Judit 7
7
Ang Paggubat sa Betulia
1-2Sang madason nga adlaw gintipon ni Holofernes ang kabug-osan sang iya mga hangaway lakip ang iya mga kadampig. Sa pagkadamo gid sa ila! 170,000 ka mga nagalalakat lamang nga mga soldado kag 12,000 ka mga soldado nga nagasakay sa kabayo wala labot ang mga reserba nga manugtatap sang ila mga galamiton. Nagmando si Holofernes nga gubaton nila ang Betulia, agawon ang tanan nga mga alagyan sa bukid kag salakayon ang mga Israelinhon. Gani, naglakat sila 3kag nagpatindog sang ila kampo sa tupad sang tuboran sa kapatagan malapit sa Betulia. Ang kampo tama kalapad. Ang iya kasangkad naglambot sa banwa sang Dotan tubtob sa Balbaim. Ang iya kalabaon naglambot gikan sa Betulia tubtob sa Sayamon nga nagaatubang sa Kabakuloran sang Jezreel.
4Sang makita sang mga Israelinhon ang kadamuon sang mga hangaway, kinulbaan sila kag nagsinilingay: “Ina nga mga soldado magaubos sang tanan nga mga pagkaon diri kag bisan pa tipunon ang tanan nga kalan-on gikan sa mga bukid, latagon kag kabakuloran indi makaigo agod mapakaon inang pagkadamo nga mga tawo.” 5Pero bisan nga kinulbaan sila, ang tanan nga mga Israelinhon naghanda sang ila mga hinganiban, ila ginsindihan ang mga suga sa mga tore nga nagahatag sang senyas kag nagpulaw sila sa pagbantay sa bug-os nga gab-i. 6Sang madason nga adlaw, ginpagwa ni Holofernes ang kabug-osan sang iya mga hangaway nga nagasakay sa kabayo agod nga makita ini sang mga Israelinhon didto sa Betulia. 7Iya gin-usisa ang mga dalan padulong sa banwa kag ang mga tuboran nga nagahatag sing tubig sa banwa. Iya gin-agaw kag ginpabantayan ang mga tuboran sa wala pa sia makabalik sa kampo.
8Ang tanan nga mga pangulo sang mga hangaway sang Edom kag Moab upod ang mga kumander sang mga hangaway gikan sa baybayon sang Mediteraneo nagkadto kay Holofernes kag nagsiling sa iya: 9“Sir, kon magpamati ka sa amon igasiling, diutay lamang nga mga hangaway ang madula sa imo. 10Ining mga Israelinhon wala nagasalig sa ila mga hinganiban kundi sa kataason sang mga bukid sa diin sila nagaestar kay ining mga bukid mabudlay sakaon. 11Gani, O Heneral Holofernes, kon indi mo sila paggubaton sa tampad, indi gid maano ang imo mga hangaway. 12Magpabilin ka sa imo kampo kag subong man ang imo mga hangaway. Butangi lamang sang mga bantay ang mga tuboran sa kunsaran sang mga bukid, 13tungod kay dira nagasag-ob ang mga Israelinhon gikan sa Betulia. Dayon, kon nagakamatay na sila sa kauhaw, ihatag nila ang ila banwa sa imo. Samtang nga ginabuhat mo ini, kami kag ang amon mga tinawo magapatindog sang amon mga tolda sa ibabaw sang mga bukid sa palibot kag bantayan namon nga wala sing may makagwa gikan sa banwa. 14Tanan sila—mga lalaki, mga babayi kag mga kabataan—magakalamatay. Sa wala pa kita makasalakay sa banwa, ang mga dalanon sini mapuno na sang ila mga bangkay. 15Sa sini nga paagi pagabayaran nila ang ila pagbato kag ang ila paglalis sa mahidaiton nga pagsungka sa imo.”
16Nalipay gid sa sini nga panugyan si Holofernes kag ang iya mga opisyales. Gani nagmando sia nga tumanon ang panugyan. 17Ang mga taga-Moab kag ang 5,000 ka mga taga-Asiria naghalin sang ila kampo sa kapatagan agod ila mabantayan ang mga tuboran nga amo ang nagahatag sing tubig sa banwa. 18Ang mga taga-Edom kag ang mga Amonhon nagtaklad sa mga bukid nga nagaatubang sa banwa sang Dotan kag nagpatindog sang ila kampo. Ginpadala nila ang iban sang ila mga tinawo sa nabagatnan-nasidlangan padulong sa Akraba malapit sa Kusi sa ubay sang Suba sang Mokmur. Ang iban sang mga hangaway nga taga-Asiria nagpatindog sang ila kampo sa kabakuloran. Ang kabug-osan sang ila kampo nagpuno sang pinakalapad nga lugar tungod sang mga tolda kag kagamitan nga kinahanglanon sadtong tama gid kadamo nga mga hangaway.
19Dayon ang mga Israelinhon nagpangayo sing bulig sa Ginoo nga ila Dios. Nadulaan sila sing kaisog kay wala gid sila sing sarang mapalagyuhan tungod sang mga kaaway nga nagalibot sa ila. 20Ang bug-os nga hangaway sang Asiria—ang mga soldado nga nagalakat, ang mga karwahi kag ang mga manugkabayo nag-upang sa mga Israelinhon sa pagkuha sang tubig sa sulod sang trayntay kwatro ka adlaw tubtob nga ang bug-os nga banwa sang Betulia nawad-an sing tubig. 21Nagmalala ang tanan nga mga alibi kag mga bubon kag gani ginpakamaayo nila ang pagrasyon sang ilimnon nga tubig, nga nagakulang nga nagakulang ini samtang nagaligad ang mga inadlaw. 22Ang mga kabataan nag-amat-amat luya kag sa bisan diin nga hilit sang banwa, ang mga kababayin-an kag pamatan-on nagakapukan. Wala gid sing may nabilin sa ila nga kusog.
23Ang tanan nga mga pumoluyo sang banwa—mga lalaki, mga babayi kag mga kabataan nagtipon sa palibot ni Uzias kag sang mga opisyales kag nagsininggit sila sa pagpamasol. Siling nila, 24“Ang Dios magasilot sa imo tungod sining imo ginbuhat sa amon! Ikaw ang balasulon sining mga nagakatabo tungod kay wala ka magpakighidait sa mga taga-Asiria. 25Karon wala na sing may magabulig sa aton! Ang Dios nagtugyan sa aton sa ila gahom. Ginapangluyahan kita kag nagakamatay sa kauhaw. 26Karon nga daan, ipatawag ang mga taga-Asiria kag mag-ampo sa ila kag tugoti nga kuhaon ni Holofernes kag sang iya hangaway ang aton banwa kag ang mga pagkabutang sini. 27Nanginmaayo pa ang aton pagkahimtang kon mga bihag kita. Mangin-ulipon nila kita pero, ti, buhi kita kag indi naton masaksihan ang pagkalamatay sang aton mga kabataan kag mga asawa. 28Saksi ang langit kag ang duta batok sa imo. Subong man ang aton Dios, ang Ginoo sang aton mga katigulangan nga nagsilot sa aton tungod sang ila kag sang aton man mga sala. Ang aton lamang paglaom kag pagpangamuyo amo nga kabay pa indi matabo sa aton karon nga adlaw ang makakulogmat nga mga butang.”#7:28 Ang aton…mga butang: Ang iban nga Griego nga mga manuskrito kag ang dumaan nga mga pagbadbad mayGinapangayo namon nga mag-ampo ka, subong sang ginsiling namon nga imo himuon karon nga adlaw.
29Ang tanan nga yadto didto naghinibi nga nagapanalambiton kag nagpangamuyo sa Ginoo nga ila Dios. 30Dayon si Uzias nagsiling sa ila, “Magpakaisog kamo, mga kautoran! Hulaton naton ang lima pa ka adlaw agod kaluoyan kita sang Ginoo nga aton Dios. Sa pagkamatuod, ang Dios indi magbiya sing lubos sa aton. 31Pero sa tapos ang lima ka adlaw nga indi mag-abot ang kaluoy sang Dios, tumanon ko ang inyo ginsiling.” 32Dayon ginpapauli niya ang mga tawo. Ang tanan nga mga lalaki nagbalik sa ila pagbantay sa mga tore kag pader sang ila banwa, samtang nagpauli ang mga kababayin-an kag mga kabataan sa ila mga balay. Manubo kaayo ang paglaom sang bug-os nga banwa.
Currently Selected:
Judit 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012