Judit 6
6
Ang Pamulongpulong ni Holofernes
1Sang magpuas ang ginahod sang mga tumalambong nga nagalibot sa konseho, naghambal si Holofernes kay Achior sa atubang sang bug-os nga grupo, sa ila nga naggikan sa baybayon sang Mediteraneo, sa mga Moabnon, kag sa sinuholan nga mga hangaway nga Amonhon.
2Siling ni Holofernes, “Achior,#6:2 Achior: Ang iban nga mga manuskrito nagadugangikaw kag ang imo sinuholan nga mga hangaway halin sa Efraim; ang iban nagadugangikaw kag ang imo sinuholan nga mga hangaway halin sa Amon. sin-o ka nga daw propeta kon maghambal? Sin-o ka nga magpamalabag sa amon sa pagsalakay sa mga Israelinhon tungod lamang kay may dios nga magapangapin sa ila? Si Nabucodonosor amo ang amon dios kag amo ina ang importante sa tanan. Ipadala niya ang iya mga hangaway kag pagapapason nila sa ibabaw sang duta ang mga Israelinhon. Indi makabulig sa ila ang ila nga dios. 3Pero ang ginaalagad namon si Nabucodonosor kag mahapos namon lutoson ang mga Israelinhon kasubong nga ang bug-os nga grupo sang mga hangaway daw isa lamang ka tawo. Ang amon mga manugkabayo magasalakay sa ila kag indi sila makasagang sini. 4Lutoson namon sila tanan. Ang ila dugo magabaha sa mga kabukiran kag ang kapatagan mapuno sang ila mga bangkay. Matapos ang amon pagsalakay mapapas sila tanan sa bagay nga wala gid sing may mabilin sa ila. Amo ini ang mando ni Nabucodonosor, ang ginoo sang bug-os nga duta, kag wala sia nagalahog. 5Achior, wala ka sing pulos luas nga ikaw sinuholan nga hangaway gikan sa mga Amonhon kag nagahambal ka kasubong sang isa ka traidor. Indi ka magpakita sa akon liwat tubtob masilutan ko ining mga tawo nga nagpalalagyo sa pagkaulipon gikan sa Ehipto. 6Kag kon magkitaay kita liwat patyon ka sang akon mga soldado kag ang imo ngalan manginyara sa lista sang mga patay.
7Sa karon dalhon ka sang akon mga tinawo didto sa mga kabukiran kag ibilin ka sa isa sang mga banwa sang mga Israelinhon. 8Didto mapatay ka upod sa ila. 9Ngaa nga nagapangasubo ka, Achior? Indi kinahanglan nga magpangasubo ka kon nagalaom ka nga ang mga Israelinhon indi malutos. Ini ang ipasalig ko sa imo: tumanon ko ang akon mga pamahog!”
Gindala sa Betulia si Achior
10Dayon ginmanduan ni Holofernes ang iya mga tinawo nga nagahulat didto sa iya tolda nga dakpon si Achior kag dalhon sia sa Betulia kag ihatag sa mga Israelinhon. 11Gani gindakop si Achior sang mga tawo kag gindala paggwa sa kampo padulong sa kapatagan. Gikan didto, gindala sia sa kabukiran tubtob makalambot sila sa tuboran nga yara sa kunsaran sang Betulia.
12Sang makita sang mga taga-Betulia nga nagapadulong sila, ginkuha nila ang ila mga hinganiban kag nagdinalagan pakadto sa putokputokan sang bukid. Ang tanan nga may mga labyog nagpaulan sang mga bato sa mga tinawo ni Holofernes kag gani nagdulog sila kag wala makataklad sa bukid. 13Ang mga taga-Asiria napilitan sa pagpalipod sa kilid sang bukid kag ila gingapos si Achior kag ginbilin nga nagahigdaon sa kunsaran sang bukid. Dayon nagbalik sila kay Holofernes.
14Sang ulihi, sang makapanaog ang mga Israelinhon gikan sa Betulia, ila ginhubaran sing gapos si Achior kag ila sia gindala sa banwa kag ginpaatubang sa mga opisyales sang banwa nga amo 15sanday Uzias nga anak ni Miqueas sang tribo ni Simeon, Kabris nga anak ni Gotoniel kag si Karmis nga anak ni Malquiel. 16Gintawag sang mga opisyales sang banwa ang mga tigulang, kag tanan nga mga babayi kag ang mga pamatan-on nga lalaki nagdinalagan man padulong sa gintipunan sang mga tawo. Gindala si Achior sa atubang sang mga tawo kag ginpamangkot sia ni Uzias. 17Ginsugid ni Achior kon ano ang mga ginpamulong ni Holofernes sa konseho kag kon ano ang iya mismo ginhambal sa mga opisyales sang Asiria, kag kon paano ang pagpabugal ni Holofernes nga iya pagabuhaton batok sa mga Israelinhon. 18Sang mabatian ini sang mga Israelinhon, nagluluhod sila kag nagsimba sa Dios. Nagpangamuyo sila: 19“O Ginoong Dios sang kalangitan, tan-awa kon paano ang pagpakahuya sa imo mga katawhan sang amon bugalon nga mga kaaway! Kaluoyi kag tabangi kami.” 20Dayon ila ginpasalig si Achior kag ila sia gindayaw tungod sang iya ginbuhat. 21Sang matapos ang pagtililipon, gindala ni Uzias sa iya balay si Achior kag naghanda sia sang bangkite para sa mga katigulangan sang banwa. Nagpangamuyo sila sa bug-os nga gab-i sa pagpangayo sing bulig sa Dios sang Israel.
Currently Selected:
Judit 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012