Judit 12
12
Si Judit Nagpadayon nga Matutom sa Iya Pagtuluohan
1Nagmando si Holofernes sa iya mga suloguon nga dalhon si Judit sa lamisa sa diin nahanda ang iya mga pinggan nga pilak kag sa pag-amuma sa iya sang pinasahi nga pagkaon kag bino nga para sa heneral. 2Pero si Judit nagsiling, “Indi ako makakaon sang imo pagkaon kay batok ina sa mga kasugoan sang akon Dios. Magakaon lamang ako sang akon dala.”
3Si Holofernes nagpamangkot, “Pero ano ang imo buhaton kon maurot na ang imo balon? Sa diin kami magakuha sang pagkaon para sa imo? Wala diri sing mga Israelinhon sa bug-os nga kampo.”
4Si Judit nagsabat, “Sir, indi ka magkabalaka, indi maurot ining akon balon tubtob matuman sang Ginoo paagi sa akon ang iya ginplano.”
5Dayon gindul-ong sang personal nga mga suloguon ni Holofernes si Judit sa tolda. Nagtulog si Judit didto tubtob magkaagahon. Sa wala pa magbanagbanag ang adlaw nagbangon sia 6kag nagpasugo sia kay Holofernes nga pahanugotan sia nga makalakat agod magpangamuyo sa kabakuloran. 7Nagmando si Holofernes sa iya mga bantay nga tugotan si Judit sa paghalin sa kampo. Gani sa sulod sang tatlo ka adlaw nagpabilin si Judit sa kampo kag sa tagsa ka gab-i nagalakat sia sa kabakuloran malapit sa Betulia agod magpaligo sa isa ka tuboran. 8Sa tapos sia makapaligo, nagapangamuyo sia sa Ginoong Dios nga buligan sia agod nga manginmadinalag-on sia sa iya plano para sa kadalag-an sang Israel. 9Dayon nagabalik sia sa kampo nga matinlo na suno sa seremonya kag nagapabilin sia sa iya tolda tubtob matapos ang panihapon.
Ang Bangkite ni Holofernes
10Sang ikaapat nga adlaw halin sang pag-abot ni Judit sa kampo, si Holofernes naghanda sang isa ka bangkite para sa iya pinakamataas nga mga opisyales pero wala niya gin-agda ang mga opisyales nga nadestino sa pagbantay. 11Nagsiling sia kay Bagoas nga kapon nga nagatatap sang iya personal nga mga bulohaton, “Lakat ka kag hayloha ang babayi nga Hebreo nga yara sa imo pagtatap nga magkadto sia diri sa akon tolda agod magkaon kag mag-inom upod sa aton. 12Makahuloya nga palipason ko ining kahigayunan sa pag-angkon sa iya. Kon indi ko sia pagganyaton, kadlawan niya ako.”
13Gani naghalin si Bagoas sa atubang ni Holofernes kag ginkadtuan si Judit. Nagsiling sia, “Matahom nga babayi, ginaagda ikaw sang heneral agod mag-inom sa iya tolda. Dali ka kag magkalipay subong sang mga babayi nga taga-Asiria nga nagaalagad sa palasyo ni Nabucodonosor. Isa ini ka daku nga kadungganan.”
14Si Judit nagsabat, “Ginakalipay ko ang pagbaton sa pangagda sang heneral. Paano ako makapamalibad? Huptan ko ining malipayon nga gab-i tubtob ako buhi.”
15Gani nagtindog kag nag-ilis si Judit. Ginsuksok niya ang pinakatahom niya nga bayu. Nag-una kay Judit ang iya suloguon nga babayi kag ginhumlad sa duta sa atubang ni Holofernes ang panit sang karnero nga ginhatag ni Bagoas kay Judit agod pungkoan ini samtang nagakaon sia. 16Nagsulod si Judit sa sulod sang tolda ni Holofernes kag nagpungko didto. Napukaw ang tawhanon nga balatyagon ni Holofernes sang makita niya si Judit kag daw indi niya mapunggan ang iya handom sa pag-angkon sa babayi. Halin pa sang nahauna nga adlaw sang makita niya si Judit, naghulat sia sing kahigayunan nga mahaylo niya ini. 17Si Holofernes nagsiling, “Mag-upod ka sa amon sa pag-inom kag pahalipaya ang imo kaugalingon.”
18Si Judit nagsabat, “Salamat gid, halangdon nga heneral! Amo ini ang labing malipayon nga adlaw sang akon kabuhi.” 19Pero si Judit nag-inom kag nagkaon lamang sang mga ginhanda sang iya kaugalingon nga suloguon. 20Ang katahom ni Judit nagpawili sing labi kay Holofernes sa bagay nga nag-inom sia sing madamo nga bino labaw sang sa kinaandan niya nga ginainom sa bug-os niya nga kabuhi.
Currently Selected:
Judit 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012