Mga Hukom 1
1
Ang mga Tribo ni Juda kag ni Simeon Nagbihag kay Adoni-besek
1Sa tapos mapatay si Josue, ang mga tawo sang Israel nagpamangkot sa Ginoo, “Sin-o bala sa amon mga tribo ang magalakat sing una sa pagsalakay sa mga Canaanhon?”
2Nagsabat ang Ginoo, “Ang tribo ni Juda amo ang una nga magalakat. Ginatugyan ko sa ila ang paggahom sa amo nga duta.”
3Ang mga kaliwat ni Juda nagsiling sa mga kaliwat ni Simeon, “Updi ninyo kami sa pagsulod sa kadutaan nga ginhatag sa amon sang Ginoo, kag magbuligay kita sa pagpakig-away sa mga Canaanhon. Dayon magaupod man kami sa inyo sa pagsulod sa kadutaan nga ginhatag sa inyo sang Ginoo.” Gani ang mga tribo ni Simeon 4kag ni Juda nagbuligay sa pagpakig-away. Ginpadaog sila sang Ginoo batok sa mga Canaanhon kag sa mga Peresnon, kag ginlutos nila ang 10,000 ka mga tawo sa Besek. 5Nakita nila didto si Adoni-besek, kag nagpakig-away sila batok sa iya. 6Nagpalagyo si Adoni-besek, pero ginlagas nila sia, gindakop kag ginpang-utod ang mga kumalagko sa iya mga kamot kag mga tiil. 7Nagsiling si Adoni-besek, “Setenta ka mga hari nga ginpang-utdan ko sing mga kumalagko sa ila mga kamot kag mga tiil ang nagpamulot sing mga salin nga kalan-on sa idalom sang akon lamisa. Ginhimo sang Dios sa akon ang akon karon ginhimo sa ila.” Gindala nila si Adoni-besek sa Jerusalem kag didto sia napatay.
Gindaog sang Tribo ni Juda ang Jerusalem kag Hebron
8Ginsalakay sang mga kaliwat ni Juda ang Jerusalem kag gin-agaw ini. Ginpamatay nila ang mga pumoluyo kag ginsunog ang siudad. 9Sa tapos sini gingubat nila ang mga Canaanhon nga nagaestar sa kabakuloran, sa kunsaran sang mga bukid kag sa desierto sa nabagatnan. 10Ang mga kaliwat ni Juda naggubat sa mga Canaanhon nga nagaestar sa siudad sang Hebron, nga ginatawag anay Kiryat-arba. Ginlutos nila didto ang mga kabarangayan nanday Sesai, Ahiman kag Talmai.
Gindaog ni Otniel ang Siudad sang Debir
(Jos. 15:13-19)
11Halin didto gingubat sang mga tawo ni Juda ang mga pumoluyo sang siudad sang Debir, nga ginatawag anay nga Kiryat-seper. 12Nagsiling si Caleb sa iya mga hangaway, “Ipaasawa ko si Acsa nga akon anak sa tawo nga makadaog kag makaagaw sang Kiryat-seper.” 13Si Otniel, ang anak ni Kenaz nga manghod ni Caleb, nag-agaw sang siudad. Gani ginpaasawa sa iya ni Caleb si Acsa nga iya anak. 14Sa adlaw sang kasal, ginpilit sia ni Otniel#1:14 Ang iban nga dumaan nga mga pagbadbadginpilit sia ni Otniel; sa Hebreoginpilit niya si Otniel. sa pagpangayo sa iya amay sing isa ka puna nga duta. Gani nagkadto si Acsa kay Caleb, kag sang makapanaog sia sa iya asno, ginpamangkot sia ni Caleb kon ano ang iya kinahanglan. 15Nagsabat sia, “Hatagi man ako sing regalo. Tungod kay ginbutang mo ako sa Negeb sa diin mamala ang duta hatagi man ako sing mga tuboran sang tubig.” Gani ginhatag sa iya ni Caleb ang naibabaw kag naubos nga mga tuboran.
Ang mga Pagdaog sang mga Tribo ni Juda kag ni Benjamin
16Ang mga kaliwat sang ugangan nga lalaki ni Moises, nga mga Kenhanon, nagtaklad upod sa mga kaliwat ni Juda halin sa Jerico, ang siudad sang mga Palma pakadto sa desierto sang Juda sa nabagatnan sang Arad. Nag-estar sila didto upod sa mga Amaleknon.#1:16 Ang iban nga dumaan nga mga pagbadbadAmaleknon; sa Hebreokatawhan. 17Ang mga kaliwat ni Juda nag-upod sa mga kaliwat ni Simeon, kag ginlutos nila ang mga Canaanhon nga nag-estar sa siudad sang Sepat. Ginpakamalaut nila ang siudad kag ila ini ginlaglag sing bug-os. Ginhingalanan nila ang siudad nga Horma.#1:17 HORMA: Ini nga ngalan sa Hebreo nagakahulogan “kalaglagan”. 18-19Ginbuligan sang Ginoo ang mga kaanakan ni Juda, kag ginpanag-iyahan nila ang mga kabakuloran. Pero wala nila maagaw#1:18-19 Ang isa ka dumaan nga pagbadbadPero wala nila maagaw; sa HebreoKag gin-agaw nila. ang Gaza, Askelon, ukon ang Ekron, lakip ang ila palibot nga mga kadutaan. Indi sila makasarang sa pagtabog sang mga tawo nga nagaestar sa baybayon, tungod kay ini nga mga tawo may mga karwahi nga salsalon. 20Suno#Jos. 15:13-14. sa ginsugo ni Moises, ang Hebron ginhatag kay Caleb. Gintabog ni Caleb halin sa Hebron ang tatlo ka mga kabarangayan nga mga kaliwat ni Anak. 21Pero#Jos. 15:63; 2 Sam. 5:6; 1 Cron. 11:4. ang tribo ni Benjamin wala magtabog sang mga Jebusnon nagpadayon sa nag-estar sa Jerusalem. Sugod sadto ang mga Jebusnon nga nagpadayon sa pag-estar sa Jerusalem upod sa mga kaliwat ni Benjamin.
Ang mga Tribo ni Efraim kag ni Manases Nagdaog sang Betel
22-23Ang mga tribo ni Efraim kag ni Manases naglakat sa pagsalakay sang siudad sang Betel, nga gintawag anay Luz. Ang Ginoo nagbulig sa ila. Nagpadala sila sing mga espiya pakadto sa siudad, 24kag ini sila nakakita sang isa ka tawo nga nagapagwa halin sa siudad, kag nagsiling sila sa iya, “Tudloi kami sang dalan pakadto sa siudad, kag indi ka namon pag-anhon.” 25Gani gintudloan niya sila. Ginpamatay sang mga tribo ni Efraim kag ni Manases ang tagsatagsa sa siudad, luas lamang sini nga tawo kag sang bug-os niya nga panimalay. 26Sang ulihi, ini nga tawo nagkadto sa duta sang mga Hethanon, kag nagpatindog didto sing isa ka siudad, kag iya ginhingalanan ini Luz. Ang ngalan sini nga siudad amo man gihapon tubtob sini nga adlaw.
Ang mga Tawo nga Wala Gintabog sang mga Israelinhon
27Ang#Jos. 17:11-13. tribo ni Manases wala magtabog sang mga tawo nga nagaestar sa mga siudad sang Bet-san, Taanak, Dor, Ibleam, Megido, kag sa kaingod nila nga mga banwa. Ang mga Canaanhon nagpadayon sa pag-estar didto. 28Sang magbakod na ang mga Israelinhon, ginpilit nila ang mga Canaanhon sa pagtrabaho para sa ila, pero wala gid nila pagtabuga sila tanan.
29Ang#Jos. 16:10. tribo ni Efraim wala magtabog sang mga Canaanhon nga nagaestar sa siudad sang Gezer, gani nagpadayon sa pag-estar didto ang mga Canaanhon upod sa ila.
30Ang tribo ni Zabulon wala magtabog sang mga tawo nga nagaestar sa mga siudad sang Kitron kag Nahalol, gani nagpadayon sa pag-estar ang mga Canaanhon upod sa ila, kag ginpatrabaho nila sila sing pilit para sa ila.
31Ang tribo ni Aser wala magtabog sang mga tawo nga nagaestar sa mga siudad sang Ako, Sidon, Alab, Aczib, Helba, Afec, kag Rehob. 32Ang mga kaliwat ni Aser nag-estar upod sa mga Canaanhon sa sadto nga lugar, tungod kay wala nila pagtabuga ang mga Canaanhon.
33Ang tribo ni Neftali wala magtabog sang mga tawo nga nagaestar sa mga siudad sang Bet-semes kag Betanat. Nag-estar ang katawhan ni Neftali upod sa mga Canaanhon sa sadto nga lugar, pero ginpilit sila sa pagtrabaho para sa ila.
34Ginsubol sang mga Amornon ang tribo ni Dan pabalik sa kabakuloran, kag wala nila sila pagtugoti sa pagdulhog sa kapatagan. 35Ang mga Amornon nagpadayon sa pag-estar sa Ayalon, Saalbim, kag sa Bukid sang Heres pero ang mga tribo ni Efraim kag ni Manases naggahom sa ila, kag ginpilit sila sa pagtrabaho para sa ila.
36Ang dulonan sang mga Amornon#1:36 Ang isa ka dumaan nga mga pagbadbadEdomnon. nagasugod sa Taklaran sang Akrabim halin sa Sela pa ibabaw.
Currently Selected:
Mga Hukom 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
