Judit 8
8
Si Judit, ang Balo nga Israelinhon
1Sa sina nga tion, nabatian ni Judit ang pamat-od ni Uzias. Si Judit anak ni Merari, ang apo ni Ox kag apo sa tuhod ni Jose. Ang mga katigulangan ni Jose amo sanday Oziel, Elkias, Ananias, Gideon, Rafaim, Ahitub, Elias, Helkias, Eliab, Natanael, Salamiel, Sarasadai kag Israel. 2Ang bana ni Judit nga si Manases nga nagikan sa amo man nga kabarangayan, napatay sang tig-alani sang sebada. 3Natam-an sia sang init samtang nagabantay sia sang mga mamumogon kag sang ulihi napatay sia sa ila balay sa Betulia. Ginlubong sia sa lulobngan sang iya panimalay sa uma nga gintung-an sang Dotan kag Balamon.
4Nagpabilin si Judit nga balo sa sulod na sang tatlo ka tuig kag apat ka bulan. 5Sa iya kasubo, nagpahimo sia sang isa ka diutay nga hulot sa atop nayon sang iya balay kag didto nag-estar sia nga nagabayo sang sako bilang tanda sang iya pagkabalo. 6Nagpuasa sia adlaw-adlaw sang sia nabalo luas lamang sa mga adlaw nga sa diin ginadumilian ang pagpuasa: bisperas sang Adlaw nga Inugpahuway kag sa Adlaw nga Inugpahuway mismo, bisperas sang Piesta sang Lati kag sang Piesta sang Lati mismo, kag sa mga kapiestahan nga ginapatuman sa mga Israelinhon. 7Matahom gid nga pagkababayi si Judit. Sang mapatay ang iya bana, nabilin kay Judit ang pagpanag-iya sang bulawan kag mga pilak, mga suloguon kag mga ulipon, mga kahayupan kag kadutaan. Iya ginpadayon ang pagdumala sini tanan 8kag wala gid sing may igasaway nga malain batok sa iya kay isa sia ka babayi nga matinuohon sa Dios.
Ginpakigkitaan ni Judit ang mga Opisyales sang Banwa
9Nabatian ni Judit ang reklamo sang mga tawo batok kay Uzias tungod kay ang pagkakulang sang tubig amo ang nagpatalaw sa ila. Iya man nahibaluan nga sa tapos ang lima ka adlaw, nagsaad si Uzias sa mga tawo nga iya itugyan ang banwa sa mga taga-Asiria. 10Paagi sa iya salaligan nga mayordoma, gin-agda ni Judit sa iya balay si Uzias,#8:10 Uzias: Ang iban nga mga manuskrito sa Griego wala sini nga ngalan. Kabris kag Karmis nga amo ang mga opisyales sang banwa.
11Sang makaabot ang mga opisyales, si Judit nagsiling sa ila, “Kon mahimo pamatii ninyo ako. Mga pangulo kamo sang mga tawo sa Betulia, pero nagsayop kamo sa paghambal sa mga tawo subong sang ginhimo ninyo karon nga adlaw. Indi nagakabagay nga magsaad kamo sa presensya sang Dios nga itugyan ninyo ini nga banwa sa aton mga kaaway kon pananglitan nga indi kita pagbuligan sang Dios sa sulod sini nga mga inadlaw. 12Ano bala ang kinamatarong ninyo sa pagtilaw sa Ginoo subong sang ginhimo ninyo karon nga adlaw? Sin-o bala kamo nga nagpaka-Dios sa tunga sang mga tawo? 13Gintilawan ninyo ang Ginoo nga Makagagahom sang tanan! Wala pa bala kamo makahangop? 14Indi gid ninyo matungkad kon ano ang yara sa kadadalman sang tawhanon nga tagipusoon ukon indi ninyo mahangpan ang tawhanon nga panghunahuna. Kag sa karon ginpangahasan ninyo ang pagbasa sang panghunahuna sang Dios kag ginsaysay ang iya panumdoman! Paano ang pagsiling ninyo nga inyo mahangpan ang Dios nga Manunuga? Indi ninyo ina paghimua, mga abyan. Indi ninyo pagpaakiga ang Ginoo nga aton Dios! 15Kon indi sia mag-abot sa pagbulig sa aton sa sulod sang lima ka adlaw, sarang pa sia makaabot sa pagluwas sa aton sa mga inadlaw nga iya natalana. Ukon tugotan niya nga laglagon kita sang aton mga kaaway. 16Pero indi ninyo pagbutangan sing kondisyon ang Ginoo nga aton Dios! Nagahunahuna bala kamo nga kasubong sia sa aton nga tawo? Nagahunahuna bala kamo nga sarang kamo makaayo sa Dios kag pwede ninyo sia mapilit sa pagbuhat sang isa ka pamat-od? 17Indi ina mahimo! Sa baylo, magpangayo kita sang iya pagbulig kag sing may pagpailob maghulat sang iya pagluwas. Kon mahamut-an niya ang aton pangamuyo, pagasabton niya ang aton pagpangayo sing bulig. 18Wala kita nagasimba sa mga dios nga ginhimo sang mga kamot sang tawo. Wala ini ginbuhat sang aton mga kabarangayan, mga tribo, mga kabanwahanan kag mga siudad bisan pa nga ang aton mga katigulangan sang una naghimo sini. 19Tungod gani sadto gintugot sang Ginoo nga malaglag sila sang ila mga kaaway, kag ginpakuha ang tanan nila nga mga pagkabutang. Daw ano kadako sadto nga kalaglagan! 20Pero tungod kay nagasimba kita sa isa lamang ka Dios nga amo ang Ginoo, nagasalig kita nga indi niya kita pag-isikway ukon sin-o man sang aton mga kautoran.
21“Kon makuha sang mga kaaway ang aton banwa, malaglag ang kabug-osan sang Juda kag panguhaon ang mga pagkabutang sa aton Templo sa Jerusalem. Kon pahanugotan naton nga madagtaan ang Templo, sigurado gid nga bayaran naton ini sang aton kabuhi. 22Kita ang manabat sang mga magakalamatay, sang pagkabihag sang aton mga kautoran kag ang pagkalaglag sang duta nga aton ginpanubli. Pagatamayon kag pagayubitan kita sang mga pungsod nga magaulipon sa aton. 23Indi naton mahaylo nga mangin-abyan ang aton mga kaaway sa karon gid paagi sa pagsungka sa ila.#8:23 Indi naton…ila: ukon Wala sang maayo nga maabutan ang pag-ulipon sa aton. Kon buhaton naton ini, ang Ginoo nga aton Dios magapakahuya sa aton.
24“Gani karon, mga abyan, magbuhat kita nga manginhuwaran sa aton mga kasimanwa. Sa aton pamat-od nasandig ang ila kabuhi kag labaw sa tanan ang palaabuton sang Templo kag altar sang Ginoo. 25Ang Ginoo nga aton Dios nagatilaw sa aton subong nga iya gintilawan sadto anay ang aton mga katigulangan. Sa sini magpasalamat kita. 26Panumdoma ninyo kon paano ang pagtilaw niya kay Abraham kag Isaac, kag kon ano ang natabo kay Jacob sang nagabantay pa sia sang mga karnero sang iya tiyo nga si Laban didto sa Mesopotamia. 27Ang pagtilaw sang Dios sa aton karon indi maglabaw sa kabudlay sang sa mga pagtilaw niya sadto anay sa aton mga katigulangan. Ginapadal-an niya kita sini nga mga pag-antos indi sa pagtimalos sa aton kundi sa pagpaandam sa aton nga nagasimba sa iya.”
28Gani nagsabat si Uzias kay Judit, “Ang tanan mo nga mga ginpanghambal may kamatuoran kag gani wala sing may makapamatok sini. 29Indi ini ang nahauna nga hitabo nga ginpakita mo ang imo kaalam. Halin sang bata ka pa, tanan kami nakatalupangod na sang matadlong kag maalam mo nga paghukom. 30Pero sa karon nagakamatay sa kauhaw ang aton mga katawhan. Ginpilit nila kami sa pagbungat sang amon nahambal kag sa pagbuhat sang balaan nga saad nga indi namon mabawi. 31Gani sa karon, tungod kay ikaw diosnon nga babayi, magpangamuyo ka para sa aton mga tawo. Pangayo ka sa Ginoo nga magpadala sang ulan nga magapuno sang aton mga bubon agod nga manumbalik ang aton kabakod.”
32Si Judit nagsabat, “Matuman ang imo pangabay. Buhaton ko ang isa ka butang nga indi malipatan sang aton mga utod nga Judio. 33Karon sa gab-i, kamo nga tatlo magbantay sa pwertahan sang banwa agod nga ako kag ang akon alagad nga babayi makagwa. Sa wala pa mag-abot ang adlaw nga inyo ginsaad sa paghatag sining banwa, ang Ginoo magagamit sa akon sa pagluwas sang mga tawo sang Israel. 34Pero indi ninyo ako pagpamangkuton kon ano ang akon pagabuhaton; igasaysay ko ini sa inyo pagkatapos sang tanan.”
35Si Uzias kag ang upod niya nga mga opisyales nagsiling sa iya, “Ang amon pagpakamaayo magaupod sa imo kag kabay pa nga ang Ginoo nga aton Dios magtudlo sa imo sang paagi sa pagtimalos sa aton mga kaaway.” Dayon ginbayaan nila si Judit sa iya ginaestaran sa ibabaw sang atop kag nagbalik sila sa ila balantayan.
Currently Selected:
Judit 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012