Josue 24
24
Ang Kasugtanan Ginbag-o sa Siquem
1Gintipon ni Josue sa Siquem ang tanan nga mga tribo sang Israel. Gintawag niya ang mga katigulangan, mga pangulo, mga hukom, kag ang mga opisyales sang Israel, kag nagpalapit sila sa atubang sang Dios. 2Nagsiling si Josue sa tanan nga mga tawo, “Amo ini ang ginasiling sang Ginoo nga Dios sang Israel: ‘Sang una anay ang inyo mga katigulangan nag-estar sa tabok sang Suba sang Eufrates, kag nagsimba sa iban nga mga dios. Ang isa sadtong inyo mga katigulangan amo si Tera, ang amay ni Abraham kag ni Nahor. 3Dayon#Gen. 12:1-9; Gen. 21:1-3. ginkuha ko si Abraham nga inyo amay halin sa tabok sang Eufrates kag gindala ko sia sa bug-os nga duta sang Canaan. Ginhatagan ko sia sing madamo nga mga kaliwat. Ginhatag ko sa iya si Isaac, 4kag#Gen. 25:24-26; Gen. 36:8; Deut. 2:5; Gen. 46:1-7. sa kay Isaac, ginhatag ko si Jacob kag si Esau. Ginhatag ko kay Esau ang kabakuloran sang Edom subong iya pagapanag-iyahan, pero si Jacob kag ang iya mga kaanakan nagdulhog pa Ehipto. 5Dayon#Exo. 3:1–12:42. ginpadala ko si Moises kag si Aaron, kag ginpadalhan ko sing daku nga kahul-anan ang Ehipto. Pagkatapos ginpagwa ko kamo. 6Ginpagwa#Exo. 14:1-31. ko ang inyo mga katigulangan sa Ehipto, kag ginlagas sila sang mga Ehiptohanon nga nagasakay sa ila mga karwahi kag mga soldado nga nagasakay sa mga kabayo. Pero sang makaabot ang inyo mga katigulangan sa Mapula nga Dagat 7nagpangayo sila sa akon sang tabang, kag ginbutangan ko sing kadudulman sa tunga nila kag sa mga Ehiptohanon. Ginpalapaw ko ang dagat kag nagtabon ini sa mga Ehiptohanon kag nagkalalumos sila. Nakita ninyo kon ano ang akon ginhimo sa Ehipto.
“‘Nag-estar kamo sa desierto sa malawig nga panahon. 8Dayon#Num. 21:21-35. akon kamo gindala sa duta sang mga Amornon nga nag-estar sa sidlangan nga bahin sang Jordan. Nagpakig-away sila sa inyo, kag ginpadaog ko kamo batok sa ila. Gin-agaw ninyo ang ila duta, kag ginlaglag ko sila samtang kamo nagaabanse. 9Dayon#Num. 22:1–24:25. si Balak, ang anak ni Zipor nga hari sang Moab nagpakig-away batok sa inyo. Ginpatawag niya si Balaam, ang anak ni Beor, kag nagpangabay sa iya sa pagpakamalaut sa inyo. 10Pero wala ko pagpamatii si Balaam, gani ginbendisyunan niya kamo, kag ginluwas ko kamo kay Balak. 11Nagtabok#Jos. 3:14-17; Jos. 6:1-21. kamo sa Jordan, kag nakaabot sa Jerico. Ang mga taga-Jerico nagpakig-away batok sa inyo, kag subong man ang mga Amornon, ang mga Peresnon, ang mga Canaanhon, ang mga Hethanon, ang mga Gergasnon, ang mga Hevhanon, kag ang mga Jebusnon. Pero ginpadaog ko kamo batok sa ila tanan. 12Sa#Exo. 23:28; Deut. 7:20. inyo pagsulod sa ila kadutaan, ginpahadlok kag ginpakurog ko sila agod sa pagtabog sang duha ka mga hari nga Amornon. Nalutos sila indi paagi sa inyo kaugalingon nga kusog ukon sa inyo mga espada kag mga pana. 13Ginhatagan#Deut. 6:10-11. ko kamo sing duta nga wala gid ninyo ginpangabudlayi, kag mga siudad nga wala ninyo ginpatindog. Karon nagaestar na kamo didto, kag nagakaon sang mga bunga sang ubas kag sang mga olivo nga wala ninyo gintanom.’”
14Si Josue nagpadayon sa pagsiling, “Gani karon, simbaha ninyo ang Ginoo kag alagara ninyo sia sing maminatud-on kag may matutom. Ipanghaboy ninyo ang mga dios nga ginsimba anay sang inyo mga katigulangan didto sa Mesopotamia kag sa Ehipto, kag ang Ginoo lang ang inyo alagaron. 15Kon indi kamo luyag mag-alagad sa Ginoo, pilia ninyo sini nga adlaw kon sin-o ang inyo alagaron, ang mga dios bala nga gin-alagad sang inyo mga katigulangan sa duta sang Mesopotamia, ukon ang mga dios sang mga Amornon, nga sa ila duta nagaestar kamo. Pero ako kag ang akon panimalay magaalagad sa Ginoo.”
16Nagsabat ang mga tawo, “Indi gid matabo nga kami magbiya sa Ginoo kag mag-alagad sa iban nga mga dios! 17Ang Ginoo nga amon Dios nagpagwa sa amon mga ginikanan kag sa amon gikan sa pagkaulipon didto sa duta sang Ehipto, kag nakita namon ang dalagku nga mga butang nga iya ginhimo. Iya kami ginluwas bisan diin kami magkadto sa tunga sang tanan nga mga kapungsoran nga amon ginpang-agyan. 18Samtang nagapasulod kami sini nga duta, ang Ginoo nagtabog sang tanan nga mga Amornon nga nag-estar diri. Gani magaalagad man kami sa Ginoo, kay sia amo ang amon Dios.”
19Nagsiling si Josue sa mga tawo, “Indi kamo maghunahuna nga mahapos ang mag-alagad sa Ginoo, kay sia balaan kag maimon nga Dios. Indi niya pagpatawaron ang inyo mga sala kag mga paglapas kon kamo mag-alagad sa iban nga dios. 20Kon magbiya kamo sa Ginoo kag mag-alagad sa iban nga mga dios, sumpongon kamo sang Ginoo kag silutan niya kamo. Pagalaglagon niya kamo, bisan nga sang una nanginmaayo sia sa inyo.”
21Ang mga tawo nagsiling kay Josue, “Indi mahimo! Magaalagad kami sa Ginoo.”
22Si Josue nagsiling sa ila, “Kamo mismo ang mga saksi sa sining kamatuoran nga nagpili kamo sa pag-alagad sa Ginoo.”
Nagsiling sila, “Huo kami mga saksi.”
23Nagsiling si Josue, “Gani laglaga ninyo ang tanan nga mga dios nga yara sa tunga ninyo, kag magsaad kamo nga magmainunongon sa Ginoo, ang Dios sang Israel.”
24Nagsiling ang mga tawo kay Josue, “Magaalagad kami sa Ginoo nga amon Dios, kag tumanon namon ang iya mga sugo.” 25Gani si Josue naghimo sing kasugtanan para#24:25 para: ukonupod. sa mga tawo sadto nga adlaw, kag didto sa Siquem ginhatag niya sa ila ang mga kasugoan kag mga pagsulondan. 26Ginsulat ni Josue ini nga mga sugo sa libro sang Kasugoan sang Dios. Dayon nagkuha sia sing daku nga bato, kag ginpahamtang ini didto sa idalom sang kahoy nga terebinto sa kilid sang santuaryo sang Ginoo. 27Kag nagsiling si Josue sa tanan nga mga tawo, “Tan-awa ninyo ini nga bato! Amo ini ang manginsaksi naton. Nakabati ini sang tanan nga mga pulong nga ginhambal sang Ginoo sa aton. Gani manginsaksi ini batok sa inyo agod indi kamo magbiya sa inyo Dios.” 28Dayon ginpapauli ni Josue ang mga tawo, kag ang tagsatagsa nagbalik sa iya kaugalingon nga duta.
Napatay si Josue kag si Eleazar
29Sa tapos sadto, si Josue, ang anak ni Nun, nga alagad sang Ginoo, napatay sa edad nga 110 ka tuig. 30Ginlubong#Jos. 19:49-50. nila sia sa iya kaugalingon nga duta sa Temnat-Zera, sa kabakuloran sang Efraim, sa aminhan sang Bukid sang Gaas.
31Samtang buhi pa si Josue kag ang mga katigulangan nga nakakita sang tanan nga ginhimo sang Ginoo sa Israel, kag nagkabuhi sing mas malawig pa sang sa iya, ang mga Israelinhon nag-alagad sa Ginoo.
32Ang#Gen. 33:19; 50:24-25; Exo. 13:19; Juan 4:5; Bin. 7:16. mga tul-an ni Jose nga gindala sang mga Israelinhon halin sa Ehipto, ginlubong sa Siquem, sa isa ka puna nga duta nga ginbakal ni Jacob sing 100 ka pilak sa mga anak ni Hamor, ang amay ni Siquem. Ini nga duta ginpanubli sang mga kaliwat ni Jose.
33Si Eleazar nga anak ni Aaron napatay, kag ginlubong sa Gebeat, sa banwa sa kabakuloran sang Efraim, nga ginhatag sa iya anak nga si Fineas.
Currently Selected:
Josue 24: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
