Judit 13
13
1Sang madalom na ang kagab-ihon, ang mga inagda nagpalauli. Dayon ginsirahan sa gwa ni Bagoas ang tolda ni Holofernes kag iya gindumilian ang mga suloguon sa pagsulod. Gani, ang tanan nagtululog sa daku nila nga kakapoy tungod kay naglawig kaayo ang bangkite. 2Nabilin si Judit sa tolda nga nagaisahanon upod kay Holofernes nga sa sadto nga tion nagahigdaon sa iya katre tungod sa kahulogbon. 3Ang suloguon nga babayi ni Judit yara sa gwa sang tolda nga nagahulat kay Judit sa paglakat kag sa pagpangamuyo suno sa iya ginabuhat sa tagsa ka gab-i. Nasilingan na nga daan ni Judit si Bagoas nga sa kinaandan magagwa sia sa kabakuloran sa pagpangamuyo.
4Nakahalin na ang tanan nga mga inagda kag mga suloguon, kag si Judit nabilin upod kay Holofernes sa tolda. Nagtindog si Judit sa kilid sang higdaan ni Holofernes kag sa hipos lamang nagpangamuyo, “O Ginoo, Dios nga Makagagahom, buligi ako sa akon pagabuhaton para sa kadayawan sang Jerusalem. 5Amo ini ang tion sa pagluwas sang imo pinili nga mga katawhan kag sa pagbulig sa akon agod matuman ko ang akon handom sa paglaglag sang mga kaaway nga nagapahog sa amon.” 6Nagkadto si Judit sa tukod sang higdaan sa ulohan ni Holofernes kag ginkuha ang iya espada. 7Nagpalapit sia kay Holofernes nga nagakatulog, inuyatan niya ini sa buhok kag nagsiling, “O Ginoo, Dios sang Israel, karon gid hatagi ako sing kusog.” 8Dayon, sa bug-os niya nga kusog iya ginlabo sing makaduha ang liog ni Holofernes kag nautod ang iya ulo. 9Iya ginpaligid ang lawas gikan sa hiligdaan kag iya ginhubad ang muskitero gikan sa mga tukod sang katre. Dayon naggwa sia sa tolda kag iya ginhatag ang ulo ni Holofernes sa iya suloguon nga babayi 10nga nagbutang sini sa sulodlan sang pagkaon.
Ang Pagbalik ni Judit kag sang Iya Suloguon sa Betulia
Dayon ang duha ka mga babayi upod nga naglakat suno sa kinaandan nila nga ginabuhat sa pagpangamuyo. Sang makaligad sila sa kampo sang mga taga-Asiria, ginlatas nila ang kapatagan kag nagpadayon sila sa kilid sang bukid tubtob nga makalambot sila sa mga pwerta sang Betulia. 11Sang malapit na sila, nagsinggit si Judit sa mga bantay sa pwerta, “Buksi ninyo ang pwerta! Buksi ninyo ang pwerta! Ang Dios nagaupod sa gihapon sa aton. Sa karon nga adlaw ginpakita niya liwat sa Israel ang iya kusog kag iya gingamit ang iya gahom batok sa aton mga kaaway.”
12Sang mabatian sang mga lalaki ang tingog ni Judit, nagdalidali sila sa pakadto sa mga pwerta kag ila gintawag ang mga opisyales sang banwa. 13Ang tanantanan, bata kag tigulang, nagdinalagan sa pwerta. Wala sing may makapati nga nakabalik si Judit. Ila ginbuksan ang pwerta para sa iya kag sa iya suloguon nga babayi kag gin-abiabi sila. Dayon nagdabok sila agod masanagan sila kag nagtipon palibot sa duha ka mga babayi. 14Sa mabaskog nga tingog, nagsiling si Judit, “Dayawon ang Ginoo! Dayawon sia! Dayawon ang Dios nga nagkaluoy sa mga tawo sang Israel. Sa karon nga gab-i iya ako gingamit sa paglaglag sang aton mga kaaway.” 15Dayon iya ginkuha gikan sa sulodlan sang pagkaon ang ulo ni Holofernes kag iya ini ginpakita sa mga tawo. Nagsiling sia, “Yari, ang ulo ni Holofernes nga heneral sang mga hangaway nga taga-Asiria kag yari man ang muskitero gikan sa iya higdaan sa diin sia nagahigda tungod sa sobra nga kahulogbon. Ang Ginoo naggamit sang isa ka babayi sa pagpatay sa iya. 16Saksi ang Ginoo nga buhi nga wala ako matandog ni Holofernes bisan pa nga ang akon katahom nagtiplang sa iya kag nagdala sa iya sining kalaglagan. Wala ako madagtaan kag wala mamusingi ang akon pagkababayi. Ang Ginoo nagbantay sa akon samtang nga didto ako nagaestar upod sa aton mga kaaway.”
17Ang tanan nga mga tawo sa siudad natingala gid. Nagduloko sila sa pagsimba sa Dios. Tilingob nga nagpangamuyo sila, “O Dios namon, takos ikaw sang daku nga pagdayaw. Karon nga adlaw nanginmadinalag-on ikaw batok sa mga kaaway sang imo mga katawhan.”
18Dayon nagsiling si Uzias, “Judit, palangga, ang Labing Mataas nga Dios nagbendisyon sa imo labaw pa sang sa tanan nga mga babayi sa bug-os nga duta. Daw ano ka dalayawon ang Ginoong Dios nga nagbuhat sang langit kag sang duta! Ginbuligan niya ikaw sa pagpugot sang aton ginakurugan nga kaaway. 19Ang imo pagsalig sa Dios indi pagkalipatan sang mga nagasugid sang gahom sang Dios. 20Kabay ang Dios maghatag sa imo sang walay katapusan nga kadungganan tungod sang imo ginhimo. Kabay pa nga iya ikaw balusan sang madamo nga mga kaayuhan tungod kay nagpabilin ikaw nga matutom sa iya kag wala ikaw magpangduhaduha sa pagtaya sang imo kabuhi agod nga mapauntat ang pagpigos sa imo mga katawhan.”
Ang tanan nga mga tawo nagsabat, “Amen, amen!”
Currently Selected:
Judit 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012