Judit 11
11
1Si Holofernes nagsiling kay Judit, “Indi ka magpalibog, wala ka sing dapat kahadlukan. Wala ako nagasakit sa bisan kay sin-o nga luyag mag-alagad kay Nabucodonosor nga hari sang bug-os nga kalibutan. 2Sa subong gid, kon wala lang kuntani ako gin-insultohi sang imo mga kadugo nga nagaestar sa mga bukid, wala kuntani ako maghandom sa pagpakig-away batok sa ila. Sila ang nagdala sa ila kaugalingon sini tanan nga mga kahul-anan. 3Pero sugiri ako kon ngaa nga ginbayaan mo sila kag nagpalapit ka sa amon? Wala ka sing katalagman diri! Ginluwas ko ang imo kabuhi karon nga gab-i kag wala ka sing dapat kahadlukan sa palaabuton. 4Wala sing may maano sa imo diri; ang tanan magatahod sa imo subong sang tanantanan diri nga mga alagad sang akon agalon nga si Nabucodonosor.”
5Si Judit nagsabat kay Holofernes, “Tugoti ako nga makahambal sa imo, O halangdon nga heneral, kag kabay nga imo pamatian ang luyag ko isiling. Isugid ko sa imo ang kamatuoran. 6Kon tumanon mo ang akon panugyan, ang Dios magabuhat sa imo nga manginbantog kag indi ka mapaslawan sa imo mga ginaplano. 7Nagasumpa ako sa imo paagi sa kabuhi kag ikasarang ni Nabucodonosor nga hari sang bug-os nga kalibutan, iya ikaw ginpadala sa paghatag sing mahidaiton nga pagkabuhi sa tanan nga mga sakop sang iya ginharian. Wala lamang nimo ginpaalagad sa hari ang tanan nga mga katawhan kundi tungod sa imo ang talunon nga mga sapat, mga sinagod nga mga kasapatan kag mga kapispisan nagatuman sa iya. Tungod sa imo, magauswag si Haring Nabucodonosor kag ang iya ginharian. 8Nakabati kami sang imo kaalam kag kaabtik. Ang bug-os nga kalibutan nakahibalo nga ikaw ang labing takos, labing sampaton kag labing batid nga heneral sa kabug-osan sang ginharian sang Asiria. 9Nasagop sang mga taga-Betulia si Achior kag ginsaysay niya ang iya mga ginhambal sa imo konseho. 10Sir, magpati ka sa iya mga ginpanghambal tungod kay amo ina ang kamatuoran. Wala sing bisan sin-o nga makalaglag ukon makadaog sa amon luas lamang kon ang mga tawo magpakasala batok sa ila Dios.
11“Pero karon indi ka magkatublag kay imo maangkon ang imo tinutuyo. Sa tion nga ang mga Israelinhon magpakasala kag magpaakig sa ila Dios, mapatay sila. 12Sa karon gid kulang na ang ila pagkaon kag halos wala na sila sing tubig nga ilimnon. Gani, nagpamat-od sila sa pagpatay sang mga baka kag sa pagkaon sang kalan-on nga ginadumilian sa ila sang Kasugoan sang Dios. 13Nagpamat-od sila sa pagkaon sang trigo, paggamit sang mga ikapulo nga bino kag lana nga balaan nga ginatigana para igadulot sang mga pari nga nagaalagad sa Ginoo sa Jerusalem. Kami nga indi mga pari ginadumilian bisan sa pagtandog lamang sining mga butang, 14pero tungod kay ang mga tawo sa Jerusalem naglapas na sa sini nga kasugoan, ang mga tawo sa amon banwa nagpadala sang mga mensahero sa Konseho agod magpangayo sing pahanugot sa pagbuhat sini nga bulohaton. 15Sa tion nga mabaton nila ini nga pahanugot kag magkaon sila sining ginadumilian nga mga butang, mahapos ang paglaglag mo sa ila. 16Sang pagkahibalo ko sini nga mga hinun-anon, nagpalagyo ako sa akon mga kasimanwa. Ginpadala ako sang Dios sa imo agod magbuhat sang isa ka butang upod sa imo agod nga ang tanan sa bug-os nga kalibutan magakatingala sa pagkabati nila sini. 17Sir, diosnon ako nga babayi, kag sa adlaw kag gab-i ginasimba ko ang Dios sang langit. Magapabilin ako diri sa imo kampo kag sa tagsa ka gab-i magagwa ako sa kabakuloran sa pagpangamuyo sa Dios kag sia magasugid sa akon kon nakapakasala na ang mga Israelinhon. 18Sa tion nga mahibaluan ko ini, magabalik ako sa pagsugid sa imo kag magagwa ka upod ang kabug-osan sang imo mga hangaway. Ang mga Israelinhon indi makapangapin sang ila kaugalingon batok sa imo. 19Tudloan ko ikaw sang alagyan padulong sa gintung-an nga bahin sang Juda tubtob nga makaabot kita sa Jerusalem sa diin pagakoronahan ko ikaw subong hari sa tunga sang siudad. Paalaplaagon mo ang mga tawo sang Jerusalem kasubong sang mga karnero nga wala sing manugbantay. Bisan pa ang mga ido indi magtaghol sa imo. Ang Dios nagsugid sini una sa akon kag ginpadala niya ako agod isugid ini sa imo.”
20Si Holofernes kag ang iya personal nga mga suloguon naluyag sang ginsiling ni Judit, kag gindayaw nila ang iya kaalam. 21Nagsiling sila sa isa kag isa, “Sia siguro ang pinakamaalam kag pinakamatahom nga babayi sa kalibutan.”
22Gani si Holofernes nagsiling sa iya, “Maayo gid nga ginpadala ikaw sang Dios diri sa amon agod dalhon sa amon ang kadalag-an kag ang paglaglag sa mga nag-insulto kay Haring Nabucodonosor. 23Indi lamang nga matahom ikaw, kundi nga batid man ikaw sa pagpamulongpulong. Kon matabo ang suno sa imo ginsaad, ang imo Dios mangin-akon man nga Dios. Magaestar ka sa palasyo ni Haring Nabucodonosor kag manginbantog sa bug-os nga kalibutan.”
Currently Selected:
Judit 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012