya nagaduot sa duta sa atubang sang tanan nga mga tawo. 6Kag si Josue nga anak ni Nun kag si Caleb nga anak ni Jefone, duha sang mga espiya, naggisi sang ila mga bayu sa kasubo 7kag nagsiling sa mga tawo, “Ang duta nga amon gin-usisa maayo gid nga duta. 8Kon ang Ginoo nahamuot sa aton, dalhon niya kita didto kag ihatag niya sa aton inang maayo kag mapatubason nga duta. 9Indi#Heb. 3:16. kamo magbato sa Ginoo kag indi kamo magkahadlok sa mga tawo nga nagaestar didto. Madaog naton sila sa labing madali. Ang Ginoo nagaupod sa aton kag naglutos sang mga dios nga nag-apin sa ila, gani indi kamo magkahadlok.” 10Batuhon kuntani sila sang bug-os nga katilingban tubtob mapatay, pero sa hinali lamang nakita sang mga tawo ang makasililaw nga kapawa nga nagapakita sang presensya sang Ginoo sa ibabaw sang Tolda.
Si Moises Nagpangamuyo para sa mga Tawo
11Ang Ginoo nagsiling kay Moises, “Tubtob san-o pa bala ang pagsikway sining mga tawo sa akon? Tubtob san-o pa bala nga indi sila magsalig sa akon, wala sapayan sang madamo nga mga milagro nga akon ginhimo sa tunga nila? 12Magapadala ako sing mga pamalatian, kag laglagon ko sila, pero himuon ko ikaw nga amay sang isa ka pungsod nga mas daku pa kag labi pa ka gamhanan sang sa ila!”
13Pero#Exo. 32:11-14. si Moises nagsiling sa Ginoo, “Ginpagwa mo ini nga mga tawo sa Ehipto paagi sa imo gahom. Kon mabatian sang mga Ehiptohanon ang imo ginhimo sa imo mga tawo, 14isugid nila ini sa mga tawo nga nagaestar sa sini nga duta. Ini nga mga tawo nakabati na nga ikaw, O Ginoo, nagaupod sa amon, nga ikaw makita sang mga mata kon ang imo panganod magdulog sa ibabaw namon, kag nga ikaw nagauna sa amon sa dagway sang isa ka haligi nga panganod kon adlaw kag isa ka haligi nga kalayo kon gab-i. 15Karon kon pamatyon mo ang tanan mo nga mga tawo, ang mga kapungsoran nga nakabati sang imo pagkabantog magasiling 16nga ginpamatay mo ang imo mga tawo sa desierto, tungod kay indi ka makasarang sa pagdala sa ila sa duta nga imo ginsaad nga ihatag sa ila. 17Gani karon, O Ginoo, nagapangamuyo ako, ipakita sa amon ang imo gahom kag tumana ang imo saad sang imo pagsiling, 18‘Ako#Exo. 20:5-6; 34:6-7; Deut. 5:9-10; 7:9-10. ang Ginoo, indi madali mangakig, kag nagapakita ako sang daku nga gugma kag katutom kag nagapatawad sang sala kag paglalis. Pero ginasilutan ko ang mga kabataan kag mga kaapuhan, tubtob sa ikatlo kag ikap-at nga kaliwatan, tungod sang mga sala sang ila mga ginikanan.’ 19Kag karon, O Ginoo, nagapangamuyo ako, patawara ang sala sini nga mga tawo, suno sa kadako sang imo wala nagabaylo nga paghigugma, subong sang imo pagpatawad sa ila halin pa sang ila paggwa sa Ehipto.”
20Ang Ginoo nagsabat, “Patawaron ko sila suno sa imo ginapangayo. 21Pero#Heb. 3:18. nagasaad ako nga subong nga ako nagakabuhi kag subong nga ang akon presensya nagatugob sa bug-os nga duta, 22wala sing isa sini nga mga tawo nga makasulod sa sina nga duta. Nakita nila ang makasililaw nga kapawa sang akon presensya kag ang mga milagro nga akon ginhimo sa Ehipto kag sa desierto, pero gintilawan nila ang akon pagpailob sa liwat kag wala sila magtuman sa akon. 23Indi gid sila makasulod sa duta nga akon ginsaad sa ila mga katigulangan. Wala sing isa sadtong mga nagsikway sa akon nga makasulod sa sini nga duta. 24Pero#Jos. 14:9-12. tungod kay ang akon alagad nga si Caleb may tuhay nga pagsalig kag nagpadayon sa pagkatutom sa akon, dalhon ko sia sa duta nga iya gin-usisa, kag ang iya mga kaliwat magapanag-iya sang duta 25nga sa mga kapatagan sini nagaestar ang mga Amaleknon kag ang mga Canaanhon. Balik kamo buas kag magkadto sa desierto pakadto sa Mapula nga Dagat.”
Ginsilutan sang Ginoo ang mga Tawo tungod sang Ila Pagreklamo
26Ang Ginoo nagsiling kay Moises kag kay Aaron, 27“Tubtob san-o pa bala ang pagpadayon sa pagreklamo sining malaut nga mga tawo batok sa akon? Tama na ang akon nabatian sini nga mga reklamo! 28Karon ihatag sa ila ini nga sabat: ‘Ginasumpa ko nga samtang nagakabuhi ako, himuon ko sa inyo ang inyo gid ginpangayo. Ako, ang Ginoo, naghambal sini. 29Magakalamatay#Heb. 3:17. kamo kag ang inyo mga bangkay magalapta sa sini nga desierto. Tungod sang inyo pagreklamo batok sa akon, wala sing isa sa inyo nga nagaedad sing labaw sa baynte ka tuig nga makasulod sa sina nga duta. 30Nagsaad ako nga paestaron ko kamo didto, pero wala sing isa sa inyo nga makaestar didto luas kay Caleb kag kay Josue. 31Nagsiling kamo nga ang inyo mga kabataan pagabihagon, pero dalhon ko sila sa duta nga inyo ginsikway, kag mangin-ila ini ilistaran. 32Magakalamatay kamo diri sa desierto. 33Ang#Bin. 7:36. inyo mga kabataan magadalangdalang sa desierto sa sulod sang kwarenta ka tuig, nga nagaantos tungod sang inyo pagkadi-matinuohon, tubtob nga ang katapusan sa inyo mapatay. 34Magaantos kamo tungod sang inyo mga sala sa sulod sang kwarenta ka tuig, isa ka tuig para sa tagsa sang kwarenta ka adlaw nga inyo ginhinguyang sa pag-usisa sang duta. Mahibal-an ninyo kon daw ano ako kon magsumpong sa inyo! 35Ginasumpa ko nga himuon ko ini sa inyo, kamo nga malaut nga mga tawo nga nagtipon sing tingob batok sa akon. Diri sa desierto ang tagsatagsa sa inyo magakalamatay. Ako, ang Ginoo, naghambal sini.’”
36-37Ang mga tawo nga ginpadala ni Moises sa pag-usisa sang duta nagbalik kag nagsugid sing binutig nga balita nga amo ang kabangdanan sang pagreklamo sang mga tawo batok sa Ginoo. Gani ginpadal-an sila sang Ginoo sing pamalatian, kag nagkalamatay sila. 38Sa dose ka mga espiya si Josue kag si Caleb lamang ang nabilin nga buhi.
Ang Una nga Pagtinguha sa Paggubat sang Duta
(Deut. 1:41-46)
39Sang pagsugid ni Moises sa mga Israelinhon sang ginsiling sang Ginoo, nagpangasubo gid sila sing tama. 40Aga pa gid sang madason nga adlaw nagsugod sila sa paggubat sang kabakuloran. Nagasiling sila, “Karon handa na kami sa pagkadto sa lugar nga ginsugid sa amon sang Ginoo. Ginakilala namon nga nakasala kami.”
41Pero si Moises nagsiling, “Kag ngaa bala ginalalis ninyo ang Ginoo karon? Indi kamo magmadinalag-on! 42Indi kamo maglakat. Ang Ginoo wala nagaupod sa inyo, kag ang inyo mga kaaway magalutos sa inyo. 43Kon mag-atubang kamo sa mga Amaleknon kag sa mga Canaanhon, magakalamatay kamo sa inaway; ang Ginoo indi mag-upod sa inyo, tungod kay indi kamo magtuman sa iya.”
44Wala sapayan nagpangahas pa sila sa pagtaklad sa kabakuloran, bisan nga ang Kaban sang Kasugtanan sang Ginoo ukon si Moises wala maghalin sa kampo. 45Dayon ang mga Amaleknon kag ang mga Canaanhon nga nag-estar didto nagsalakay kag naglutos sa ila, kag ginlagas sila tubtob sa Horma.
Currently Selected:
Numeros 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
