Judit 14
14
Ang Plano ni Judit
1Dayon si Judit nagsiling sa ila, “Mga abyan, kon mahimo sunda ninyo ang akon panugyan. Pagkaaga dalha ninyo ini nga ulo kag ibitay ini sa pader sang banwa. 2Magpili kamo sang isa ka pangulo sa tunga ninyo, kag sa pagbutlak sang adlaw, ang tanan nga sarang pa makapakig-away magkuha sang ila mga hinganiban kag maggwa gikan sa banwa upod sa iya padulong sa kabakuloran nga daw kuno abi magasalakay sila sa kampo sang mga taga-Asiria. 3Ang mga bantay nga Asiriahanon magakuha sang ila mga hinganiban kag magadalagan sila sa kampo sa pagpukaw sang ila mga opisyales. Ang mga opisyales magadalagan sa tolda ni Holofernes, pero indi nila sia makita. Ang kabug-osan sang mga hangaway pagakulbaan kag magapalalagyo sila samtang nagapadulong kamo sa ila. 4Dayon kamo kag ang tanan nga mga Israelinhon magasunod sa ila kag pamatyon sila samtang nagapalagyo sila. 5Pero sa wala pa ninyo ini mabuhat, pakadtua ninyo anay sa akon si Achior nga Amonhon. Luyag ko mahibaluan kon bala iya makilala si Holofernes, ang tawo nga nagpakahuya sa Israel kag nagpadala sa aton kay Achior sa tuyo nga ini sia mapatay upod sa aton.
Ang Pagbaylo sang Pagtuluohan ni Achior
6Gani pinatawag nila si Achior sa balay ni Uzias. Pero sang iya pag-abot kag sa pagkakita niya sang ulo ni Holofernes nga ginauyatan sang isa ka Israelinhon, napunaw sia kag natumba. 7Sang ginpabangon nila sia, nagduko sia sa tiilan ni Judit kag sa daku nga pagtahod nagsiling, “Kabay pa nga ang tanan nga mga panimalay sa Juda magdayaw sa imo, kag kabay pa nga ang tagsa ka pungsod magkurog sa kahadlok sa pagkabati nila sang imo ngalan. 8Kon mahimo, isugid sa akon kon paano mo nabuhat ini tanan.”
Samtang nagalibot ang tanan nga mga tawo, ginsugid ni Judit kay Achior ang tanantanan nga mga hitabo halin sang adlaw sang iya paghalin sa Betulia tubtob sa iya pagbalik. 9Sang matapos niya ang iya panaysayon, naghinugyaw sing mabaskog ang mga tawo kag ang bug-os nga banwa natugob sang kinalipay. 10Sang mabatian ni Achior ang tanan nga ginbuhat sang Dios sang Israel, nagtuo sia sing hugot sa iya tagipusoon. Nagpatuli sia kag nanginkatapo sang katilingban sang Israel subong nga ang iya mga kaliwat mga katapo pa tubtob karon.
Ang Pagkinarankaran sa Kampo ni Holofernes
11Sang madason nga aga, ginbitay sang mga Israelinhon ang ulo ni Holofernes sa pader sang Betulia. Sila tanan nagkuha sang ila mga hinganiban kag grupo-grupo nga naggulowa pakadto sa banglid nga nagaatubang sa banwa. 12Sang pagkakita sini sang mga taga-Asiria, nagpadala sila sing balita sa ila mga opisyales nga amo ang nagsugid sini sa ila mataas nga mga pangulo. 13Dayon ang mga pangulo nagkadto sa tolda ni Holofernes kag nagsiling kay Bagoas, “Pukawa ang heneral! Ang mga wala pulos nga mga Israelinhon nagpadasudaso sa pagdulhog gikan sa bukid sa pagsalakay sa aton. Nagapaabot lamang sila sang ila kalaglagan.”
14Nagsulod si Bagoas sa tolda ni Holofernes. Sa gwa sang tululogan nagpamalakpak sia kay naghunahuna sia nga nagakatulog si Holofernes nga upod pa si Judit. 15Sang wala sing may nagsabat sa sulod, iya gintukis ang kurtina kag nagsulod, kag didto nakita niya ang wala na sing ulo nga lawas ni Holofernes nga nagahamyang sa sikwayan sang iya katre. 16Nagtiyabaw kag nagsinggitan si Bagoas. Gingisi niya ang iya bayu, nagpanalambiton kag naghilibion. 17Nagkadto sia sa tolda sa diin nagatener si Judit kag natural nga wala na didto si Judit. Naggwa si Bagoas sing dalidali kag nagsinggit sa mga opisyales, 18“Gintiplang nila kita! Ginpakahuy-an sang isa ka Israelinhon nga babayi ang bug-os nga ginharian ni Haring Nabucodonosor. Tan-awa ninyo dira sa sulod! Nagahigdaon sa duta si Holofernes nga patay kag wala na sing ulo!” 19Sang mabatian ini sang mga opisyales, gingisi nila ang ila mga bayu sa daku nga kasubo, kag samtang padayon ang pagkinarankaran, mabatian ang paghinibi kag pagsininggit sa bug-os nga kampo.
Currently Selected:
Judit 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012