Judit 15
15
Ang Pagdaog sang mga Israelinhon
1Sang mahibaluan sang mga soldado ang natabo, kinulbaan sila 2kag nagkulurog sa kahadlok. Naglalapta sila sa nagkalainlain nga mga direksyon halin sa kampo samtang nga nagpaunauna sila sa pagpalagyo sa mga dalanon sa mga kabukiran kag mga kabakuloran. 3Ang mga soldado nga nagabalantay sa mga bukid palibot sang Betulia nagpalalagyo man. Dayon ang tanan nga mga soldado sang Israel naglagas sa ila.
4Si Uzias nagpadala sang mga mensahero sa mga banwa sang Betomestaim, Bebai, Choba, Kola kag sa kabug-osan sang duta sang Israel sa pagpahibalo sa tanan sang natabo kag sa pagpilit sa ila sa pagbulig lagas kag paglaglag sa nagapalalagyo nga mga kaaway. 5Sang mabaton nila ang mensahe ni Uzias, tanan sila nagsalakay sa mga taga-Asiria kag ila sila ginlagas tubtob sa banwa sang Choba kag ginpamatay sang mga Israelinhon ang madamo sang ila mga kaaway. Bisan pa gani ang mga nagaestar sa Jerusalem kag sa iban nga yara sa mga kabukiran nagtilingob sa pagsalakay sang ila nabalitaan ang natabo sa kampo sang mga taga-Asiria. Ang mga pumoluyo sang Galaad kag Galilea nagbantay sang mga alagyan sang nagatalal-as nga mga kaaway kag ginpamatay ang madamo sa ila. Ginlagas nila ang mga kaaway tubtob sa duta sang Damasco.
6Ang iban nga mga tawo sa Betulia nagdulhog sa kampo sang mga taga-Asiria. Ila ginkuha ang mga pagkabutang kag gindala ang tuman gid kadamo sini sa bagay nga nagmalanggaranon sila. 7Sang makabalik ang mga hangaway sang Israel gikan sa ila pagpamatay sang ila mga kaaway, nagpanguha man sila sang kon ano nga nagkalabilin sa kampo sang mga taga-Asiria. Tama gid kadamo sang mga pagkabutang nga nagkalabilin sa bagay nga ang tanan nga mga tawo sa kabanwahanan kag kabarangayan sa kabukiran nagpakig-ambit man sa mga napanguha nila.
Ang Mga Israelinhon Nagsaulog sang Ila Kadalag-an
8Si Joaquim, ang Pinakamataas nga Pari, upod ang Konseho sang Israel nag-abot halin sa Jerusalem sa pagtan-aw sang daku nga katingalahan nga ginbuhat sang Ginoo para sa iya mga katawhan kag subong man sa pagpakigkita kag sa pagpanginbulahan kay Judit. 9Sang makaabot sila, ila gindayaw si Judit sa pagsiling, “Ikaw ang kadungganan sang Jerusalem, baganihan sang Israel, ang bugal kag kalipay sang aton mga tawo! 10Ikaw lamang ang nagdala sining kadalag-an para sa Israel. Ang Makagagahom nga Ginoo nahamuot gid sining imo ginhimo. Kabay pa nga bendisyunan niya ikaw tubtob nga ikaw nagakabuhi.”
Ang tanan nga mga tawo nagsabat, “Amen.”
11Naglawig sing traynta ka adlaw ang pagpanguha sang mga tawo sang mga pagkabutang sa kampo sang mga taga-Asiria. Ginhatag nila kay Judit ang tolda ni Holofernes, ang tanan niya nga mga pilak, mga yahong, mga hiligdaan kag ang tanan nga mga kagamitan sa tolda. Ginkuha ini tanan ni Judit kag ginkarga sa iya mula kag sa isa ka karo. 12Nagkadto kay Judit ang tanan nga mga babayi sang Israel kag nagkinanta kag nagsinaot sila sa pagpasidungog kay Judit. Nagkuha si Judit sang mga sanga kag ginhatag ini sa mga babayi nga kaupod niya. 13Nagbutang sila sa ila mga ulo sang korona nga mga sanga sang olivo. Ginpangunahan ni Judit ang prosesyon samtang iya ginpangulohan ang mga kababayin-an sa pagsaot. Nagsunod sa ila ang mga kalalakin-an sang Israel nga nagataklos sang ila mga hinganiban, kag nagabaliog sang kulintas nga mga bulak samtang padayon ang pagkinanta nila sang pagdayaw sa Dios.
Currently Selected:
Judit 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012