Judit 10
10
Si Judit Nagkadto sa Kampo ni Holofernes
1Sang matapos ni Judit ang iya pangamuyo sa Dios sang Israel, 2nagtindog sia; iya gintawag ang iya suloguon nga babayi kag nagpanaog sia sa idalom nga panalgan sang balay subong nga kinabatasan niya ini nga ginabuhat sa Adlaw nga Inugpahuway kag sa mga adlaw sang piesta. 3Gin-uba niya ang bayu nga sako kag ang bayu niya sa paglalaw tungod sang iya pagkabalo. Nagpaligo sia kag ginbutangan sang malahalon nga pahumot ang iya kaugalingon. Ginhusay niya ang iya buhok kag ginlasohan ini. Nagsuksok sia sang pinakamatahom niya nga bayu subong sang iya ginabuhat sadto anay sa malipayon nga mga okasyon sang buhi pa si Manases nga iya bana. 4Nagsuksok sia sing sandalyas kag gingamit niya ang pinakamahal niya nga mga alahas: mga singsing kag mga aritos, mga pulseras sa iya mga butkon kag mga tiil. Ginpatahom gid niya ang iya kaugalingon sa bagay nga bisan si sin-o nga lalaki ang makakita sa iya, mabihag sa iya katahom. 5Ginhatagan ni Judit ang iya suloguon nga babayi sang isa ka panit nga puyo nga nasudlan sang bino kag isa ka diutay nga tibod nga puno sang lana. Isa pa gid ka sulodlan ang iya ginbutangan sang sinanlag nga sebada, tinapay nga nahimo sa nauga nga higos kag mga tinapay nga nahimo suno sa kinabatasan sang mga Judio. Ini tanan iya ginputos sing tingob kag ginhatag sa iya suloguon nga babayi. 6Pagkatapos, ang duha naggwa sa balay kag nagderetso sa mga pwertahan sang Betulia sa diin nagahulat si Uzias kag ang mga opisyales sang banwa nga amo sanday Kabris kag Karmis. 7Sang makita nila si Judit nga nakailis kag nakapatahom, nagdayaw sila sa iya katahom kag nagsiling sa iya, 8“Kabay pa nga bendisyunan ka sang Dios sang aton mga katigulangan kag buhaton niya nga manginmadinalag-on ang imo plano agod nga madala mo ang kadungganan sa Jerusalem kag ang kadalag-an sa Israel.”
Si Judit nagpangamuyo sa Dios 9kag dayon nagsiling, “Paabrihi ninyo ang mga pwertahan sang banwa agod nga makagwa ako sa pagtuman sang aton nga ginhambalan.” Dayon, ginpaabrihan nila sa pamatan-on nga mga lalaki ang pwertahan sang banwa para sa iya 10kag si Judit upod ang iya suloguon nga babayi naggwa sa siudad. Ginbantayan nila sia samtang nagadulhog sia sa bukid padulong sa kapatagan tubtob nga nadula sia sa ila panulok.
11Samtang nagalakat si Judit sa kabakuloran kag ginaupdan sang iya suloguon, nasugata sila sang isa ka patrolya nga mga taga-Asiria. 12Gindakop nila si Judit kag ginpamangkot sia, “Ano ang imo rasa? Sa diin ka naghalin, kag sa diin ikaw makadto?”
Si Judit nagsabat, “Isa ako ka Hebreo, pero naglayas ako gikan sa Israel tungod kay gintugyan sila sang Dios sa inyo agod malaglag. 13Nag-abot ako sa pagpakigkita kay Holofernes, ang heneral sang inyo hangaway, agod nga mahatagan ko sia sang masaligan nga mga balita. Tudloan ko sia sang dalan nga iya pagaagihan kon luyag niya maagaw ang bug-os nga kabakuloran nga wala sing mapatay bisan isa sang iya mga hangaway.”
14Ang mga soldado naghimutad sa iya tungod kay matahom gid sia tan-awon. Ginpamatian nila ang iya ginpanghambal kag sang ulihi nagsiling sila, 15“Ginluwas mo ang imo kaugalingon paagi sa pagdulhog diri kag sa pagpakigkita sa amon heneral. Ang iban sang amon mga tinawo magaupod sa imo padulong sa iya tolda kag magadala sa imo sa iya atubang. 16Indi ka magkahadlok sa iya. Isaysay sa iya ang bag-o mo lamang masaysay sa amon kag amumahon niya ikaw sing maayo.” 17Gani nagpili sila sang 100 ka mga soldado nga magaupod kay Judit kag sa iya suloguon nga babayi pakadto sa tolda ni Holofernes.
18Nagkinagual ang bug-os nga kampo sang mga taga-Asiria sang maglapnag ang balita sa tagsa ka tolda natungod sa pag-abot ni Judit. Samtang nagatindog sia sa gwa sang tolda nga nagahulat agod nga ipaatubang sia kay Holofernes, madamo nga mga soldado nga taga-Asiria ang nagpalapit kag nagtilindog sa palibot niya. 19Nagdayaw sila sa katahom ni Judit kag nagkatingala sila kon ano nga sahi sang tawo ang mga Israelinhon. Nagpinamangkutanay sila, “Sin-o ang sarang makatamay sa mga tawo nga may pinakatahom nga mga kababayin-an? Maayo pa nga pamatyon naton ang tanan nila nga mga kalalakin-an agod nga indi nila mahaylo ang bug-os nga kalibutan.”
20Dayon ang gwardya kag personal nga mga suloguon ni Holofernes naggwa kag ila ginpasulod si Judit sa tolda. 21Sa sadto nga tion, si Holofernes nagapahuway sa iya higdaan nga nabitayan sang muskitero nga nahuman sa granate kag bulawan nga mga hilo kag napunihan sang mga esmeralda kag malahalon nga mga bato. 22Sang mapahibalo sia nga nag-abot na si Judit, nagkadto si Holofernes sa gwa nga bahin sang tolda. Nag-una sa iya ang mga suloguon nga nagadala sang mga sulo nga nahuman sa pilak. 23Sang malapit na si Judit kay Holofernes kag sang iya mga suloguon kay Judit, daku gid ang ila tanan katingala sa pagtan-aw sang katahom ni Judit. Naghapa si Judit sa atubang ni Holofernes sa pagtahod sa iya, pero ginpatindog sia sang mga suloguon sang heneral.
Currently Selected:
Judit 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012