Judit 9
9
Ang Pangamuyo ni Judit
1Dayon ginbutangan ni Judit sang abo ang iya ulo kag gin-uba ang kapa nga nagatabon sang iya bayu nga sako. Naghapa sia. Sa sadto gid nga tion amo man ang tion sang kagab-ihon nga ginahalad ang insyenso sa Templo sa Jerusalem. Si Judit nagpangamuyo sa mabaskog nga tingog: 2“O Ginoo, Dios ni Simeon nga isa sang akon mga katigulangan, dumdoma kon paano ang paghatag mo sang espada kay Simeon agod itimalos niya ang pagmusing sang mga dumoluong sa pagkaulay ni Dina. Ila gingisi ang iya bayu kag ginpakahuy-an sia, ginhublasan nila sia kag ginmusingan nila ang iya pagkababayi bisan pa nga wala ka nagatugot sini. 3Tungod sini, ginbuot mo nga pamatyon ang ila mga pangulo— pamatyon sila sa amo man nga hiligdaan sa diin ginlugos nila si Dina. Ginlaglag mo sila tanan: mga suloguon, mga prinsipe kag mga hari sa ila mga trono. 4Ginbuot mo nga pagadalhon ang ila mga asawa, pagabihagon ang ila mga anak nga babayi, panguhaon ang ila mga pagkabutang sang mga Israelinhon, ang pinili mo nga mga katawhan nga naluyag maghimo sang imo kabubot-on. Ang mga utod ni Dina nagpangayo sang imo bulig tungod sang ila daku nga kaugot sa sining kahuloy-anan sa ila panimalay.
“O Dios ko, pamatii ang akon pangamuyo, ang pangamuyo sang isa ka balo. 5Ikaw ang nagbuot sang mga nagkalatabo sadto anay, sang mga naliligad pa gid kag sang palaabuton. Ginplano mo ang tanan nga nagakalatabo karon kag sa palaabuton. Ang imo mga plano ginasunod sa gihapon. 6Ang tanan mo nga naluyagan nga matabo matuman. Imo nahibaluan sa ginsugoran kon ano ang imo pagabuhaton kag kon ano nga mga pamat-od ang imo pagahimuon. 7Karon ang mga taga-Asiria nagabakod nga nagabakod, ginapabugal nila ang ila mga hangaway nga nagalakat kag mga hangaway nga nagasakay sa kabayo. Nagasalig sila sa ila mga hinganiban, pero wala sila makahibalo nga ikaw, O Ginoo, isa ka hangaway nga makapauntat sang inaway. Ginoo ang imo ngalan. 8Sa imo kaakig, laglaga ang ila gamhanan nga mga hangaway paagi sa imo gahom. Ginplano nila ang pagdagta sang imo Templo sa diin ikaw ginasimba kag ang pagguba sang mga pamusod sang imo altar paagi sa mga espada. 9Tan-awa kon daw ano kabugalon kag kahambog sa ila! Iula ang imo kaakig sa ila! Isa lamang ako ka balo, pero hatagi ako sing kabakod sa pagtuman sang akon ginaplano. 10Gamita ang akon makatiliplang nga mga tinaga sa pagpatay sa ila tanan—agalon man ukon suloguon. Itugot nga ang kabakod sang isa ka babayi magsumpo sang ila bugal. 11Ang imo gahom wala nasandig sa kadamuon kag kabakod sang mga hangaway. Ikaw ang Dios nga nagaatipan sa mga mapainuboson kag nagabulig sa mga ginapigos. Ginahatag mo ang bulig kag kabakod sa mga tawo nga maluya kag indi makabulig sa ila kaugalingon, ginaluwas mo ang mga nadulaan sing paglaom. 12Karon, pamatii ang akon pangamuyo, O Dios ni Simeon nga isa sang akon mga katigulangan. Ikaw ang Dios nga ginasaligan sang Israel, manuggahom sang langit kag sang duta, manunuga sang mga suba kag mga kadagatan. Hari ka sang bug-os nga tinuga. Pamatii ang akon pangamuyo kag 13itugot nga ang akon makatiliplang nga mga tinaga magpilas kag magpatay sa ila nga nagplano sang kapintas batok sa imo kasugtanan kag balaan nga Templo, batok sa Bukid sang Sion kag sa duta nga imo ginhatag sa imo mga tawo. 14Buhata nga ang kabug-osan sang pungsod kag ang tagsa ka tribo magkilala nga ikaw makagagahom kag gamhanan nga Dios kag nga ikaw lamang ang nagaamlig sa mga tawo sang Israel!”
Currently Selected:
Judit 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012