Numeros 11
11
Ang Lugar nga Ginatawag Tabera
1Ang mga tawo nagsugod sa pagreklamo sa Ginoo nahanungod sang ila mga kabudlayan. Sang mabatian sila sang Ginoo, naakig sia kag ginpadalhan niya sing kalayo ang mga tawo. Nagdabdab ini sa tunga nila kag nagsunog sang isa ka nahigad nga bahin sang kampo. 2Ang mga tawo nagpanawag kay Moises sa pagpangayo sing bulig; nagpangamuyo sia sa Ginoo kag nag-ugdaw ang kalayo. 3Gani, ang lugar gintawag nga Tabera,#11:3 TABERA: Ini nga ngalan pareho sang Hebreo nga pulong nga kon sayuron “pagsunog”. tungod kay didto ang kalayo sang Ginoo nagdabdab sa tunga nila.
Si Moises Nagpili sang Setenta ka mga Pangulo
4Ang grupo sang mga dumoluong nga nagapanglakaton upod sa mga Israelinhon mismo nahidlaw gid sa pagkaon sing karne, kag bisan gani ang mga Israelinhon nagsugod sa pagreklamo: “Kon may karne man lang kuntani kita! 5Sa Ehipto nagpagusto kita sing kaon sang tanan nga isda nga aton nauyonan, kag wala kita sing bayad. Dumdoma ninyo ang mga atimon, ang mga sandiya, ang mga bawang, ang mga sibuyas, kag ang mga ahos nga aton natilawan! 6Pero karon nagapalangluya na kita. Wala na kita sing sarang kaunon, luas lamang sining mana kada adlaw!”
7Karon#Exo. 16:31. ang mana kaangay sang magagmay nga mga binhi, nga ang iya kolor krema. 8-9Nagatupa#Exo. 16:13-15. ini sa kampo kon gab-i, upod sa tun-og. Pagkaaga, ang mga tawo nagalibot sa pagpamulot sini, ginabayo ukon ginagaling nila ini agod mabukbok, kag dayon lutoon nila ini nga manginmanipis nga mga tinapay. Ang sabor sini pareho sang tinapay nga naluto sa lana sang olivo.
10Nabatian ni Moises ang mga reklamo sang mga tawo samtang nagatindog sila nga nagatipontipon sa mga pwertahan sang ila mga tolda. Nasub-an gid sia, tungod kay ang Ginoo naakig sa ila, 11kag nagsiling sia sa Ginoo, “Ngaa bala ginhimo mo ining malain nga butang sa akon? Ngaa wala ka malipay sa akon? Ngaa bala nga ako ang manabat para sa sini nga mga tawo? 12Indi ako ang nagtuga sa ila ukon nagpanganak sa ila! Ngaa nga magsiling ka nga kugoson ko sila kaangay sang mga lapsag pakadto sa duta nga imo ginsaad sa ila mga katigulangan? 13Diin bala ako makuha sing tuman kadamo nga karne para sa sini tanan nga mga tawo? Nagapadayon sila sa pagreklamo nga nagapangayo sing karne. 14Indi ko masarangan ang pagdumala sini tanan nga mga tawo sa akon kaugalingon, tama ini kabudlay para sa akon! 15Kon amo ini ang imo himuon sa akon, maluoy ka, patya na lang ako, agod indi na ako mag-antos sang imo pagkapintas.”
16Ang Ginoo nagsiling kay Moises, “Tipuna ang setenta ka mga tawo nga ginatahod kag ginakilala nga mga pangulo sang mga tawo, dalha sila sa akon sa Tolda sang akon presensya, kag singgana sila sa pagtindog didto sa tupad mo. 17Magapanaog ako kag magahambal sa imo didto, kag kuhaon ang iban nga espiritu nga akon ginhatag sa imo kag ihatag ko sa ila. Dayon sarang sila makabulig sa imo sa pagdumala sini nga mga tawo, kag indi lang ikaw ang magpas-an sini tanan. 18Gani, singgana ang mga tawo, ‘Paninlo kamo sang inyo kaugalingon para buas, kay magakaon kamo sing karne. Ang Ginoo nakabati sang inyo pagreklamo kag pagsiling nga nagahandom kamo sing karne, kag mas maayo pa gani sang didto kamo sa Ehipto. Karon ang Ginoo magahatag sa inyo sing karne kag magakaon kamo sini. 19Magakaon kamo sini indi lamang sa isa, ukon duha ka adlaw, ukon lima, ukon napulo, ukon baynte ka adlaw, 20kundi sa sulod sang isa ka bulan, tubtob nga maggulowa ini sa inyo mga dulonggan, tubtob nga masum-oran kamo sini. Mahanabo ini tungod kay ginsikway ninyo ang Ginoo nga yari diri sa tunga ninyo kag nagreklamo kamo sa iya nga wala na lang tani kamo maghalin sa Ehipto.’”
21Si Moises nagsiling sa Ginoo, “Yari ako nagadumala sang 600,000 ka mga tawo, kag nagasiling ka nga hatagan mo sila sing tuman nga karne sa bug-os nga bulan? 22May tuman bala nga mga baka kag mga karnero nga maihaw sa pagbusog sa ila? Tuman bala para sa ila ang tanan nga mga isda sa dagat?”
23Ang Ginoo nagsabat, “May latid bala ang akon gahom? Sa indi madugay makita mo kon ang akon ginsiling mahanabo ukon indi!”
24Gani naggwa si Moises kag ginsugiran ang mga tawo sang ginsiling sang Ginoo. Gintipon niya ang setenta ka mga pangulo kag ginpahamtang sila sa palibot sang Tolda. 25Dayon ang Ginoo nagpanaog sa panganod kag naghambal sa iya. Ginkuha niya ang iban nga espiritu nga iya ginhatag kay Moises kag ginhatag ini sa setenta ka mga pangulo. Sang mag-abot sa ila ang espiritu, nagsinggit sila nga subong sang mga propeta, pero indi man lang madugay.
26Ang duha sang setenta ka mga pangulo, si Eldad kag si Medad, nagpabilin sa kampo kag wala maggwa pakadto sa Tolda. Didto sa kampo nag-abot sa ila ang espiritu, kag nagsinggit man sila subong sang mga propeta. 27Ang isa ka pamatan-on nga lalaki nagdalagan sa pagsugid kay Moises sang ginhimo ni Eldad kag ni Medad.
28Dayon si Josue nga anak ni Nun, nga nanginkabulig ni Moises halin sang pamatan-on pa sia naghambal kag nagsiling kay Moises, “Sir, pauntata sila!”
29Si Moises nagsabat, “Nabalaka bala ikaw sa akon kaayuhan? Luyag ko kuntani nga ang Ginoo maghatag sang iya espiritu sa tanan niya nga mga tawo kag pahambalon niya sila kaangay sang mga propeta!” 30Dayon si Moises kag ang setenta ka mga pangulo sang Israel nagbalik sa kampo.
Ang Ginoo Nagpadala sing mga Pitaw
31Sa hinali ang Ginoo nagpadala sing hangin nga may dala nga mga pitaw halin sa dagat, nga nagalupad sing tatlo ka tapak sa ibabaw sang duta. Naghugpa sila sa kampo sang bug-os nga katilingban kag sa tanan nga kilid sini sing mga kinilometro ang kalayuon sa bug-os nga palibot.#11:31 dagat, nga nagalupad…palibot: ukondagat. Naghugpa sila sa kampo kag sa tanan nga kilid sini sing mga kinilometro ang kalayuon sa bug-os nga palibot, tubtob nga ang ila tinumpukan sa ibabaw sang duta mga tatlo ka tapak. 32Gani ang mga tawo nagpangdakop sing mga pitaw sa bug-os nga adlaw, sa bug-os nga gab-i, kag sa bug-os nga adlaw nga madason. Wala sing isa nga nagtipon sing kulang sa baynte singko ka sako. Ginbulad nila ini sa palibot sang kampo. 33Sa wala pa maurot ang karne, kag samtang madamo pa ang ila kalan-on, ang Ginoo naakig sa mga tawo kag ginpadalhan niya sila sing mga balatian. 34Yadto nga lugar ginatawag Kibrot-Hataava nga kon sayuron, “Lulobngan sang Pagkaibog,” tungod kay ginlubong nila ang mga tawo didto nga nagkaibog sang karne.
35Gikan didto ang mga tawo naghalin pakadto sa Hazerot, sa diin naghimo sila sing kampo.
Currently Selected:
Numeros 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
