Ester (Griego) A
A
# Ang kapitulo A 1-17 napaigo sa mga kapitulo 11:2–12:6 sa pila ka mga pagbadbad sa Eninglis. Ang Damgo ni Mardoqueo
1-3Si#2 Hari 24:10-16. Mardoqueo, isa ka Judio halin sa tribo ni Benjamin, nabihag upod kay Joaquin nga hari sang Juda, sang si Nabucodonosor nga hari sang Babilonia naglaglag sang Jerusalem. Si Mardoqueo anak ni Jair kag apo ni Semei nga anak ni Kis. Nagaestar sia sa siudad sang Susa sa diin may mataas sia nga palangakuan sa korte ni Haring Ahasuero.
Sa nahauna nga adlaw sa bulan sang Nisan, sa ikaduha nga tuig sang paggahom ni Haring Ahasuero, nagdamgo si Mardoqueo. 4Nagdamgo sia nga nagluntad ang daku nga ginahod kag kinagamo, matunog nga panaguob kag linog nga naupdan sang makahaladlok nga pagkinagula sa bug-os nga duta. 5Dayon nagpakita ang duha ka dalagku nga mga dragon nga handa sa pag-away. 6Sang mabatian ang ila makakulolba nga pagngurob, ang tanan nga mga pungsod naghanda sa pagpakig-away batok sa matarong nga pungsod sang Dios. 7Nag-abot sa duta ang adlaw sang kadulom kag kasubo, kagamo, kag pag-antos kahalitan kag kalaglagan. 8Natublag ang matarong nga mga tawo sang Dios tungod sa daku nga kahadlok sa manug-abot nga katalagman. Naghanda sila para sa kamatayon, 9pero nagpangayo sila sing bulig sa Dios. Sa amo nga damgo ang ila pangamuyo ginsabat paagi sa isa ka daku nga suba nga nagailig halin sa isa ka diutay nga tuboran. 10Nagbutlak ang adlaw kag sa liwat nagsanag. Ang mapainuboson nga mga tawo nagmanginmapag-on kag gindaog nila ang ila bugalon nga mga kaaway.
11Sa sining damgo, nakita ni Mardoqueo kon ano ang tinutuyo sang Dios nga pagahimuon. Sa iya pagbugtaw, gintinguhaan niya nga hangpon sa bug-os nga adlaw ang kahulogan sadtong damgo.
Ginluwas ni Mardoqueo ang Hari
12Sang nagapahuway si Mardoqueo sa pasiyuhan sang palasyo, sa diin nagabantay ang duha ka kapon nga mga tawo nga amo sanday Gabata kag Tara, 13nabatian niya ang malaut nga plano sining duha. Nagpamati sing maanting si Mardoqueo kag iya nabatian ang plano sang duha nga patyon nila ang hari. Sa gilayon nagkadto kag ginsugid ini ni Mardoqueo kay Haring Ahasuero. 14Ang duha ginpausisa, kag sang gin-ako nila ang tanan, ginpabitay sila sang hari.
15Ang kabug-osan sini nga hitabo ginpasulat sang hari sa maragtas sang ginharian. Si Mardoqueo nagsulat man sini. 16Dayon ginbutang sang hari si Mardoqueo sa isa ka palangakuan sa korte kag ginhatagan sing madamo nga mga regalo bilang padya sa iya maayo nga buhat.
17Pero si Haman nga anak ni Hamedata nga Agagnon malapit sa balatyagon sang hari. Nagpangita sia sing paagi agod mahalitan si Mardoqueo upod ang iya sini mga kasimanwa nga mga Judio tungod kay nagsumbong sia nga amo ang gintunaan sang kamatayon sang duha ka kapon nga mga tawo.
Currently Selected:
Ester (Griego) A: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012