Judit 4
4
Ang mga Israelinhon Nagplano sang Ila Pagpamatok
1Ang mga tawo sang Juda nakabati sang tanan nga ginpanghimo ni Holofernes, ang pangulo sang hangaway ni Haring Nabucodonosor, sa iban nga mga pungsod. Nakabati sila kon paano ang pagpanguha niya sang mga pagkabutang kag pagguba sang ila mga templo. 2Gani kinulbaan sila sa iya kag hinadlukan sa mahimo nga himuon niya sa siudad sang Jerusalem kag sa Templo sang Ginoo nga ila Dios. 3Bag-o pa lamang sila magbalik sa Juda gikan sa pagkabihag kag ang Templo bag-o pa lamang mabendisyunan upod ang mga kagamitan kag ang altar sa tapos madagtaan ini. 4Gani, nagpadala sila sing paandam sa kabug-osan sang Samaria kag sa mga banwa sang Kona, Bet-horon, Belmain, Jerico, Choba, Esora kag sa Kapatagan sang Salem. 5Sa gilayon, gin-agaw nila ang putokputokan sang mga bukid, ginlibutan sing pamakod ang mga kabarangayan sa mga bakulod, kag tungod kay bag-o pa lamang sila makaani, nagtipon sila sang ila mga pagkaon bilang paghanda sa tion sang inaway.
6Ang Pinakamataas nga Pari sa sadto nga tion nga nagaestar sa Jerusalem amo si Joaquim. Nagsulat sia sa mga pumoluyo sa mga kabanwahanan sang Betulia kag Betomestaim nga nagaatubang sa Kabakuloran sang Jezreel malapit sa Dotan. 7Ginmanduan niya sila nga bantayan nila ang mga alagyan sa bukid nga nagapadulong sa Juda. Mahapos kaayo ang ila pagbangga sa sini nga mga alagyan kay makitid ini, sa bagay nga duha lamang ka tawo ang makaagi sing dungan. 8Gintuman sang mga Israelinhon ang mando sang Pinakamataas nga Pari nga si Joaquim kag sang Konseho nga naghinun-anon didto sa Jerusalem.
Pangamuyo sa Wala pa ang Inaway
9Ang mga Israelinhon nagpuasa kag nagpangamuyo sing hugot sa tagipusoon sa Dios. 10Nagbayo sila sang mga sako—sila tanan, ang ila mga asawa, mga kabataan, mga kahayupan, ang tanan nga mga pumoluyo lakip ang mga dumoluong, ang mga suloguon kag mga sinuholan. 11-12Ang ila altar gintabunan man nila sang mga sako. Dayon ang tanan nga mga lalaki, mga babayi kag mga kabataan sa Jerusalem naghalapa sa duta sa atubangan sang Templo. Naghalapa sila didto nga nagabayo sang sako kag nabutangan ang ila mga ulo sang abo sa presensya sang Ginoo. Nagtilingob sila sa pagpangamuyo sing hanuot sa Dios sang Israel nga kabay pa nga indi mabihag ang ila mga kabataan kag mga asawa kag indi paglaglagon ang ila mga banwa kag mga balay. Ginpangamuyo nila nga indi paghatagan ang mga Hentil sang kahigayunan sa pagguba sang Templo kag sa pagdagta sini. 13Ang Ginoo nagpamati sang ila mga pag-ampo kag nakita niya ang ila mga kalisdanan. Ining pagpuasa kag pagpangamuyo sang mga taga-Juda kag taga-Jerusalem sa atubangan sang Templo nagpadayon sing malawig nga mga inadlaw sa presensya sang Ginoo nga Makagagahom. 14Ang Pinakamataas nga Pari nga si Joaquim, ang mga pari kag ang ila mga kaupdanan nga nagaalagad sa Templo nagsuksok sang bayu nga sako samtang nagahalad sila adlaw-adlaw sang mga halad nga sinunog, mga kinabubot-on nga halad sang mga tawo, kag mga halad sa pagtuman sang panaad. 15Ginbutangan nila sing abo ang ila mga turbante kag nagpangayo sa Ginoo nga iya kaluoyan ang bug-os nga pungsod.
Currently Selected:
Judit 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012