Judit 3
3
Ang Grupo nga Nagkadto kay Nabucodonosor sa Pagpakighambal nahanungod sing Paghidait
1Ang tanan nga mga pungsod nagpadala sang mga mensahero kay Haring Nabucodonosor agod magpakigsugilanon nahanungod sa paghidait. Ang mensahe nga ila dala amo ini: 2“Kami nagapabilin nga mainunongon sa imo, O gamhanan nga Haring Nabucodonosor. Handa kami sa pag-alagad sa imo kag sa pagtuman sang imo mga sugo nga luyag mo ipatuman sa amon. 3Magamit mo suno sa imo luyag ang amon mga balay, ang amon mga kadutaan, ang amon mga kaumhan sang trigo, ang amon mga kasapatan kag ang amon mga tolda. 4Ulipon mo kami, kag gamita ang amon mga kabanwahanan suno sa imo luyag.”
5Sa tapos madala sing mga mensahero ini nga mensahe, 6nagdulhog si Holofernes padulong sa baybayon sang Mediteraneo. Ginpabantayan niya ang tanan nga mga banwa nga may pader kag nagpili sia sang tumandok nga mga lalaki gikan sa tagsa ka banwa kag iya ini ginbuhat nga pang-aman nga mga hangaway. 7Gin-abiabi sia sang mga tawo sa mga kabanwahanan kag sa palibot nga mga lugar nga nagasuksok sila sang kulintas nga mga bulak kag nagasinaot sa tunog sang mga bombo. 8Pero ginpaguba ni Holofernes ang ila tanan nga mga altar kag iya ginpatapas ang ila tanan nga mga kahoy nga ginapakabalaan. Ginpalaglag niya ang tanan nga mga dios sang duta suno sa mando sang hari agod nga ang tanantanan nga mga kapungsoran kag mga tribo magsimba lamang kay Nabucodonosor kag magpangamuyo sa iya subong dios.
9Dayon nag-agi si Holofernes sa Kabakuloran sang Jezreel nga malapit sa Dotan nga nagaatubang sa putokputokan sang mga kabukiran sang Juda. 10Nagpatindog sia sang iya kampo sa gintung-an sang Geba kag sang Skaytopolis. Nagpabilin sia didto sa sulod sang isa ka bulan agod makatipon sia sang mga kinahanglanon sang iya mga hangaway.
Currently Selected:
Judit 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012