Josue 23
23
Ang Katapusan nga Pamulongpulong ni Josue sa mga Tawo
1Sang makaligad ang madamo nga mga tinuig sa tapos mahatagan sang Ginoo ang Israel sing paghidait sa ila mga kaaway sa palibot nila, si Josue tigulang na kaayo. 2Ginpatawag niya ang bug-os nga Israel, mga katigulangan, mga pangulo, mga hukom, mga opisyales, kag nagsiling sia, “Tigulang na gid ako karon. 3Nakita ninyo ang tanan nga ginhimo sang Ginoo nga inyo Dios sa sini tanan nga mga pungsod tungod sa inyo. Ang Ginoo nga inyo Dios nagpakig-away tungod sa inyo. 4Pamati kamo! Ginpanghatag ko sa inyo mga tribo subong palanublion ang mga pungsod nga nabilin, kag subong man ang tanan nga mga pungsod nga akon na naagaw, halin sa Suba sang Jordan sa sidlangan pakadto sa Dagat sang Mediteraneo sa nakatundan. 5Ang Ginoo nga inyo Dios magatabog kag magapapalagyo sa ila samtang kamo nagaabanse. Mangin-inyo ang ila duta, suno sa ginsaad sa inyo sang Ginoo nga inyo Dios. 6Gani magmatutom gid kamo sa pagtuman kag sa paghimo sang tanan nga ginsulat ni Moises sa libro sang Kasugoan. Indi pagpatumbayai ang bisan ano nga bahin sini, 7agod nga indi kamo magpakig-impon sa sini nga mga tawo nga nabilin sa tunga ninyo, ukon magsambit kamo sang mga ngalan sang ila mga dios, ukon maggamit sang ila mga ngalan sa inyo mga sumpa ukon mag-alagad sa ila, ukon magsimba sa ila. 8Sa baylo, magmatutom kamo sa Ginoo, subong nga kamo nagmatutom tubtob sini nga adlaw. 9Ang Ginoo nagtabog sang dalagku kag mabakod nga mga pungsod sa pagpalagyo sa inyo, kag wala pa sing isa nga nakasarang sa pagbato sa inyo. 10Ang#Deut. 32:30; Deut. 3:22. bisan sin-o sa inyo sarang makapadalagan sang 1,000 ka mga tawo, tungod kay ang Ginoo nga inyo Dios nagapakig-away tungod sa inyo, suno sa iya ginsaad. 11Gani agod maluwas ang inyo mga kabuhi, dapat kamo maghigugma sa Ginoo nga inyo Dios. 12Kon magtalikod kamo, kag magbuylog sa mga katawhan sang mga pungsod nga yara pa nabilin sa tunga ninyo, kag magpangasawa ukon magpamana sa ila, 13siguro gid nga ang Ginoo nga inyo Dios indi magtabog sini nga mga pungsod sa pagpalagyo sa inyo. Sa baylo, manginsiod ukon tugalbong sila nga makatalagam para sa inyo, kag subong kasakit sang putik nga ginalapdos sa inyo likod ukon mga tunok sa inyo mga mata. Magapadayon ini tubtob magkalamatay kamo tanan sa sining maayo nga duta nga ginhatag sa inyo sang Ginoo nga inyo Dios.
14“Karon madali na lang ako mapatay. Ang tagsatagsa sa inyo nakahibalo sa inyo tagipusoon kag kalag nga ang Ginoo nga inyo Dios naghatag sa inyo sang tanan nga maayo nga butang nga iya ginsaad. Ang tanan nga iya ginsaad natuman, kag wala sing isa sang iya mga ginsaad nga wala matuman. 15Pero subong nga iya gintuman ang tagsa ka saad nga iya ginhimo sa inyo, iya man pagahimuon ang malain nga butang sa inyo kon indi kamo magtuman sa iya. 16Kon indi ninyo pagtumanon ang kasugtanan nga ginsugo sang Ginoo nga inyo Dios, kag kon mag-alagad kamo sa iban nga mga dios kag magsimba sa ila, dayon sa iya kaakig pagasilutan niya kamo tubtob nga wala sing isa sa inyo nga mabilin sa sining maayo nga duta nga iya ginhatag sa inyo.”
Currently Selected:
Josue 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
