Numeros 13
13
Ang mga Espiya
(Deut. 1:19-33)
1Ang Ginoo nagsiling kay Moises, 2“Magpili ka sing isa halin sa mga pangulo sa tagsatagsa sang dose ka mga tribo kag ipadala sila subong mga espiya sa pag-usisa sang duta sang Canaan nga akon ginahatag sa mga Israelinhon.” 3-15Gintuman ini ni Moises kag halin sa desierto sang Paran nagpadala sia sing mga pangulo nga amo ang masunod:
| Tribo | Pangulo |
|---|---|
| Ruben | Samua, anak ni Zacur |
| Simeon | Safat, anak ni Hori |
| Juda | Caleb, anak ni Jefone |
| Isacar | Igal, anak ni Jose |
| Efraim | Hosea, anak ni Nun |
| Benjamin | Palti, anak ni Rafu |
| Zabulon | Gadiel, anak ni Sodi |
| Manases | Gadi, anak ni Susi |
| Dan | Amiel, anak ni Gemali |
| Aser | Setur, anak ni Micael |
| Neftali | Nahabi, anak ni Vapsi |
| Gad | Geuel, anak ni Maqui |
16Amo ini ang mga espiya nga ginpadala ni Moises sa pag-usisa sang duta. Gin-ilisan niya ang ngalan ni Hosea nga anak ni Nun sa kay Josue.
17Sang pagpadala ni Moises sa ila, ginsingganan niya sila, “Magpakadto kamo sa aminhan halin diri pakadto sa nabagatnan nga bahin sang duta sang Canaan kag dayon magkadto kamo sa kabakuloran. 18Usisaa ninyo kon ano nga sahi sang pungsod ini, kon daw ano kadamo ang mga tawo nga nagaestar didto, kag kon daw ano kadamo sang ila mga hangaway. 19Usisaa ninyo kon bala ang duta maayo nga pagaestaran ukon indi kag kon bala ang mga tawo nagaestar sa mga banwa nga wala sing pader ukon sa mga siudad nga napamakuran. 20Usisaa ninyo kon bala ang duta maayo tamnan ukon ang duta may mga kakahuyan. Kag pat-ura ninyo nga may dala kamo nga mga bunga sang mga kahoy nga nagatubo didto.” (Panahon gid yadto nga nagahimugasa ang mga ubas.)
21Gani ang mga tawo nagpakadto sa naaminhan kag gin-usisa nila ang duta halin sa desierto sang Zin sa nabagatnan pakadto sa Rehob, malapit sa Salamputan sang Hamat sa aminhan. 22Nag-una sila kadto sa nabagatnan nga bahin sang duta kag nakaabot sila sa Hebron, sa diin nagaestar ang mga kabarangayan nanday Ahiman, Sesai, kag Talmai, ang mga kaliwat sang mga higante nga ginatawag mga Anakim. (Ang Hebron ginpasad sing pito ka tuig sa wala pa ang Zoan sa Ehipto.) 23Nakaabot sila sa Kapatagan sang Escol kag didto nag-ipo sang isa ka sanga nga may isa ka pungpong sang mga ubas nga tama ka bug-at sa bagay nga duha ka mga tawo ang kinahanglan magyayong sini. Nagdala man sila pabalik sing mga bunga sang kahoy nga ginatawag granada kag higos. 24Yadto nga lugar ginhingalanan nga Kapatagan sang Escol#13:24 ESCOL: Ini nga ngalan sa Hebreo nagakahulogan “pinungpong sang ubas”. tungod sang pinungpong nga ubas nga gin-ipo sang mga Israelinhon didto.
25Sa tapos nila mausisa ang duta sa sulod sang kwarenta ka adlaw, ang mga espiya nagbalik 26kanday Moises, Aaron, kag sa bug-os nga katilingban sang Israel sa Kades sa desierto sang Paran. Ginsugid nila ang ila nakita kag ginpakita nila ang prutas nga ila gindala. 27Ginsugiran nila si Moises, “Gin-usisa namon ang duta sa diin ginpadala nimo kami kag nasapwan namon ini nga maayo kag mapatubason, kag yari ang iban sang iya mga prutas. 28Pero ang mga tawo nga nagaestar didto tama ka damo sang ila hangaway kag ang ila mga siudad tama ka dalagku kag napamakuran sing maayo. Ang malain pa gid kay nakita namon ang mga kaliwat sang mga higante didto nga ginatawag mga Anakim. 29Ang mga Amaleknon nagaestar sa nabagatnan nga bahin sang duta; ang mga Hethanon, ang mga Jebusnon, kag ang mga Amornon nagaestar sa kabakuloran; kag ang mga Canaanhon nagaestar sa ubay sang Dagat sang Mediteraneo kag sa ubay sang Suba sang Jordan.”
30Ginpahipos ni Caleb ang mga tawo nga nagreklamo batok kay#13:30 nagreklamo batok kay: ukonnagtipon sa palibot ni. Moises, kag nagsiling sia, “Kinahanglan salakayon naton karon kag panag-iyahan ang duta, masarangan naton ang pag-agaw sini.”
31Pero ang mga tawo nga nag-upod kay Caleb nagsiling, “Indi kita makasarang sa pagsalakay sa ila; ang mga hangaway nila tuman ka damo sang sa aton.” 32Gani ginpalapnag nila ang binutig nga sugid sa mga Israelinhon nahanungod sang duta nga ila gin-usisa. Nagsiling sila, “Ang duta indi gani makapatubas sing tuman nga kalan-on para sa mga tawo nga nagaestar didto. Ang tagsatagsa nga nakita namon tama ka taas 33kag#Gen. 6:4. nakita pa gani namon didto ang mga higante, ang mga kaliwat ni Anak. Sa pamatyag namon daw pareho lang kami ka gagmay sang mga tibakla, kag amo man ayhan ina ang ila pagtan-aw sa amon.”
Currently Selected:
Numeros 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
