Judit 16
16
Ambahanon ni Judit sa Pagdayaw
1Dayon ginpangunahan ni Judit ang bug-os nga Israel sa pag-amba sang pagpasalamat. Ang tanan nga mga tawo nagbuylog sa iya sa pagkanta sang pagdayaw.
2Amo ini ang ambahanon ni Judit:
“Dayawon ang akon Dios kag sa iya magkanta,
dayawon sia paagi sa mga tambor kag mga platilyos,
kantahan sia sang bag-o nga ambahanon.
Dayawon sia kag magpangayo sa iya sing bulig.
3Ang Ginoo hangaway nga nagapauntat sang inaway.
Ginluwas niya ako sa mga naghingabot sa akon,
kag ginbalik niya ako sa kampo sang iya mga tawo.
4Gikan sa naaminhan nga mga bukid nag-abot ang mga taga-Asiria,
grupo sang linibulibo nga mga soldado.
Ila ginpunongan ang mga suba sa mga kapatagan,
ang ila mga hangaway nga nagasakay sa mga kabayo naglikop sang kabukiran.
5Nagpamahog sila sa pagsunog sang aton pungsod,
sa pagpatay sang aton mga pamatan-on,
sa paghaboy sa duta sang aton mga lapsag,
kag sa pagbihag sang aton mga kabataan
kag mga kadalagahan.
6Apang ang Makagagahom nga Ginoo nagtiplang sa ila,
iya gingamit ang babayi sa pagtapna sa ila.
7Ang ila baganihan wala mapatay sang lamharon nga mga hangaway,
ukon ginsalakay kag ginpatay sang gamhanan nga mga higante.
Si Judit nga anak ni Merari
ang nagpatay sa iya paagi sa iya makagalanyat nga katahom.
8Ginpadaog niya ang ginapigos nga mga tawo sang Israel,
sang gin-uba niya ang iya bayu sa paglalaw bilang isa ka balo,
kag nag-ilis sang bayu nga lino sa pagtiplang sa iya.
Ginbutangan niya sing malahalon nga pahumot ang iya kaugalingon,
kag ginhigtan niya sing laso ang iya buhok.
9Ang iya sandalyas matahom sa panulok ni Holofernes,
ang iya katahom nagbihag sang iya tagipusoon.
Dayon ang espada gingamit sa pagpugot sa iya.
10Ang mga taga-Persia sa iya kaisog nagkulurog,
ang mga taga-midia nagkatingala sa iya kaisog.
11Dayon ang aton mga katawhan nagsininggit sang kadalag-an
walay sapayan nga maluya sila kag ginpigos.
Ang mga kaaway ila ginpapalagyo nga nagsalangisag kag nahadlok.
12Bisan pa nga kaliwat kita sang mga ulipon,
ang aton mga kaaway nag-isol kag nagdinalagan.
Ginpamatay naton sila kaangay sang mga ulipon nga naglayas.
Ginlaglag sila sang mga hangaway sang Ginoo.
13“Magaamba ako sang bag-o nga ambahanon sa akon Dios.
O Ginoo, gamhanan ikaw kag madinalag-on!
Wala pa gid ikaw makaagi nga nalutos.
14Mag-alagad sa imo ang tanan mo nga mga tinuga.
Nagmando ka lamang kag nagkabuhi sila,
imo sila ginhuypan kag nahimo sila tanan.
Wala sang bisan sin-o nga makapamatok sa imo sugo.
15Nagakulorog ang mga bukid kag mga dagat.
Ang mga bato nagalunay kasubong sang kandila kon ikaw magpalapit.
Pero yara ang imo kaluoy sa tanan nga nagatuman sa imo.
16Nagakalipay ang Ginoo sa mga nagatuman sa iya
labaw pa sa mga pinili nga mga karne sa altar, ukon sang mga pinakahumot nga mga halad.
17Ginalaglag niya ang mga pungsod nga nagapakig-away sa akon mga tawo.
Ang Ginoo nga Makagagahom magasilot sa ila sa Adlaw sang Paghukom.
Iya ipadala sa ila ang kalayo kag ang mga ulod sa paglaglag sang ila mga kalawasan,
kag sila magatangis sa daku nga kasakit tubtob sa katubtoban.”
Ang Pagkabantog ni Judit
18Sang makaabot ang mga tawo sa Jerusalem, nagpaninlo sila kag ugaling magsimba sa Dios. Ginhalad nila sa Ginoo ang ila sinunog nga mga halad, mga halad nga kinabubot-on kag iban pa nga mga dulot. 19Si Judit naghalad sa Dios sang tanan nga mga pagkabutang ni Holofernes nga ginhatag sang mga tawo sa iya. Kag subong isa ka pinasahi nga halad sa katumanan sang iya panaad, iya ginhalad sa Ginoo ang muskitero nga iya nakuha sa higdaan ni Holofernes. 20Ang kahiwatan sa atubangan sang Templo sa Jerusalem naglawig sing tatlo ka bulan kag si Judit nagpabilin didto sa amo nga kalawigon upod sa mga tawo.
21Sang matapos na ang kahiwatan, ang tanan nagpalauli sa ila mga balay. Si Judit nagbalik sa Betulia kag nag-estar sa iya kaugalingon nga uma. Nanginbantog sia sa bug-os nga kadutaan sang Israel sa bug-os niya nga kabuhi. 22Madamo ang mga nagpangaluyag sa iya, pero wala na sia magpamana sa tapos mapatay ang iya bana nga si Manases. 23-24Ang iya kabantog naglapta pa gid kag nagpangabuhi sia sa balay nga ginbilin sa iya sang nagtaliwan niya nga bana. Sa wala pa sia mapatay, iya ginpamartida ang iya mga pagkabutang sa iya suod nga mga kaparientehan kag mga kaparientehan sang iya bana, kag iya ginhatagan sing kahilwayan ang iya suloguon nga babayi. Napatay si Judit sa Betulia sa edad nga 105 ka tuig. Ginlubong sia sa tupad sang lulobngan sang iya bana kag ang mga tawo sang Israel naglalaw para sa iya sa sulod sang isa ka simana. 25Sa mga tinuig nga buhi pa si Judit kag bisan pa sa malawig nga mga tinuig sa tapos sia mapatay, wala sing may nangahas sa paggubat sa mga tawo sang Israel.
Currently Selected:
Judit 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012