Numeros 15
15
Mga Kasugoan Nahanungod sa mga Halad
1Ang Ginoo nagsiling kay Moises, 2“Ihambal sa mga tawo sang Israel nga pagatumanon nila ang masunod nga mga pagsulondan sa duta nga akon pagaihatag sa ila. 3Ang isa ka toro nga baka, isa ka karnero nga lalaki, isa ka kordero, ukon isa ka kanding sarang madulot sa akon subong isa ka halad nga sinunog ukon isa ka halad sa pagtuman sang isa ka saad ukon subong isa ka halad nga kinabubot-on ukon isa ka dulot sa inyo natalana nga mga piesta. Ang kahamot sining mga halad nga kalan-on manginkahalamut-an sa akon. 4-5Ang bisan sin-o nga magdulot sing karnero ukon isa ka kanding subong isa ka halad nga sinunog sa akon kinahanglan magdala upod sa tagsa ka sapat sing duha ka libra sang pinili nga harina nga nasamuan sing isa ka litro nga lana sang olivo subong isa ka halad nga kalan-on, lakip ang isa ka litro nga bino. 6Kon ang isa ka karnero nga lalaki ang ihalad, ang apat ka libra sang pinili nga harina nga nasamuan sang isa kag tunga ka litro nga lana sang olivo amo ang idulot subong isa ka halad nga kalan-on, 7lakip ang isa kag tunga ka litro nga bino. Ang kahamot sini nga mga halad manginkahalamut-an sa akon. 8Kon ang toro nga baka ang ihalad sa akon subong isa ka halad nga sinunog ukon isa ka halad sa pagtuman sang isa ka saad ukon subong isa ka halad sa paghiambit, 9ang isa ka halad nga kalan-on nga anom ka libra sang pinili nga harina nga nasamuan sing duha ka litro nga lana sang olivo amo ang idulot, 10lakip ang duha ka litro nga bino. Ang kahamot sini nga halad manginhalamut-an sa akon.
11“Amo ini ang idulot lakip sa tagsa ka toro nga baka, karnero nga lalaki, kordero nga lalaki, ukon kanding. 12Kon sobra sa isa ka bilog nga sapat ang ihalad, kinahanglan ang ginalakip nga dulot pagadugangan man sing nagakaigo. 13Ang tagsa ka tumandok nga Israelinhon kinahanglan maghimo sini kon magdulot sia sing halad nga kalan-on, isa ka kahamot nga manginkahalamut-an sa akon. 14Kag kon sa bisan ano nga tion, ang isa ka dumoluong nga nagaestar upod sa inyo, bisan umalagi lang ukon permanente, magdulot sing halad nga kalan-on, isa ka kahamot nga manginkahalamut-an sa akon, kinahanglan tumanon niya ang amo man nga mga pagsulondan. 15Sa tanan nga palaabuton nga panahon, amo man ini#15:15 Sa iban nga dumaan nga mga pagbadbadamo man ini; sa Hebreoang katilingban amo man ini. nga mga pagsulondan ang inyo kinahanglan pagasundon kag sang mga dumoluong nga nagaestar upod sa inyo. Kamo kag sila pareho sa akon panulok. 16Ini#Lev. 24:22. nga mga kasugoan kag mga pagsulondan para sa inyo kag para man sa ila.”
17Ang Ginoo nagsiling kay Moises 18“Ihambal ang masunod nga mga pagsulondan sa mga tawo sang Israel nga ila pagatumanon sa duta nga ihatag ko sa ila. 19Kon magkaon kamo sang patubas sang duta, magpain kamo sang bahin sini subong isa ka pinasahi nga dulot sa akon. 20Kon magluto kamo sing tinapay, ang nahauna nga tinapay nga nahimo sa bag-o nga trigo pagaihalad subong isa ka pinasahi nga dulot sa akon. Pagaidulot ini pareho man sang pinasahi nga dulot nga inyo ginhimo halin sa trigo nga inyo ginlinas. 21Sa tanan nga panahon nga palaabuton, ining pinasahi nga dulot pagaihatag sa akon halin sa tinapay nga inyo ginluto.
22“Pero kon may isa nga sa indi hungod wala makatuman sini nga mga pagsulondan nga ginhatag ko kay Moises, 23kag abi sa ulihi ang katilingban wala na nagatuman sang tanan nga ginsugo ko paagi kay Moises, 24kon ini nga sayop nahimo tungod kay wala makahibalo ang katilingban, kinahanglan maghalad sila sang isa ka toro nga baka subong isa ka halad nga sinunog. Ang kahamot sini manginkahalamut-an sa akon. Lakip sini idulot ang nagakaigo nga halad nga kalan-on kag halad nga bino. Wala labot sini, magdulot sila sing isa ka kanding nga lalaki subong isa ka halad tungod sa sala. 25Ang pari magahimo sang tulomanon sa pagpaninlo para sa katilingban, kag pagapatawaron sila, tungod kay ang ila sayop indi hungod kag gindala nila ang ila halad tungod sa sala subong isa ka halad nga kalan-on sa akon. 26Ang bug-os nga katilingban sang Israel kag ang mga dumoluong nga nagaestar upod sa inyo pagapatawaron, tungod kay ang tagsatagsa nadalahig sa amo nga sala.
27“Kon#Lev. 4:27-31. ang isa ka tawo makasala sing indi hungod, maghalad sia sing kanding nga babayi nga nagaedad sing isa ka tuig subong isa ka halad tungod sa sala. 28Sa altar ang pari magahimo sang tulomanon sa pagpaninlo sa pagtinlo sang amo nga tawo sa iya sala, kag pagapatawaron sia. 29Amo man ini nga pagsulondan ang para sa tagsatagsa nga nakasala sing indi hungod, bisan sia isa ka tumandok nga Israelinhon ukon isa ka permanente nga dumoluong.
30“Pero ang bisan sin-o nga nagapakasala sing hungod, bisan sia isa ka tumandok ukon dumoluong, nagapasipala sa akon, kag pagapatyon sia, 31tungod kay ginlapas niya ang ginsiling ko kag ginsupak sing hungod ang isa sang akon mga sugo. Sia ang may salabton sang iya kaugalingon nga kamatayon.”
Ang Tawo nga Naglapas sang Adlaw nga Inugpahuway
32Sang didto pa sa desierto ang mga Israelinhon, may isa ka tawo nga nasapwan nga nagapangahoy sa Adlaw nga Inugpahuway. 33Gindala sia kay Moises, kay Aaron, kag sa bug-os nga katilingban, 34kag ginpabilanggo, tungod kay wala pa mahibal-i kon ano ang dapat himuon sa iya. 35Dayon ang Ginoo nagsiling kay Moises, “Ang amo nga tawo dapat patyon, batuhon sia sang bug-os nga katilingban sa gwa sang kampo tubtob mapatay sia.” 36Gani gindala sia sang bug-os nga katilingban sa gwa sang kampo kag ginbato sia tubtob mapatay, suno sa ginsugo sang Ginoo.
Ang mga Pagsulondan Nahanungod sang mga Plikos
37Ang Ginoo nagmando kay Moises, 38“Singgana#Deut. 22:12. ang mga tawo sang Israel: Maghimo kamo sing mga plikos sa mga sidsid sang inyo mga bayu kag butangan sing lubid nga asol ang tagsa ka plikos. Kinahanglan himuon ninyo ini sa tanan nga panahon nga palaabuton. 39Ang mga plikos magapahanumdom sa inyo, kag sa tagsa ka tion nga makita ninyo ini, madumdoman ninyo ang tanan ko nga mga sugo kag tumanon ninyo ini, dayon indi kamo magbiya sa akon kag magsunod sang inyo kaugalingon nga mga handom kag tinutuyo. 40Ang mga plikos magapahanumdom sa inyo sa pagtuman sang tanan ko nga mga sugo, kag kamo mangin-akon sing bug-os. 41Ako ang Ginoo nga inyo Dios, ginpagwa ko kamo sa Ehipto agod ako mangin-inyo Dios. Ako amo ang Ginoo.”
Currently Selected:
Numeros 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
