Judit 2
2
Ang Paggubat sa mga Kapungsoran sa Nakatundan
1Sa ika-22 nga adlaw sa nahauna nga bulan sang ika-18 nga tuig sang paghari ni Nabucodonosor, ginpakamaayo niya upod ang iya mga manuglaygay nga himuon ang pagtimalos sa tanan nga mga pungsod nga wala nagbulig sa iya. 2-3Gani ginpatawag niya ang iya mga heneral kag ang matag-as nga mga opisyales sang iya mga hangaway. Ginsugid niya sing maid-id kon paano sia ginluiban sadto nga mga pungsod. Ginkaisahan nila nga pamatyon ang tanan nga wala nagbulig sa iya sa pagpakig-away batok kay Haring Arfaxad. Ginsaysay man sa ila ni Haring Nabucodonosor ang iya plano sa paggubat.
4Sa hingapusan nga bahin sang ila paghinun-anon, nagsugo si Nabucodonosor kay Holofernes, ang heneral nga pangulo sang iya mga hangaway kag ikaduha sa gahom sa hari. Ang siling niya: 5“Ako, si Nabucodonosor, ang gamhanan nga hari kag tagdumala sang bug-os nga duta, nagamando sa imo sa pagpili sang batid nga mga hangaway: 120,000 ka mga nagalakat lang kag 12,000 ka mga nagasakay sa kabayo. 6Dayon, gubata ang mga pungsod sa nakatundan tungod kay wala sila magsapak sang akon pagpangayo sing bulig. 7Paandami sila nga maghanda sila sang ila mga dulot nga duta kag tubig sa pagpakita nga nagaampo sila nga wala sing hawidhawid. Ipabatyag ko sa ila ang kadako sang akon kaakig kag akon sila laglagon sing bug-os. Ang akon mga hangaway magatapak sang tagsa nila ka duta kag magalaglag sini sa nagaagi sila. 8Pun-on ko sang mga patay ang ila mga kapatagan kag punongan ko sang mga bangkay ang ila mga sapa kag mga suba tubtob nga mag-alawas ini tanan. 9Bihagon ko ang tanan nga nabilin nga mga buhi kag dalhon ko sila sa mga punta sang duta.
10“Mag-una ka sa akon, Holofernes, kag agawa ang ila tanan nga mga kadutaan. Kon mag-ampo sila sa imo, imo sila bantayan sing maayo tubtob mag-abot ako sa pagsilot sa ila. 11Pero kon magbato sila, indi sila pagkaluoyi. Pamatya sila kag panguhaa ang mga pagkabutang sang bug-os nga kadutaan nga gintugyan ko sa imo. 12Nagasaad ako, bisan anano pa ang matabo sa akon kag sa akon gahom, tumanon ko gid ang akon saad. 13Indi ka maglalis sa akon sa bisan ano nga paagi. Ako ang imo hari, dumdoma ini kag tumana sa labing madali ang tagsa ka ginmando ko sa imo.”
Ang Pagsalakay ni Holofernes
14Gani sang makahalin si Holofernes sa hari, iya ginpatawag sing tingob ang tanan nga mga kumander, mga heneral, kag mga opisyal sang hangaway sang Asiria. 15Suno sa mando sang hari, nagpili si Holofernes sing 120,000 ka batid nga mga hangaway nga nagalakat lang kag 12,000 ka batid nga mga manugpana nga nagasakay sa kabayo kag 16iya ini ginhanda sa pagpakig-away. 17Nagdala man sia sang madamo nga mga kamelyo, mga asno, mga mula nga magadala sang ila galamiton. Nagdala pa gid sia sang madamo nga mga karnero, baka kag kanding para ila kaunon. 18Ang tagsa ka soldado nagdala sang madamo nga balon kag ginhatagan sila sing madamo nga bulawan kag pilak bilang sweldo gikan sa hari.
19Dayon si Holofernes kag ang kabug-osan sang iya hangaway naglakat sing una kay Haring Nabucodonosor. Ang mga hangaway nga nagasakay sa kabayo, mga manugpana nga nagasakay sa karwahi kag ang mga hangaway nga nagalakat lang nagsalakay sang bug-os nga kadutaan sang nakatundan. 20May iban pa nga mga tropa nga nag-upod sa ila. Sa pagkadamo gid sa ila sa bagay nga indi gid sila maisip kag kasubong sila sang nagadulom nga apan ukon mga balas sa desierto.
21Matapos ang tatlo ka adlaw nga pagpanglakaton nila halin sa siudad sang Ninive, nakaabot sila sa mga kapatagan sa palibot sang Bektilet malapit sa mga kabukiran sa naaminhan sang Cilicia. Didto nagpatindog sila sang ila kampo. 22Gikan sa sadto nga lugar, si Holofernes upod ang iya bug-os nga hangaway nga nagalakat lang, ang mga nagasakay sa kabayo, ang mga nagasakay sa karwahi nagsalakay sang mga pungsod nga nahamtang sa mga bakulod. 23Ginlaglag niya sing bug-os ang Libya kag Lidya. Dayon gin-agawan niya sang mga pagkabutang ang tanan nga mga pumoluyo sang Razis kag ang mga kaliwat ni Ismael nga nagaestar sa dulonan sang desierto, sa nabagatnan nayon sang duta sang mga Kelyanhon.
24Dayon nagpanglaktod si Holofernes sa Suba sang Eufrates kag nag-abanse sa kadutaan sang Mesopotamia. Ginpangguba niya sing bug-os ang mga banwa nga nalibutan sang pader sa ubay sang Suba sang Abron tubtob sa dagat. 25Gin-agaw niya ang kadutaan sang Cilicia. Ginpamatay niya ang tanan nga nagbato sa iya samtang nga padayon ang iya pag-abanse tubtob sa nabagatnan nga dulonan sang mga kadutaan sang Japet, malapit sa Arabia. 26Ginkibon niya ang tanan nga mga Midianhon, ginsunog niya ang ila mga tolda kag ginpang-agaw ang ila mga karnero.
27Sang tig-alani na sang mga trigo, si Holofernes nagpanaog sa kapatagan sang Damasco kag iya gintutdan ang alanyon, ginpanglaglag niya ang mga kahayupan kag mga baka, ginkuhaan niya sang mga pagkabutang ang mga banwa, ginlaglag niya ang kabug-osan sang ila mga kadutaan kag ginpamatay niya ang tanan nga mga pamatan-on nga lalaki. 28Nagsalasala ang tanan nga mga tawo nga nagaestar sa baybayon sang Mediteraneo kag nagkulurog sila sa kahadlok. Kinulbaan gid ang mga tawo nga nagaestar sa mga kabanwahanan sang Tiro, Sidon, Sur, Ocina, Jamnia, Asutos kag Askelon.
Currently Selected:
Judit 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012