Levitico 18
18
Ginadumilian nga mga Pagpakighirop
1Ang Ginoo nagsugo kay Moises, 2“Ihambal sa mga tawo sang Israel: Ako amo ang Ginoo nga inyo Dios. 3Indi kamo magsunod sang mga ginahimo sang mga tawo sang Ehipto, sa diin kamo anay nag-estar, ukon sang mga tawo sang duta sang Canaan, sa diin pagadalhon ko kamo. 4Tumana ninyo ang akon mga kasugoan kag himua ang akon ginasugo. Ako amo ang Ginoo nga inyo Dios. 5Sunda#Neh. 9:29; Ezeq. 18:9; 20:11-13; Luc. 10:28; Rom. 10:5; Gal. 3:12. ninyo ang mga tulomanon kag ang mga kasugoan nga akon ginahatag sa inyo, maluwas ninyo ang inyo kabuhi sa inyo paghimo sini. Ako amo ang Ginoo.
6“Indi ka magpakighirop sa imo mga pariente. 7Indi pagpakahuy-i ang imo amay paagi sa pagpakighirop sa imo iloy. Kinahanglan indi mo pagpakahuy-an ang imo iloy. 8Indi#Lev. 20:11; Deut. 22:30; 27:20. pagpakahuy-i ang imo amay paagi sa pagpakighirop sa bisan sin-o sang iban niya nga mga asawa. 9Indi#Lev. 20:17; Deut. 27:22. ka magpakighirop sa imo utod nga babayi, ukon sa imo utod nga babayi sa iloy ukon sa amay, bisan nga nagdaku sia sa inyo balay ukon wala. 10Indi ka magpakighirop sa imo apo nga babayi, manginmakahuloya ini sa imo. 11Indi ka magpakighirop sa imo utod nga babayi sa amay ukon sa iloy, sia imo man gihapon utod. 12-13Indi#Lev. 20:19-20. ka magpakighirop sa imo tiya, bisan sia utod sang imo amay ukon sang imo iloy. 14Indi ka magpakighirop sa asawa sang imo tiyo, sia man imo tiya. 15Indi#Lev. 20:12. ka magpakighirop sa imo umagad nga babayi 16ukon#Lev. 20:21. sa imo bayaw nga babayi. 17Indi#Lev. 20:14; Deut. 27:23. ka magpakighirop sa anak nga babayi ukon apo nga babayi sang isa ka babayi nga imo napakighirupan, ayhan mga pariente mo sila, kag ang paghimo sini isa ka sala. 18Indi pag-ipuyo ang utod nga babayi sang imo asawa subong isa sang imo mga asawa, samtang buhi pa ang imo asawa.
19“Indi#Lev. 20:18. ka magpakighirop sa babayi nga yara ang iya pamulanon, tungod kay di-matinlo sia. 20Indi#Lev. 20:10. ka magpakighirop sa asawa sang iban nga tawo, kay magadagta ini sa imo. 21Indi#Lev. 20:1-5. pag-itugyan ang bisan sin-o sang imo mga anak nga gamiton sa pagsimba sa dios nga si Moloc, tungod kay ina magapakahuya sa akon ngalan, ako amo ang Ginoo. 22Wala#Lev. 20:13. sing lalaki nga magpakighilawas sa isa man ka lalaki, kay ginakangil-aran nakon ini. 23Wala#Exo. 22:19; Lev. 20:15-16; Deut. 27:21. sing lalaki ukon babayi nga magapakighilawas sa isa ka sapat, kay ini nga kalautan magadagta sa inyo.
24“Indi pagdagtai ang inyo kaugalingon paagi sa bisan isa sining malaw-ay nga mga buhat. Sa sini nga paagi ang mga pagano nga nag-estar sa duta sang wala pa kamo, nagdagta sang ila kaugalingon, kag ako nagatabog sa ila pa gwa agod nga makasulod kamo. 25Ang ila mga ginhimo nagdagta sang duta, gani ginasilutan ko ang duta kag ginatabog ko ini nga mga tawo nga nagaestar didto. 26-27Ginhimo nila ini tanan nga makangilil-ad nga mga butang, kag gindagtaan nila ang duta, pero indi gid ninyo paghimua ini. Tanan kamo, Israelinhon man ukon dumoluong nga nagaestar upod sa inyo, kinahanglan magtuman sang mga kasugoan kag mga sugo ko, 28kag dayon indi ko kamo pagtabugon sa duta, subong sang pagtabog ko sang mga pagano nga nag-estar didto nga una sa inyo. 29Nakahibalo kamo nga ang bisan sin-o nga maghimo sang bisan isa sining makangilil-ad nga mga butang indi na pagkabigon nga isa sang akon mga katawhan.
30“Tumana ninyo ang akon mga sugo kag indi kamo magsunod sa mga ginahimo sang mga tawo nga nag-estar sa duta nga una sa inyo, kag indi ninyo pagdagtaan ang inyo kaugalingon paagi sa paghimo sini nga mga butang. Ako amo ang Ginoo nga inyo Dios.”
Currently Selected:
Levitico 18: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
