Judit 5
5
Ang Paghinun-anon sa Kampo ni Holofernes natungod sa Inaway
1Sang mabatian ni Holofernes nga pangulo sang hangaway sang Asiriahanon nga ang mga Israelinhon naghanda sa pagpakig-away, nga ila ginbalabagan ang mga alagyan sa mga bukid, nga ila ginpamakuran ang mga putokputokan sang mga kabukiran kag ila ginbalabagan ang mga kapatagan, 2naakig gid sia sang tama. Ginpatawag niya ang tanan nga mga pangulo sang Moab, ang tanan nga mga heneral sang mga Amonhon kag ang tanan nga mga gobernador sang mga lugar nga nahamtang sa higad sang baybayon sang Mediteraneo. 3Naghambal sia sa ila: “Kamo nga nagaestar sa duta sang Canaan, isugid sa akon ang natungod sa sining mga tawo nga nagaestar sa mga kabukiran. Ano nga mga siudad ang ila ginaestaran? Daw ano ka damo ang ila mga hangaway? Sa diin nagagikan ang ila gahom kag kabakod? Sin-o ang hari nga nagapangulo sang ila mga hangaway? 4Ngaa nga sa kabug-osan sang mga tawo nga nagaestar sa nakatundan, sila lamang ang nagapamatok sa paggulowa kag magsungka sa akon?”
Ang Pamulongpulong ni Achior
5Dayon si Achior, ang pangulo sang tanan nga mga Amonhon, nagsabat kay Holofernes: “Sir, kon pamatian mo kuntani ako, sugiran ko ikaw sang kamatuoran natungod sining mga tawo nga nagaestar sa mga kabukiran malapit sa imo kampo. Indi ako magbinutig sa imo. 6Ini nga mga tawo nga kaliwat sang mga taga-Babilonia 7-8nga nagbiya sang mga pagginawi sang ila mga katigulangan agod nga magsimba sila sa Dios sang langit. Sang ulihi gintabog sila paggwa sa ila pungsod tungod kay nagpamatok sila sa pagsimba sa mga dios sang ila mga katigulangan. Gani nagpaamulya sila sa Mesopotamia sa diin nag-estar sila didto sing malawig nga mga tinuig.
9“Sang ulihi, ginbayaan nila ang Mesopotamia suno sa ginsugo sang ila dios kag nagkadto sila sa duta sang Canaan kag didto nag-estar sila kag nangin-manggaranon sila sa bulawan, pilak kag kahayupan. 10Sang mag-abot ang tigulutom sa bug-os nga duta sang Canaan, ining mga Israelinhon, kay amo ini ang pagtawag sa ila sang ulihi, nagdulhog sa Ehipto kag nag-estar sila sa sadto nga pungsod samtang nga bugana pa ang pagkaon didto. Samtang didto sila nangindaku sila nga pungsod nga may madamo nga mga tawo tubtob nga indi na sila maisip. 11Gani ang hari sang Ehipto nagkontra sa ila. Nagpamintaha sia sa ila, kag ginpahimo sila sang mga tisa. Ginpigos niya sila kag ginhimo nga mga ulipon. 12Pero, nagpangayo sila sing bulig sa ila dios kag nagpadala sia sing mga kalalat-an nga nagbuhat sa mga Ehiptohanon nga wala gid sing sarang mahimo. Sang ginpagwa sila sang mga Ehiptohanon sa ila pungsod, 13ginpamala sang ila dios ang Dagat nga Mapula sa ila atubang 14kag gintuytoyan sila padulong sa Sinai kag Kades Barnea.
“Ang mga Israelinhon nagtabog sang tanan nga mga tawo nga nagaestar sa nabagatnan nga bahin sang Canaan, 15nag-estar sila sa kadutaan sang mga Amornon, ginpamatay nila ang mga taga-Hesbon, nagtabok sila sa Suba sang Jordan kag ila ginpanag-iyahan ang kabug-osan sang mga kabukiran. 16Gintabog nila ang mga Canaanhon, Peresnon, Jebusnon, ang mga taga-Siquem kag ang tanan nga mga Gergasanhon kag nag-estar sila sa sini nga mga kabukiran sa malawig nga tinion.
17“Kontra sang ila dios ang kalautan kag samtang nga wala sila nagapakasala sa iya, nagauswag ang ila pangabuhi. 18Pero kon magpakasala sila, nagakalutos sila sa madamo nga mga inaway kag sa ulihi gindala sila bilang mga bihag sa malayo nga mga lugar. Ginguba ang templo sang ila dios kag ginpuy-an sang ila mga kaaway ang ila mga siudad. 19Pero karon tungod sang ila pagbalik sa ila dios, nagpauli sila gikan sa mga pungsod sa diin sila nag-alaplaag sadto anay. Ginpanag-iyahan nila liwat ang siudad sang Jerusalem, sa diin yara ang ila templo, kag nag-estar liwat sa mga kabukiran nga wala pa sang may nag-estar.
20“Sir, kon ining mga tawo nagapakasala batok sa ila dios, bisan pa nga wala sila nakahibalo nga nagapakasala sila, kag kon masiguro naton nga nakabuhat sila sing pagpakasala, magamadinalag-on kita sa pagsalakay sa ila. 21Pero kon wala man lamang sila sing nalapas nga kasugoan sang ila dios, ti, imo sila pabayaan kay kon indi gani, ang ila dios magabulig sa ila kag mahuy-an kita sa bug-os nga kalibutan.”
Ang Balatyagon sang mga Tumalambong
22Sang pagkatapos ni Achior hambal, ang tanan nga mga tawo nga nagatindog sa palibot sang tolda nagsugod sa pagpamatok. Ang mga opisyales ni Holofernes upod ang mga taga Moab kag ang mga tawo gikan sa higad sang baybayon sang Mediteraneo nagpanugyan nga ipapatay si Achior.
23Nagpamangkot sila, “Ngaa nga kahadlukan naton ining mga Israelinhon? Mahuyang sila kag indi sila makabutang sing mapag-on nga panagang. 24Aton sila salakayon! Heneral Holofernes, ang imo gamhanan nga mga hangaway madali nga magalutos sa ila.”
Currently Selected:
Judit 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012