Numeros 10
10
Ang mga Trumpeta nga Pilak
1Ang Ginoo nagsiling kay Moises: 2“Maghimo ka sing duha ka trumpeta nga sinalsal nga pilak agod gamiton sa pagtipon sang mga tawo sing tingob kag para sa pagpahibalo sang paghalin sang kampo. 3Kon ginapatunog sing malawig ang duha ka mga trumpeta, ang bug-os nga katilingban magtipon sa palibot mo sa pwertahan sang Tolda sang akon presensya. 4Pero kon isa lamang ka trumpeta ang ginapatunog, ang mga pangulo lamang sang mga kabarangayan amo ang magtipon sa imo palibot. 5Kon malip-ot lamang nga mga pagpatunog ang mabatian, ang mga tribo nga naghimo sang ila kampo sa sidlangan amo ang magalakat. 6Kon ang malip-ot nga mga pagpatunog ang mabatian sa ikaduha nga tion, ang mga tribo sa bagatnan amo ang magalakat. Gani kon maghalin sang kampo, mabatian ang malip-ot nga mga pagpatunog sang trumpeta, 7pero sa pagtawag sing tingob sang katilingban patunogon sing malawig ang mga trumpeta. 8Ang mga anak nga lalaki ni Aaron, nga mga pari amo ang magapatunog sang mga trumpeta.
“Ang masunod nga mga pagsulondan amo ang pagatumanon sa tanan nga panahon nga palaabuton. 9Kon may inaway sa inyo duta, nga nagaapin kamo sang inyo kaugalingon batok sa mga kaaway nga naggubat sa inyo, patunoga ninyo ang mga trumpeta sa pagpahibalo sang inaway. Ako, ang Ginoo nga inyo Dios, magabulig sa inyo kag magaluwas sa inyo, sa inyo mga kaaway. 10Sa inyo man mga kasadyahan, sa inyo mga Piesta sang Lati kag sa iban ninyo nga mga piesta kinahanglan patunogon ninyo ang mga trumpeta kon magdulot kamo sang inyo mga halad nga sinunog kag mga halad sa paghiambit. Dayon ako magabulig sa inyo. Ako amo ang Ginoo nga inyo Dios.”
Ang mga Israelinhon Naghalin sing Kampo
11Sa ika-20 nga adlaw sang ikaduha nga bulan sa ikaduha nga tuig sa tapos makahalin ang mga tawo sa Ehipto, ang panganod sa ibabaw sang Tolda sang presensya sang Ginoo nag-alsa, 12kag ang mga Israelinhon nagsugod sang ila pagpanglakaton halin sa Desierto sang Sinai. Ang panganod nagdulog sa desierto sang Paran.
13Nagsugod sila sa paglakat sa mando sang Ginoo paagi kay Moises, 14kag sa tagsa ka tion sang ila paglakat, amo man gihapon ang ila pagpasunod. Ang mga yara sa idalom sang bandera sang grupo nga ginapangunahan sang tribo ni Juda amo ang nagauna sa paglakat, suno sa ila grupo, kag ang ila pangulo amo si Naason nga anak ni Aminadab. 15Si Netanel nga anak ni Zuar amo ang pangulo sang tribo ni Isacar, 16kag si Eliab nga anak ni Helon amo ang pangulo sang tribo ni Zabulon.
17Dayon ginabungkag ang Tolda kag ang mga kabarangayan ni Gerson kag ni Merari nga amo ang nagadala sini, magasunod sa paglakat.
18Dayon, ang mga yara sa idalom sang bandera sang grupo nga ginapangunahan sang tribo ni Ruben magasunod sa paglakat, suno sa ila mga grupo, kag ang ila pangulo amo si Elizur nga anak ni Sedeur. 19Si Selumiel nga anak ni Zurisadai amo ang pangulo sang tribo ni Simeon, 20kag si Eliasaf nga anak ni Deuel amo ang pangulo sang tribo ni Gad.
21Dayon ang Levinhon nga kabarangayan ni Kohat magalakat, nga nagadala sang balaan nga mga butang. Sa tion nga mag-abot sila sa madason nga kampo, ang Tolda napatindog na liwat.
22Dayon, ang mga yara sa idalom sang bandera sang grupo nga ginapangunahan sang tribo ni Efraim magasunod sa paglakat, suno sa ila mga grupo, kag ang ila pangulo amo si Elisama nga anak ni Amiud. 23Si Gamaliel nga anak ni Pedazur amo ang pangulo sang tribo ni Manases, 24kag si Abidan nga anak ni Gideoni amo ang pangulo sang tribo ni Benjamin.
25Sa katapusan, ang mga yara sa idalom sang bandera sang grupo nga ginapangunahan sang tribo ni Dan, nga amo ang nagabantay sang tanan nga mga grupo sa ulihi, magasugod sa paglakat, suno sa ila mga grupo kag ang ila pangulo amo si Ahiezer nga anak ni Amisadai. 26Si Pagiel nga anak ni Ocran amo ang pangulo sang tribo ni Aser, 27kag si Ahira nga anak ni Enan amo ang pangulo sang tribo ni Neftali. 28Gani, amo ini ang pasunod sang paglakat, suno sa ila mga grupo, kon ang mga Israelinhon maghalin sing kampo kag maglakat.
29Si Moises nagsiling sa iya bayaw nga si Hobab, anak nga lalaki ni Jetro nga Midianhon, “Manuglakat na kami pakadto sa lugar nga ginsiling sang Ginoo nga iya ihatag sa amon. Nagsaad sia sa pagpauswag sang Israel, gani mag-upod ka sa amon kag partihan ka namon sang amon pag-uswag.”
30Nagsabat si Hobab, “Indi ako. Mabalik ako sa akon duta nga natawhan.”
31Si Moises nagsiling, “Kon mahimo indi kami pagbayai. Nakahibalo ikaw kon sa diin kami makahimo sing kampo sa desierto kag sarang ikaw makatudlo sa amon. 32Kon mag-upod ka sa amon, partihan ka namon sang tanan nga mga kaayuhan nga ihatag sang Ginoo sa amon.”
Ang mga Tawo Naglakat
33Sang paghalin sang mga tawo sa Sinai, ang balaan nga bukid, nagpanglakaton sila sa sulod sing tatlo ka adlaw. Ang Kaban sang Kasugtanan sang Ginoo nagauna pirme sa ila sa pagpangita sing lugar nga ila pahuwayan. 34Sa paghalin sang ila kampo, ang panganod sang Ginoo yara sa ibabaw nila kon adlaw.
35Kon#Sal. 68:1. ginapagwa ang Kaban sang Kasugtanan, si Moises nagasiling, “Magbangon ka, O Ginoo, paaplaaga ang imo mga kaaway kag papalagyuha ang mga nagadumot sa imo!” 36Kag kon magdulog ini, nagasiling sia, “Balik ka, O Ginoo, sa mga linibo nga panimalay sang Israel.”#10:36 Balik…Israel: ukonBalik ka, O Ginoo, ikaw kaangay sang mga minilyon nga hangaway para sa Israel.
Currently Selected:
Numeros 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
